Táu-la̍k Kàu-hoē lio̍k-sú
1934.12 597 koàn p. 18
(Lâu Iú-tēng)
(Chiap 10 goe̍h 18 bīn)
Tī 1902 nî, Lîm Io̍k-kî Sian-siⁿ ê sî-tāi, tit-tio̍h Moê Kam-bū Bo̍k-su, Lâu Bān-kiàm Tiúⁿ-ló, Gô͘ Lo̍k Tiúⁿ-ló-niû in 3 lâng ê chîⁿ, Lâu Tiúⁿ-ló tuì in loē ti̍t-lú Tiuⁿ--sī Eng, kap in ti̍t-á Tiuⁿ Thiam-teng bé chi̍t tè chhù-tē tī Táu-la̍k-pó Hoan-siā--nih. Hit tè tē kiò-chò Khe-á-kîⁿ, hit tè tē tāi-iok ū 3 hun. Tī 1903 nî, teng-kì chò "Táu-la̍k Iâ-so͘ Kàu-hoē ê lé-pài-tn̂g te." Keng-koè 4 nî kú, koaⁿ-thiaⁿ ū khiàm-ēng chi̍t-pō͘-hūn, só͘-í Táu-la̍k oē-seng-hoē,chiong kū chhī-tiûⁿ (hiān-sî ê pài-tn̂g-tē), 1 hun 9 lî 5 mô͘ 5 si, tī 1907 nî 2 goe̍h 4 ji̍t, teng-kì kau-oāⁿ. Chóng-sī chhun ê gia̍h ū bē hō͘ Lô͘ EN.
Tī 1911 nî, N̂g Hiàn-chiong Sian-siⁿ ê sî-tāi, Tióng-chip ū gī-tiāⁿ beh khí lé-pài-tn̂g. Kàu keh-nî, Tiuⁿ Tiāu-siông Sian-siⁿ ê sî, chiū koh chū-chi̍p koat-gī, soà phài Lâu Bān-kiàm, Tân Hoan-chû, Khó͘ Chiu-hong, Liāu Hoàn-chiong siat-hoat kiàn-tiok ê sū. Bô kuí goe̍h-ji̍t chiū khí chi̍t chō lé-pài-tn̂g, kap 7 keng ê siok-sià, nn̄g keng ê Bo̍k-su pâng. Hit ê keng-huì ū ēng 3003 chó-iū gîn. Tī 1913 nî 2 goe̍h, ū kí-hêng lo̍k-sêng-sek (chiū-sī hiān-chāi ê pài-tn̂g).
