Hui-le̍k kap Thài-kàm

(Tân Chheng-gī)

1934. 11, no. 596, pp. 21-22

  Sù-tô͘ 8 chiuⁿ 26-40 chat, tha̍k chit kuí-chat ê Sèng-keng, put-chí ū só͘ kám, chiū chai sī kò-jîn pò͘-tō ê sū-si̍t, chiū-sī Hui-le̍k chhoā Thài-kàm lâi kui Chú. Taⁿ chiong in ê chōng-hóng, tuì saⁿ hong-bīn lâi gián-kiù, pâi-lia̍t tī ē-toé:-

  Thâu-chit hong-bīn: Lūn Hui-le̍k

  Hui-le̍k sī sím-mi̍h lâng, chiū-sī sù-tô͘ só͘ siat-li̍p 7 ê chip-sū ê tiong-kan ê chi̍t-ê, in-uī Sū-thê-hoán tú-tio̍h pek-hāi, sì-soàⁿ khiā-khí. Hui-le̍k chiū khì thoân tō-lí tī Sat-má-lī-a ê téng chhù, ēng Sat-má-lī-a choè éng-oán khiā-khí ê só͘-chāi. āu-lâi i ū tuì Ai-thê-o-pek ê thài-kàm thoân tō-lí, soà kā i niá soé-lé. án-ni Hui-le̍k sǹg-sī A-hui-lī-ka chiu pò͘-tō ê thâu-chi̍t lâng. In-uī Ai-thê-o-pek chiū-sī A-hui-lī-ka tang-pak ê kok, tuì Iû-thài lâi khoàⁿ, chiū-sī sai-lâm pêng ê káng-toē. Lán lóng chhim chai Hui-le̍k sǹg-sī bô koân-sè ê pò͘-tō-ka, beh kám-tōng Lú-ông Kan-tāi-ki ê thài-kàm, i sī tāi-chông tāi-sîn, beh kā pò͘-tō, kiám m̄-sī chin uî-lân; chóng-sī ū tit-tio̍h thiⁿ-sài ê bēng-lēng, tuì lâm-pêng khì, chìn-chêng chiū-kūn chhia, thiaⁿ-kìⁿ thài-kàm teh tha̍k Í-sài-a 53 chiuⁿ 7, 8 chat. Thang chai Hui-le̍k sī gián-kiù Sèng-keng ê pò͘-tō lâng, koh-chài ēng un-jiû ngá-khì ê oē lâi chit-būn thài-kàm. Khoàⁿ i oē chai chit ê Sèng-keng ê ì-sù á-boē? Thài-kàm kóng bô lâng khui-thiah, beh thái-oē chai, chhiáⁿ lí kā goá kóng, Hui-le̍k chiū ín chit ê Sèng-keng, lâi thoân Iâ-so͘ ê hok-im. āu-lâi thài-kàm ū sìn, tuì án-ni lâi khoàⁿ, Hui-le̍k ū 3 hāng:-

  1. Sim bô kiau-ngō͘.

  2. Ū chin hó-táⁿ.

  3. Ho̍k-chiông bēng-lēng.

  Lâng beh ín-chhoā lâng kui Chú, pò͘-tō ê hong-hoat, tio̍h chiàu án-ni.

  Tē-jī hong-bīn: Lūn Thài-kàm

  Chit ê thài-kàm, Sèng-keng bô kóng i ê miâ, kan-ta chai sī Ai-thê-o-pek su-khò͘ ê koaⁿ-oân, sī īⁿ-pang lâng, choè lâng chin tiong-sêng, jia̍t-sim ài ho̍k-sāi Chú, bô hiâm lō͘ hn̄g, hù kiaⁿ-siâⁿ lé-pài, iā m̄-kiaⁿ khòng-iá ê khi-khu, sin-thé ià-siān. iáu-kú oē tī lō͘-tiong tha̍k Sèng-keng, iā bô ēng ui-koân hián-hek, goān an sêng kàu, chiū-kūn pi-bî ê pò͘-tō lâng; m̄-sī si̍t-chāi ê sim ài kiû tō-lí, tek-khak boē-oē. Choè-āu ū khiam-pi ê sim kiû soé-lé, chhim-sìn Iâ-so͘ Ki-tok choè Siōng-tè ê Kiáⁿ.

  Tē-saⁿ hong-bīn: Lūn Hui-le̍k kap Thài-kàm lóng ū thang chhú-hoat ê só͘-chāi

  Tī lán kàu-hoē ê tiong-kan, ū chit nn̄g khoán ê lâng, lán tio̍h chhú-hoat.

  1. Chhú-hoat Hui-le̍k, gâu ín-jîn kui Chú. Lán choè sìn-tô͘ tio̍h o̍h chit khoán. I tī kò-jîn thoân-tō ê sî, ke̍k hó hong-hoat, ū kuí-nā hāng thang chhú:-

    A. Bô kiau-ngō͘, ēng un-jiû ê oē lâi mn̄g thài-kàm.

    B. Ū ióng-kám, koh ū tám-le̍k, chìn-chêng chiū-kūn chhia.

    C. Ho̍k-chiông bēng-lēng, tuì lâm-pêng khì.

    D. Kái-keng koat-sim, kàu hō͘ thài-kàm chū-jīn Ki-tok sī Siōng-tè ê Kiáⁿ chiah soah.

  Chit-ê thang kóng sī ín-jîn kui Chú ê sêng-kong.

  2. Chhú-haot thài-kàm, gâu tui-kiû chin-tō. Lán choè kiû-tō-chiá, tio̍h o̍h chit khoán. I sī īⁿ-pang lâng, ài kiû-tō ê sî, ke̍k ū bô͘-iūⁿ, iā ū kuí-nā hāng thang chhú:-

    A. Choè lâng tiong-sêng, jia̍t-sim ài ho̍k-sāi Siōng-tè.

    B. Bô hiâm lō͘ hn̄g, hù kiaⁿ-siâⁿ lé-pài.

    C. M̄-kiaⁿ khòng-iá khi-khu, sin-thé ià-siān, iáu-kú tī lō͘-tiong tha̍k Sèng-keng boē siān.

    D. Goān an sêng kàu, tī pi-bî ê pò͘-tō lâng, put-thí hā-būn; âu-lâi ū tit-tio̍h tō-lí, soà kiû soé-lé, lâi tit-tio̍h bô kiông-chīn ê khoài-lo̍k, an-jiân tò-khì.

  Lán choè Ki-tok-tô͘, ài in-jîn kui Chú, kò-jîn thoân-tō tio̍h o̍h Hui-le̍k.

  Lán choè kiū-tō-chiá[sic.], ài chhē kiû chin-tō, ia̍h tio̍h o̍h thài-kàm.

  Tī lán kàu-hoē ê tiong-kan, nā goān chhú-hoat chit nn̄g lâng ê khoán, ún-tàng oē hō͘ sìn-chiá ín-jîn kui Chú, iā oē hō͘ kiû-tō-chiá chhē kiû chin-tō. Kàu-hoē ún-tàng oē heng-khí.