Khàu Chhun-bí
(Koeh Chuí-lêng)
1934. 11, no. 596, pp. 29-30
Goá só͘ thiàⁿ ê Chhun-bí, lí sī lāu-bú ko͘ siⁿ ê kiáⁿ, lí bú siú-chiat, chīn-sim chai-poê lí, kàu Tâi-lâm Lú-o̍h chut-gia̍p liáu, hōng-chit tī Sin-iâⁿ Iù-tī-hn̂g, chīn lí ê gī-bū choè-kang. 1933 nî 8 ge̍h, tuì Ko-hiông lín sì-kū Tiuⁿ Jīm-kuì Sian-siⁿ siāu-kài, goá thàm-thiaⁿ So͘ Iûⁿ--sī Khiam-bí Chip-sū, chiàu i chèng-bêng, kap lí 4 nî choè tông-chhong, sù-tek chiâu-pī, thiâm-chēng, un-sûn, hó sèng-chêng, gâu thiàⁿ lâng, choè-kang bín-chia̍t ū chhù-sū, chīn-la̍t chàn-sêng, sī chin hó.
Kin-nî chiaⁿ-ge̍h tī Sin-tiàm kiat-hun, chi̍t lé-pài kú chiū lâi Pîn-tong. 6 ge̍h 16 ji̍t tò-tńg lâi Tâi-pak, tī Tâi-pak Pēⁿ-īⁿ chiū-i. 7 ge̍h khì Ngāu-san-oân thái-ko pēⁿ-īⁿ choán-tē liâu-ióng, tuì ka-têng ê sī-toā-lâng iú-hàu, gâu sūn-thàn, tuì toā-soè chiàu lé-sò͘ pêng-hô kè ji̍t. 10 ge̍h 6 ji̍t kap toā-soè saⁿ-sî, hoaⁿ-hí chiū-chhia khì Pîn-tong. 10 ge̍h 13 ji̍t chá-khí 4 tiám cheng, khí-lâi chú-pn̄g, ài hù kip-hêng-chhia tńg-khì Tâi-pak, ēng Chiú-cheng khí-hé, hut-jiân chiú-cheng po̍k-hoat, choân-sin to̍h-hé, chhám-chōng hō͘ lâng put-jím khoàⁿ, che̍k-sî phah-si̍t, kng-ji̍p Hoán-thióng I-īⁿ tī-liâu. Ē-po͘ 3 tiám goā cheng, siū Chú tiàu-khì, pia̍t-sè. ài ah! Khó-lîn Chhun-bí, lí tú-tio̍h chit hō chhám-sí, hō͘ goá ê sim chhin-chhiūⁿ li̍h-khì, beh cháiⁿ-iūⁿ hō͘ goá oē an-uì ah!
Sì-tiám goā kng lí tńg-lâi koaⁿ-sià, hit-mî Tī-suí kang-sū chit-oân, 6 lâng tī lí ê koan-chêng kò͘ kàu thiⁿ-kng, 10 tiám cheng ūn-koan kàu Pîn-tong ia̍h, Tī-suí kang-sū Chú-jīm í-hā 40 goā lâng, kap Pîn-tong Kàu-hoē tāi-piáu sàng kàu ia̍h-lāi, kàu Tâi-lâm ia̍h, 30 goā lâng lâi-tán-chih, chē chū-tōng-chhia, chhiú-chhia sàng kàu An-pêng lé-pài-tn̂g kò-pia̍t-sek. Su-hoē-chiá Siau Bêng-chiok Thoân-tō-su, gîm-si, kî-tó, tha̍k Sèng-chheh, soat-kàu, lí-le̍k, tiàu-sû. Tī-suí kang-sū tāi-piáu Bo̍k-iá Chú-jīm, Tâi-lâm Kàu-hoē tāi-piáu Ko Hâu--sī lú Tiúⁿ-ló, tiàu-tiān chin choē thong, hoē-chòng-chiá pah-goā lâng sàng kàu bōng-toē, m̄-kam lâu ba̍k-sái, kā lí ai-tō, toā-hiaⁿ Khé-te̍k, toā-só Sìn-sio̍k, toā-ko͘ Léng-lī, saⁿ-ko͘ Sio̍k-bín, sì-chek Hō͘-seng, sì-ko͘ Chhian-kim, gō͘-chek Î-sin, hu Khé-sû. O͘-ho͘ ai-chāi, lí khì ah! Chhin-chhiūⁿ khoe-chuí lâu-lo̍h, chhin-chhiūⁿ hong-chhe tn̄g-soàⁿ, lí éng-oán kap Chú khiā khí tī Bêng-kiong.
