Hoê-siūⁿ
(Khng Ka-im)
1934. 11, no. 596, pp. 13-14
1. Goá bat chi̍t-pái kap chi̍t ê hoê-siūⁿ tām-lūn tō-lí, goá ū mn̄g i "Hoê-siūⁿ" ê ì-sù. I kóng, "Chit-ê sī goán chhut-ke-jîn ê lí-sióng, kî-si̍t bô chi̍t ê lâng ē-kham-tit chheng-chò hoê-siūⁿ, chí-ū Sek-khia-mô͘-nî nā-tiāⁿ." "Hê" sī hô-ha̍p (和合). "Siūⁿ" sī chì-chun chì-siōng ê sîn-bêng (至尊至尚). Ì-sù sī "hô-ha̍p chì-toā ê sîn-bêng ê lâng," che sī hu̍t-ka bû-siōng ê lí-sióng."
Ki-tok-tô͘ eng-kai tio̍h ū "hoê-siūⁿ" ê lí-sióng, chóng-sī lán lí-sióng ê kái-sek, tio̍h chìn chi̍t-pō͘, chiū-sī m̄-nā kap Siōng-tè hô, sûn-choân chhin-chhiūⁿ Thiⁿ-pē ê sûn-choân nā-tiāⁿ; iā tio̍h pò-thoân kiù-sè ê chin-tō, lâi hō͘ bîn-seng (民生) ko-siōng, tō-tek ko-siōng (進而尚化天下). In-uī Ki-tok-kàu sī ji̍p-sè-tek (入世的) chong-kàu, beh chín-kù bān-bîn. Iâ-so͘ kóng, "Goá m̄-sī kiû lí hō͘ in chhut sè-kan, chiū-sī pó-siú in thoat-lī pháiⁿ--ê...chhin-chhiūⁿ lí chhe goá ji̍p sè-kan, goá iā chhe in ji̍p sè-kan...chiū hō͘ sè-kan chai lí chhe goá (Hān 17:15-21). Kin-ná-ji̍t ê siā-hoē 2-keng chè-hoē (際會) tī Au-chiàn í-lâi, bī-cheng-iú[sic.] ê hui-siông-sî, hāng-thâu hāng-bé to͘ ū thiaⁿ-kìⁿ chit ê siaⁿ, jîn-sim bê-loān m̄-chai lō͘ ê sî, kiù-chè chit khoán siā-hoē, tû Ki-tok-tô͘ í-goā, lán kiám ū khoàⁿ-kìⁿ sím-mi̍h lâng mah!
2. Ū chi̍t e 5 hoê-siūⁿ kóng, "Lâng tio̍h tuì put-kàu, chiah thang tit-tio̍h pêng-an, kim-sè só͘ tú-tio̍h--ê, bô m̄-sī chêng-sè ê in-kó (因果). In-kó ê koan-liām nā bêng, chiū ē khoàⁿ-phoà lán hiān-chāi ê sin-sè (身世), án-ni chiū bô hoân-ló." Goá koh thiaⁿ-tio̍h pa̍t ê hoê-siūⁿ kóng, "Ū lâng kóng chong-kàu sī a-phiàn, m̄-kú a-phiàn nā ē-hiáu ēng, sī hó-io̍h." án-ni ū-iáⁿ, in-kó-keng ê kà-sī sī chhin-chhiūⁿ chit khoán lah! Chóng-sī kai-chài Ki-tok-kàu ê kà-sī iâⁿ-koè chē-chē. Lán ê kan-khó͘, sī tuì lán ê su-io̍k só͘-bê só͘-tiò (Ngá-kok 1:14). Chóng-sī nā hoán-hoé thun-lún, kàu-bé ē tit-tio̍h Chú ê chû-pi lîn-bín (Ngá-kok 5:11). Koh lán ê pêng-an m̄-sī it-sî-tek, sī éng-kiú oa̍h-miā ê pêng-an. Iâ-so͘ kóng, "Goá ēng pêng-an lâu-teh hō͘ lín, goá chiong goá ê pêng-an siúⁿ-sù lín, goá teh hō͘ lín, m̄-sī chhin-chhiūⁿ sè-kan teh hō͘ lâng ê khoán" (Hān 14:27).
3. Ū chi̍t ê hoê-siūⁿ kóng, "Goán ê put-chó͘ chin chû-pi, ū chi̍t pái kiông-tō beh thâi i, iáu-kú i kóng, "Lí m̄-thang thâi goá, āu-pái goá nā sêng-hu̍t, chiah tō͘ lí lâi khì se-thian. āu-lâi ū-iáⁿ án-ni chò. Suí-bóng sī tù-te̍k, iáu-kú thiàⁿ i. Sè-kan kiám iáu ū chit khoán lâng mah?" Ū-iáⁿ lah! Chóng-sī chhì-siūⁿ si̍p-jī-kè ê Iâ-so͘, siū-tèng bô ai-oàn, iáu-kú lîn-bín jîn-luī ê o͘-àm, kiû kóng, Pē ah, sià-bián in, in-uī in só͘ chò--ê, in m̄-chai (Ka 23:34). Só͘-í Sèng-keng kóng, Iâ-so͘ ê huih, pí A-pek khah hó lah (Lâi 12:24). Nn̄g ê chha̍t siat-to̍k i (Thài 27:44). iáu-kú tuì hoán-hoé ê chha̍t ê kiû-kiò, Chú kóng, "Goá si̍t-chāi kā lí kóng, kin-á-ji̍t lí tek-khak kap goá tī lo̍k-hn̂g (Ka 23:43). Ah! Bô sió-khoá ê oàn-chheh, put-pêng. Chit ê Iâ-so͘, hô-téng ê chû-pi leh!
