首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 傳教師娘重大職務
傳教師娘重大職務
卷期：第597卷 本次： 日期：1934/12 刊名：台灣教會公報 頁數：13-15
篇名：傳教師娘重大職務 [ Thoân-kàu-su-niû Tiōng-tāi Chit-bū ]
作者：
  顯示 : 漢羅 全羅 並列  

傳教師娘重大職務

(一記者)

(接10月第10面)

1934.12，no.597，pp.13-15

  2. 傳教家夫婦著怎樣做和好的事？

  論傳教師娘重大職務。按怎來講起，夫婦和好是婦人人的責任？按呢講是無公道。因為丈夫是家內的頭，頭你若四正，遮的跤手就綴你四正；按怎你做頭的人毋講家己，干焦咧嫌別人，先講先贏hò͘？按呢講都著，做頭若做會起，卻會順序，毋過做袂起。做袂起，你抑敢講，彼是你的無道德，無能。著，你按呢講，我感服，是我的無能，無德行。毋過設使有So͘-kek-tí的道德，都也是袂會感化伊的某Chàn-thiap-poê，閣是親像猶大彼款的壞性，雖是有主耶穌神格，也未受感化，況兼我這號無名小卒。姊妹啊！老實來講，夫婦的和好十分七是在佇婦人人。你咧講彼，是屬佇舊時代：丈夫有絕對的權威，閣婦人人有「三從四德，」今你敢有欲守。這滿是講，「男女平等，」平等是好，免得婦女盲從，抑是絕對服從。閣是希望欲建設理想美滿家庭，也這个責任，大部分是佇婦人人身--裡。大約來講，男子有職務的分心，婦人人佇家屋內外的整理，對子女的衣冠，禮儀，料理，是在婦人人手-裡。一暝日是24點鐘，婦人人佇家內約有20點鐘以上；若是查埔人除睏的以外，有關係的時間，才有5，6點鐘久。閣佇食飯鎮上久；飯是婦人人咧設法，按呢丈夫親像人客咧予婦人人請。所以欲做和好的事，十分七是佇婦人人的手佮聲音，面貌；閣生起不和事端，也是十分七是對婦人人。

 

    今請來想：-

  A. 袂和的事故：魔鬼的囝兒袂曉做和好的事；這款人滿心惡毒，滿喙污穢；這號人無愛和平，也袂曉和平。傳教師中，敢有這號份子？卑劣性質的人，無欣慕和好，伊干焦想食，穿，照伊的私慾就歡喜。論到溫柔正經，疼前相體貼的事無咧追逐。普通來講，是學識無平，講話袂投機，勝訴無同，愛，惡，袂合，習慣各樣，生活就精差。山可移，性難改。

  B. 會和的理由：夫婦是一體；有新娘拄娶來彼暝，暗頭有老鼠咧食粟仔，共in丈夫講，老鼠咧食「恁」的粟；到天光就講，老鼠咧偷食「咱」的粟。翁某雖然是兩人猶過是一體。主有講，In無閣做兩个，是做一體(太19：6)，是上帝共恁配合--的，也是你家己有歡喜，有愛的。俗語講，「綴雞飛，綴狗走」；所以媠bái無想，好歹無比，干焦知這个是我的某，這个是我的翁；這句「我的」不止有意思。「家己的家己好，別人的生虱母。」我的毋是我欲管，是我欲疼--的。

  有一人，拄著伊20年前的同窗友，就請伊ê暗去伊厝裡講話，紲看美女；時到果然去，伊就真歡喜，伊的老婦人人也真親切咧款待in丈夫的好友。朋友就拍算是伊有娶細姨，伊就指伊的老牽手講，這个就是，伊知伊的朋友心內咧笑，講面皮都liap落去啦。伊才共伊講，請無奇怪，我講媠，毋是講社會的的媠，也毋是講蓋朋友中的媠，是講我的目睭咧看我的某是上媠。社會中有真濟美女，若是媠是伊咧媠，佇我無關無係。

  閣有一个婦人人，伊的丈夫較散，拄著in老爸咧做生日，in兩个翁某也相chhoā倒去欲共in老爸賀壽。伊就入去內面間，伊的姐夫，妹婿濟。到欲坐桌的時，伊的丈夫人就看毋上目，無叫伊做伙坐。伊也自份佇外面咧趖。有一个粗工捌伊，可憐伊腹肚飫，就貯一碗予伊踞佇灶跤角咧食。伊的某出來看伊無佇桌裡就揣，看伊予人推囥佇灶跤角就受氣，也同情，對伊的翁手牽--咧講，倒來去。願佇咱厝食蕃薯湯，毋願佇灶跤角食白米飯。親像這款的翁某，有同甜同苦的心志，無論拄著甚物款的境遇，決斷有相疼。

  C. 傳教家夫婦應該著和好：台灣舊年中有4,4078件的嫁娶：中間有3949件的離緣。一百人中有9的離緣。翁某袂和，切切chia̍t-chia̍t割離的是按呢。彼號割袂離的猶真濟。按怎會割袂離？因為有的是一爿感覺不圓滿若定；有的是條件袂好勢，有的是年歲已經濟，閣囝兒，金錢咧為難，有的是時代，人佮社會咧制裁，有的是名譽上咧牽制。親像這款的環境，是度日如年。不守道德的人，袂受得艱苦，就隨人去揣同情者。這款的家庭，照看一百人中有三十的以上。

  家庭原來是休憩所，是慰安所。對夫婦的反目，致到變成暗淡生凊，因為無相拄喙，見面頭膨面膨，咬牙切齒的地獄；因為若出聲就是相嚷，相激，相拍。這款的家庭，毋是干焦一般社會的人咧按呢，教會內也無少。親像這款的家庭，甚物人著指導--in，敢毋是咱傳教家mah？傳教家欲按怎指導--in？毋是干焦用話，是著用模範。捌看著丈夫咧拖車，伊的婦人人咧鬥拺。傳教家佇這教會是做全教會的模範者，模範家庭，伊的婦人人，也應該鬥做成模範的家庭，來chhoā眾會友入佇這个模範(卻毋是我的模範，是基督所指示的模範)。傳教家夫婦若和好，傳教者咧傳道就好膽，講話就大聲有力。若無模樣，欲勸人和好，講了會無聲尾，若予人拄著，面會紅，咱著謹慎。(未完)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461