首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 結核病
結核病
卷期：第596卷 本次： 日期：1934/11 刊名：台灣教會公報 頁數：12-13
篇名：結核病 [ Kiat-hu̍t-pēⁿ ]
作者：陳鳩水 Tân Khiu-suí
  顯示 : 漢羅 全羅 並列  

結核病

(陳鳩水)

1934. 11，no. 596，pp . 12-13

  第三章：肺結核佮胸膜炎

甲. 肺結核

(1)症狀

  肺結核的症狀，有的是對肺組織的改變，有的是對結核菌的毒素入佇血內。前的症狀，叫做局部--的；後--的，叫做全身--的。

  局部症狀

  結核菌入體後，所生成的結核，起頭是微細，袂會致病，局部全身攏無症狀。然後結核漸漸大，症狀發現。彼个發病，大概真慢；毋過有急性--的，這是佮慢性--的，有無相同的所在。

  結核病的初起佮症狀的發現；彼个款式無相同，有的干焦局部--的，有的全身--的。毋過大多數，局部佮全身的症狀siāng時發出。

  咳嗽 ：因為肺組織內有結核；所以初起的症狀，只有咳嗽 (嗽)若定。起初無真嗽，較常五更早，無痰。若結核潰爛，就所生的物入佇小氣管內，然後才咯出來。近佇發病的所在的氣管支siāng時發炎，分泌加添。結核潰爛的物，暝時積聚佇發炎的氣管支內；所以早起時呸痰較濟。嗽佮痰是做肺結核兩个主要的症狀。

  出血：若近佇結核的血管也受潰爛，就會咯血。咯血有時做肺結核最初的症狀-所以最好警戒。起初的症狀，較常只有嗽痰，掠做普通的感冒經過三禮拜久--的，應該著就醫檢查看有肺結核抑無？

  全身症狀

  肺結核猶袂潰爛的時，就局部無症狀；結核菌的毒素經過血吸收，就會發出全身的症狀；親像厭懶無力，無愛做工等。閣常常無愛食，消化不良等；經過幾若月日久，其他的症狀才發現；對按呢起症做胃腸病，抑是神經衰弱咧醫治--的，是算袂了。所以初期的診斷，是著欠用老練的專門醫佮真好的X光機。

  閣這个體重的減少是重要的症狀；總是若無別款症狀，患者掠做無要緊。以上三个症狀，有時併發。

  最常看著--的，是發熱佮無力。起初熱度是極小可，無通注意著；到將早暗的熱度比較，起頭知暝時的熱度小可較懸。暝時--的，比健康的人懸半度，若是透早起時--的，比健康--的小可較低，親像清早，喙內舌下的溫度是9705'F，暝時是99.5'F；通僥疑肺結核。

  閣講一遍，常常看著--的，嗽，痰，無愛食，體重減少佮暝時的發日。佇咱台灣沓沓看著患者發出頂面所記的症狀，幾若月日才欲就醫。

  其他初起的症狀。初起的症狀，較常是頂面所記--的；總是也有例外--的。雖然是罕得看著，也著知影。有時起症嗽，痰，懸熱；拄拄親像急性的肺炎，其實佇結核性的發炎。經過一禮拜後，彼个肺炎的熱度無緊緊退，然後急性的症狀漸漸減少，變成慢性。有時起症親像傷寒病；發症無緊，熱度漸漸懸，小可嗽，痰少；無偌久肺部的症狀漸漸顯明，變成慢性--的。

  凡若肺結核初起的時，親像急性的肺痰，抑是傷寒的症狀--的；肺的組織的受害真激烈，也沓沓轉做全身的結核病 (粟粒結核症)，彼个豫後比較彼號慢慢進行--的，大大較毋好啦！
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461