瑞芳教會
1934. 10，no. 595，pp. 30-31
瑞芳是台灣一个出名的所在。頭一項的出名就是出金。佇這个歹景氣的時陣瑞芳益發好趁食；因為真濟人對四界來掘金。閣一項的出名就是雨水；一年的中間落雨有半年較加。雖然是厚雨水的所在，猶久天國的果子真快出；逐年攏有加添人額。
論瑞芳教會，就是楊將先生佇1919年 6月17號，來做傳道師 。佇兩年前，就按算欲建築一間的新拜堂囥佇新瑞芳。為著大家的熱誠，鄙人就好膽共大家募集寄付金；也有募集兩千桶銀。大家就參詳用投票，多數來解決彼个位置。後來有投票寫逐人的意見，愛新瑞芳的有47票；愛舊瑞芳的有24票。後來長執會干焦解決修理舊拜堂，按呢紲無起新--的。雖然拜堂起無成，猶久上帝的國直直闊大，教會日日進步。佇舊年領洗禮入聖會共有26名。現時每禮拜的出色者有一百人以上；禮拜獻金，平均一禮拜有1.50 sián。毋若按呢，閣再每月日的頭禮拜有特別獻金；每月日有3箍咧維持艱苦人。毋若按呢，有200箍的基本金寄佇郵便局。今年傳道束金，每月日擔當35箍。現任長老一名，就是林En̂g-bō͘。執事兩名，就是廖天和，閣一个是簡清海。 |
