Ki-tok Sèng-tàn Cheh
(Chú-pit)
1934. 12, no. 597, pp. 1-2
Thiⁿ-sài ê Thoân-pò
Chuí-chēng-khì[sic.] chin chió ê Iû-thài kok Khòng-iá ê mê-sî, khong-tiong chheng-chēng, chheⁿ-sîn ia̍p-ia̍p-sih. Hit ê-hng, ke-thiⁿ chi̍t-chân ê Sîn-pì. Hiah-ê teh kò͘-iûⁿ ê bo̍k-chiá, hut-jiân khoàⁿ-tio̍h thiⁿ-téng hô-kong chhàn-lān, chiū kiaⁿ kàu sîn-put-hū-thé. Teh kiaⁿ-hiâⁿ ê tiong-kan, ū Thiⁿ-sài kiò in bián ngông-ngia̍h, soà kā in kóng, Kin-á-ji̍t Ki-tok chhut-sì tī Tāi-pi̍t ê siâⁿ lah. Koh tiap-á-kú chiū ū chin-chē thian-kun lâi kap hiah ê Thiⁿ-sài chhiùⁿ Koa kóng: "Tī ke̍k koân ê uī, êng-kng kui tī Siōng-tè; Tē-chiūⁿ hô-pêng tī I só͘ hoaⁿ-hí ê lâng ê tiong-kan."
Bô pêng-hô ê sè-kài
Tuì hit-tia̍p liáu-āu, keng-koè nn̄g-chheng goā nî kú. Sui-jiân kho-ha̍k toā hoat-ta̍t, ē thang haot-kiàn só͘ m̄-bat ê sè-kài, í-ki̍p thàu-thiat chē-chē ê ò-biāu; si̍t-chāi hit ê bûn-hoà ê cheng-hoa, sī chò 20 sè-kí toā ê khoa-iāu. iáu-kú Thiⁿ-sài só͘ gîm "Tē-chiūⁿ hô-pêng" ū lîm-kàu, boē?
Bô-lūn sím-mi̍h sî-tāi, lâng lóng teh him-bō͘ bô-pêng. Tī chit ê nn̄g-chheng nî kan, bô m̄ uī-tio̍h hô-pêng lâi teh ló͘-le̍k, kiat-kio̍k bē thang khoàⁿ-kìⁿ si̍t-hiān. Lō͘-kok ê hông-tè só͘ thê-chhiòng "Pêng-hô-kiong" í-keng ū kiàn-siat tī Hái gâ. Khó-sioh bián koh kuí nî, chiū hoat-seⁿ sè-kài ê toā chiàn-cheng! Sòng-sit chiâⁿ chheng bān lâng ê sèⁿ-miā; huì-liáu kuí-nā chheng ek ê kim-chîⁿ.
Chhin-chhiūⁿ chit khoán ê taō chiàn-cheng, bô chi̍t lâng bô m̄ koh-khah kám-kak hit ê chhi-chhám! Kàu sè-kài hô-pêng khoe-ho̍k liáu-āu, chiū Kok-chè liân-bêng sêng-li̍p. Sui-sī án-ni, chit ê Liân-bêng, kó-jiân ē thang pá-ak Pêng-hô ê si̍t-koân, bē?
Tī sè-kài, kiám bô pêng-hô?
Lâng-lâng só͘ ǹg-bāng ê pêng-hô, kiám bē thang si̍t-hiān tī sè-kài mah? Sè-kài kiám sī hoé-chhù mah? Koat-toàn m̄-sī án-ni. Pêng-hô, sī tī Siōng-tè só͘ hoaⁿ-hí ê lâng ê tiong-kan. Tuì Ki-tok tit-tio̍h choē sià, Siōng-tè kap lâng ê pêng-hô ho̍k-tò ê só͘-chāi, tī-hia ū chin ê pêng-hô tī-teh. Goā-bīn kiám-chhái chhin-chhiūⁿ toā hong-thai ê kong-kéng; iáu-kú lāi-bīn sī ke̍k an-ún thò-tòng. Bô-lūn siáⁿ sū-chêng, kéng-gū, khoân-kéng, iā bē thang phah-phoà chit khoán ê hô-pêng.
Sian-ti Í-sài-a ū èng-ún hit ê Pêng-hô ông kok, beh chhin-chhiūⁿ án-ni:
"Chhâi-lông beh kap mî-iûⁿ-á saⁿ-kap toà, pà kap soaⁿ-iûⁿ-kiáⁿ saⁿ-kap tó--teh; gû-á kap sè-chiah sai kap puî ê cheng-seⁿ, chò sè-hàn ê gín-ná beh khan in. Gû kap hîm beh saⁿ-kap chia̍h, in ê kiáⁿ beh saⁿ-kap tó-teh; sai beh chia̍h chháu chhin-chhiūⁿ gû. Chia̍h-leng ê gín-ná, beh thit-thô tī ok-choâ ê khang-kháu; tn̄g-leng ê gín-ná, beh hē chhiú tī to̍k-choâ ê hia̍t. Tī Goá ê sèng-soaⁿ ê piàn-tē, tek-khak bô sún-siong, bô hām-hāi; in-uī jīn-bat Iâ-hô-hoa ê chai-bat beh chhiong-moá tē-chiūⁿ, chhin-chhiūⁿ chuí im-moá tī iûⁿ-hái" (Sài 11:6-9).
Pêng-hô ê ông-kok, tek-khak ū chi̍t-ji̍t beh si̍t-hiān.
