首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 敬老
敬老
卷期：第594卷 本次： 日期：1934/9 刊名：台灣教會公報/芥菜子 頁數：22-23
篇名：敬老 [ Kèng-ló ]
作者：陳清義 Tân Chheng-gī
  顯示 : 漢羅 全羅 並列  

敬老

(陳清義)

利未記 19章32節

1934. 9，no. 594，pp. 22-23

  「見著白頭毛的人著起來徛，敬伊是老大，來敬畏恁的上帝；我耶和華的命令按呢。」

聖經的教示稱做完全，因為有逐款的教示佇teh。毋若教示人拜上帝，信耶穌，救靈贖罪若定，另外有教示真濟款，講袂盡。今這節的教示，是講人著尊敬老大的意思，照猶太的規矩，若有一个白頭毛--的入來，少年人著起敬，這个就是尊敬的意思。有的講，這个老人無學問，真粗魯，無名聲，欲怎樣尊敬伊？不管伊甚物款，著尊敬伊，因為有通予人尊敬的所在。我愛講3項。

  1. 伊有平素的款通尊敬伊。因為有過去的經驗，閱歷佮見聞。雖罔無讀冊，也自然有這種的智識。看約伯記12章12節，年月那深，智慧那大，歲壽那長，見識那懸。按呢通知，老人有一種平素的經驗，閱歷，見聞通講。你愛知咸豐三年的事，通問伊，伊會共你講；你愛知50年前法國拍台灣的事，教會拄著大窘逐的事，通問伊，伊會共你講。所以少年人著敬重老人，毋通看輕伊。

  2. 伊有現今的款通尊敬。伊的頭毛白，(卻現今有真濟老人頭毛烏，較濟攏是染--的)，面皮皺，尻脊骿曲，行路慢慢，手攑拐仔，真有通可敬的氣象。西洋有一个皇女，有出來行遊，佇路裡的中間看見一个老人，有人問伊講，你敢唚這个老人mah，若敢，我送你金十箍。皇女應講，你容允我共你唚喙好mah？老人應講，好。皇女就共伊唚喙，紲提金時錶仔送伊。可見這个皇女無看輕老人，而且閣敬伊，咱人著學這款。

  3. 伊將來的款通尊敬。因為伊近作古，歸仙，佇世間無偌久，不止話予人欽敬。看傳道12章2-7節，所講無聊的景象，來共伊說明。

  已經到彼時，日，月，星辰，的確烏暗，無光，烏雲遮，大雨淋漓。這个意思就是指將來死人的日，亦親像按呢。

  挨磨--的不止少。這个意思，就是指老人喙齒少。卻現今的老人喙齒真媠，攏猶佇teh，真整齊。這个是齒科醫師的氣力，毋是天然的喙齒。

  踮窗仔teh偷看--的攏烏暗。這个意思是指老人的目睭無看見，袂明。

  街路的門已經關。這个意思指老人的喙合徛。

 無聽見挨磨的聲。這个意思。是指老人食物無聲，是用卯--的，毋是用哺--的。

  Teh睏聽見鳥仔哮就起來。這个意思是指老人早早就起來。

  銀鍊已經斷去。這个意思是指老人龍船骨的線碇去。

  金盤已經毀壞。這个意思是指老人得欲近暮年。

水泉邊的水桶已經破，井頂的加轆也拍歹。這个意思就是老人teh-欲死。

  今看遮的景況，真通欽敬。人本然用土來做，死就歸土。人的靈魂是上帝予伊，死了亦歸上帝

　　逐人到尾，話親像老人，所以毋通看輕，著尊敬伊。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461