Liân-ha̍p Jīm-chit-hoē

1934. 10, no. 595, pp. 19

  Gû-taⁿ-oan sio̍k ê Liân-ha̍p Jīm-chit-hoē (Gû-taⁿ-oan, Tang-āu-liâu, Kiâm-chuí, Sin-iâⁿ, Phoh-chú, Ē-poàⁿ-thiⁿ chiah ê kàu-hoē) tī 9 goe̍h 18 ji̍t, téng-po͘ 10 tiám khí, beh chū-chi̍p tī Ē-poàⁿ-thiⁿ lé-pài-tn̂g. Chit ê hoē, tuì khah-chá in-uī saⁿ-kap chhiáⁿ Bo̍k-su, kap saⁿ thê-hê khí pài-tn̂g ê in-toaⁿ lâi siat--ê. Kàu hiān-sî pài-tn̂g suî-lâng iā lóng khí hó, Bo̍k-su iā suî-lâng chhiáⁿ; só͘-í ū lâng kóng tio̍h hoè. Chóng-sī goá siūⁿ iáu ū pit-iàu tī-teh. Hiān-sî chiah ê kàu-hoē loē-iông lóng iáu-boē chhiong-si̍t: chiū-sī kàu-hoē choân-thé koan-liām, ū ê lâng chin chió; kàu-hoē thóng-it su-siúⁿ, chai ê lâng iā sī chió; iā seng-oa̍h chong-kàu-hoà ê būn-tê, che sī hiān-sî choè iàu-kín ê si̍t-chè būn-tê, sū-si̍t si̍t-hêng ê lâng chin chió. Só͘-í goá siūⁿ, sui-jiân bô koè-khì ê būn-tê, iáu-kú ū hiān-chāi iàu-kín ê kang tio̍h chò. ǹg-bāng sî kàu tāi-ke gâu siūⁿ, gâu gī-lūn lâi lī-ek kàu-hoē.