首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 舊約書序說
舊約書序說
卷期：第597卷 本次： 日期：1934/12 刊名：台灣教會公報 頁數：7-8
篇名：舊約書序說 [ Kū-iok-suSū-soat ]
作者：陳金然 Tân Kim-jiân
  顯示 : 漢羅 全羅 並列  

舊約書序說

陳金然

(接前號第8面)

1934.12，no.597，pp.7-8

  V. 舊約書的分類佮順序

  咱今仔日咧讀的舊約，是對濟濟種的冊來成立，攏總是39卷。人大概共伊分做3類：-

  1)歷史(17卷)創世記-以斯帖。

  2)文學(5卷)約伯-雅歌。

  3)預言(17卷)以賽亞-瑪拉基。

  咱知彼中間有的分前後，抑是上下，- 撒母耳，列王，歷代。-總是希伯來原文無按呢分；閣以斯拉，尼希米是合做一本，也12小先知也是做一本。對按呢自然譯本佮本文有無相同的所在。這款的各樣，是對LXX (70士譯) 起，這大概是趁當時亞力山大智識社會的風俗。這个城最初的圖書館長，是當時的學者，是出名的詩人Challimachus。伊不止嫌大本冊，因為真鎮位，費氣提，所以欲做圖書館的利便，就將大部的冊攏共伊分本。這个風俗紲影響全市，紲到佇LXX。閣各卷的排列也受當時亞力山大的理論哲學影響，就斷然脫離原典的傳統，排列分類，親像現在咱所咧讀的款。照譯者的理論，是愛對「歷史」來看以色列的過去，對「文學」來看「未來。」

  這款的法度雖然對原典有無忠實，猶久對舊約各卷解釋上有真大的暗示佇咧。不論是民族，抑是個人，欲想伊的過去佮未來，攏著用現在做地基。Oscar-Wilde講，「希臘哲學會改造現在佮未來，總是基督會改造過去。」咱若靜靜來想，咱家己的生涯，紲悲嘆過去逐項攏是空虛，實在夠額通流目屎。有人對按呢紲厭世，自暴自棄，甚至有的紲想短路。因為看伊的過去是死無，無向望；總是若有入基督教，用基督教的目睭來看咱的過去，就無拄拄是徒然，空虛。換話來講，就是基督教會予咱的過去閣活。保羅也是就這號教示，所以伊的歷史哲學是「萬事相佮來，無毋是欲利益疼上帝的人」(羅8：28)。

  今來看本文的分類佮順序(譯本的分類佮順序是照頂面所講按呢，所以請咱對咱的舊約來看，紲佮下面的表對照，就較明彼个各樣的所在；因為紙面的關係無通排佇遮對照)。

  希伯來原典的分類，順序：-

  I. 律法(5卷)：-

  創世記

  出埃及記

  利未記摩西的五經。

  民數記

  申命記

  II. 預言(8卷)：-

  約書亞

  士師前記

  撒母耳

  列王

  III. 聖文 (11卷)：-

  詩篇

  箴言詩

  約伯記

 

  路得盤過節

  耶利米哀歌(出12：1-14)。

  傳道五旬節

  以斯帖五卷           (Sin 16：9-12)。

  但以理國恥日

  以斯拉，尼希米(II王25：1-12)。

  歷代志                           搭寮節

                                           (利23：33-43)。

                                         普珥日

                                           (帖9：15-32)。

                                         咧朗讀--的。

  以上按呢是24卷，總是Jesephus，Origen，Epiphanius，佮Jerome (Hieronymus) in主張才有22卷若定。In是拍算希伯來的字母是22字，所以舊約也是22卷若定。設使若是按呢，就是撒毋耳佮列王合做一本，也以斯拉，尼希米合做一本，歷代志也是合做一本。(LXX譯本也是將撒母耳佮列王合做伙，是分做列王1, 2, 3, 4，按呢不止有意思佇咧。總是LXX有加添濟濟本，今仔日是做外典。最近日本聖公會有譯遐的外典做舊約聖冊俗篇，普及版Y1.00若定，有心的人通買來研究)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461