Kàu-oā
(Ông Siú-ióng)
1934. 10, no. 595, pp. 13
(I) Î-soaⁿ
Lín nā ū sìn bô giâu-gî,...... chiū nā tuì chit ê soaⁿ kóng, Tio̍h soá-khì hiat-lo̍h hái, ia̍h beh chiâⁿ (Má-thài 21:21).
Ū chi̍t ê gōng ê lāu-kong-á, khí chhù ǹg soaⁿ teh khiā-khí. Ta̍k pái nā beh chhut-ji̍p, tio̍h oan-lō͘ lâi kiâⁿ. án-ni kám-kak chin put-piān; āu-lâi chiū chhoā i ê kiáⁿ-sun, gia̍h ti-thâu, the̍h pùn-ki, lâi chhian-soá hit ê soaⁿ chò kang-tiâⁿ.
Ū chi̍t ê tì-sek ê lāu-toā-lâng, khoàⁿ-kìⁿ ài chhiò kóng, Lí nî í-keng lāu; soaⁿ iū-koh koân, sui-jiân chīn lí ê khuì-la̍t lâi chò, ia̍h sī bē-ē huí soaⁿ ê chi̍t ki mn̂g. Ah! hah--hah gōng kàu ke̍k!! Nā-sī lāu-kong-á ìn kóng, Bô! m̄-sī án-ni!! Goá nā sī iáu ū kiáⁿ, kiáⁿ nā sí iáu ū sun; sun koh seⁿ kiáⁿ, kiáⁿ koh seⁿ sun, kiáⁿ-kiáⁿ sun-sun, chiap-soà lâi chò, soaⁿ sui-jiân sī koân, ia̍h sī m̄-bián khoà-lū bē-ē hō͘ i pêⁿ lah.
Lia̍t-uī hiaⁿ-ché! Chit ê gōng ê lāu-kong-á ê khak-sìn kap chì-khì, kiám m̄-sī chin khó-chhú mah; lán ná ū chhin-chhiūⁿ chit hō sìn kap ló͘-le̍k, kiám bē thang chhian-soá lán sim-lāi ê khó͘-lān ê soaⁿ mah, si̍t-chāi sī bô oh-tit ê sū; in-uī Chú kóng, "Goá sit-si̍t kā lín kóng, sìn Goá ê lâng, Goá só͘ kiâⁿ--ê, i beh kiâⁿ--i, chiū pí chiah ê sū khah toā ê, ia̍h kiâⁿ i" (Iok-hān 14:12).
