Hoán-hoé jīn-choē
(Ia̍p Kim-bo̍k)
1934. 9, no. 594, pp. 25-26
Chhit kok ê sî, Līn Siōng-jû sī hó kháu-châi, koh ū tám-le̍k ê lâng, i ū oân-choân hit tè pó-ge̍k tò-lâi Tiō-kok, iā tī Siâⁿ-tî ê só͘-chāi, bô lêng-jio̍k-tio̍h i ê kun-ông, só͘-í Tiō-ông hong i choè siōng-kheng, koaⁿ-chit tian-tò pó Liâm Phó khah koâiⁿ. Liâm Phó chi̍t-ē siuⁿ, Goá tuì siàu-liân kàu taⁿ, keng-kè káng pah pái ê cheng-chiàn, chiah choè chiong-kun e chit, Līn Siong-jû put-kò khò i ê kháu-châi, hoán-tńg pí goá koaⁿ choè khah koân. Chiū tuì lâng kóng, Goá nā tú-tio̍h Siong-jû ê sî, tek-khak bek[sic.] lêng-jio̍k i. Siong-jû thiaⁿ-kìⁿ chit hō oē, muí-pái chhut-lâi ê sî-chūn, nā khoàⁿ-kìⁿ Liâm Phó, chiū koáⁿ-kín siám tuì piⁿ-á khì. I só͘ ēng ê lâng khoàⁿ-kìⁿ in chú-lâng chit hō khoán, chiū lia̍h-choè toā-toā ê kiàn-siàu, tāi-ke lâi tuì Siong-jû saⁿ-sî, beh khì pa̍t uī. Siong-jû chiah kā i kóng, Hiān-sî tē-it kiông, tē-it toā--ê chiū-sī Chîn-kok. Chóng-sī goá tī i ê tiān-téng, siōng-chhiáⁿ káⁿ toā siaⁿ hoah lâi chek-pī Chîn-ông, hô-hòng Liâm Chiong-kun, goá kiám chin-chiàⁿ sī teh kiaⁿ mah? Put-kò chit-tia̍p Chîn-kok m̄-káⁿ lâi phah Tiō-kok, chiū-sī in-uī ū goán nn̄g lâng, nā kau-chiap óng-lâi ê sū, goá oē siat-hoat, m̄-kú cheng-chiàn ê tāi-chì, iû-goân khò Liâm Chiong-kun. Siat-sú goán nn̄g ê put-hô, sī chhin-chhiūⁿ nn̄g chiah hó͘ teh saⁿ-chiⁿ, hit ê sè-bīn oh-tit lóng soah, só͘-í goá nā-kìⁿ-tio̍h i, chiū tāi-seng siám-pī. In-uī goá sī lia̍h kok-ka ê sū choè khah iàu-kín, i tuì goá sǹg sī kò-jîn ê hia̍p-hiâm nā-tiāⁿ, só͘-í bô beh ka pi kè-kàu lah. I só͘ ēng ê lâng thiaⁿ-liáu put-chí ū chêng-lí, iā chiū o̍h in chú-lâng ê khoán, tú-tio̍h Liâm Phó ê kun-lâng iā lóng khah niū i. Liâm Phó hit pêng ê lâng chiū ná kiau-ngō͘ khí-lâi, lia̍h-choè Siong-jû chin-chiàⁿ kiaⁿ i. āu-lâi ū chi̍t lâng miâ kiò Gû Kheng, lâi chhē Liâm Phó, chiong Līn Siong-jû ê ì-sù thiah-bêng hō͘ i thiaⁿ. Liâm Phó chiah chhíⁿ-gō͘ hoán-hoé, chiū thǹg-pak-theh pē chi̍t ki tek-poe, lâi Siong-jû in tau jīn choē, chhiáⁿ Siong-jû ēng tek-poe chek-hoa̍t i. Siong-jû chin hoaⁿ-hí khan i ê chhiú, chhiáⁿ i ji̍p-khì lāi-bīn, hó-lé khoán-thāi i, nn̄g lâng soà kiat choè siⁿ-sí ê kau-poê.
Chit ê kò͘-sū sī kà-sī lán. Lūn put-hô ê sū, m̄-nā kok-nih ū án-ni, ke-lāi iā sī ū án-ni, chiū-sī Iâ-so͘ ê Kàu-hoē iā oē tú-tio̍h án-ni. Ū-sî ē hun-tóng, saⁿ hiâm, saⁿ phoe-phêng, saⁿ hām-hāi, tāi-ke phoe-phêng, kóng-liáu lóng ū in ê lí-khì. Sū-put-ti Mô͘-kuí í-keng thàn chit ê ki-hoē, hō͘ lán lī-khui chèng-keng ê lō͘, lâi ji̍p tī i ê khoân-thò lah. Hoē-goā ê lâng in-uī khoàⁿ lán ê hoē-iú ka-kī put-hô, bô saⁿ-thiàⁿ lán ê hoē-iú ka-kī put-hô, bô saⁿ-thiàⁿ ê sim, oē soà kiaⁿ kàu m̄-káⁿ lâi, án-ni kàu-hoē thài oē heng-ōng neh? Só͘-í chhim-chhim ǹg-bāng hoē-lāi ê pêng-iú, nā ū chit hō, chiū koáⁿ-kín koé; nā bô, iā tio̍h kín-sīn m̄-thang hoān-tio̍h, bo̍h-tit hō͘ Mô͘-kuí ū phāng thang ji̍t-khì.
ia̍h koh chi̍t hāng, Siong-jû kap Liâm Phó sǹg sī siāng chi̍t tiān ê jîn-sîn, Liâm Phó ê sim, ū hō͘ hit ê kong-bêng miâ-siaⁿ bê-khì, chiū kap Siong-jû m̄-hó. Siong-jû iā khoan-iông i, kàu i chai thang hoán-hoé jīn-choē, chiū hoaⁿ-hí koh chiap-la̍p i, ka pi kau-poê; che sǹg sī chi̍t lâng tuì chi̍t lâng, pêng-iú óng-lâi ê sū nā-tiāⁿ. iáu ū chi̍t hāng khah toā iàu-kín, chiū-sī sè-kan lâng kiâⁿ m̄-tio̍h lō͘, poē-biū tō-lí, Siōng-tè chhut-chāi in khì choè, kàu i chai thang hoán-hoé jīn-choē, chiū beh koh chiap-la̍p i choè kiáⁿ, chit hō sǹg sī siⁿ lán ê lêng-hûn, pē-kiáⁿ ê chì-chhin, chū-jiân koh-khah iàu-kín. I ū chhe Kiù-chú Iâ-so͘ lo̍h-lâi sè-kan, hō͘ lâng sìn lâi tit-tio̍h koh kap Siōng-tè chhin-kūn. Iâ-so͘ lâi sè-kan thoân Siōng-tè kok ê hok-im, hō͘ lâng chhíⁿ-gō͘ chai choē, sī chhin-chhiūⁿ Gû Kheng thiah-bêng Siong-jû ê ì-sù. Taⁿ lán lóng tio̍h o̍h Liâm Phó, chai thang chhíⁿ-gō͘ jīn-choē, bián-tit āu-lâi beh hoán-hoé ê sî, chiah chai í-keng tî lah.
