Kám-siā kap Pài-thok
1934. 12, no. 597, pp. 5-6
Kám-siā Siōng-tè ê hông-in, kap chu-uī bo̍k-su, sian-siⁿ, tióng-chip, hiaⁿ-ché ê oān-chō͘. Pè-hoē tī 6, 7, 8, kiōng 3 kò-goe̍h kan, ū phài Khó͘ Chuí-lō͘ Bo̍k-su, kàu tī Lâm-pō͘ 4 Tiong-hoē ê kok kàu-hoē koan-tê pè-hoē ê kiàn-tiok kim. I kàu ta̍k Tiong-hoē, tit-tio̍h ta̍k Tiong-hoē Chû-siān-hoē ê Lí-sū, Bo̍k-su, Tiúⁿ-ló ê àn-nāi, kàu ta̍k só͘-chāi ê kàu-hoē, tit-tio̍h kok-uī Bo̍k-su, Sian-siⁿ, Tióng-chip, hiaⁿ-ché ê toā hoan-gêng, ēng bu̍t-chit ê hō͘-thāi, kap kim-chîⁿ ê oān-chō͘, chin kám-siā. Ū lâng hiān-kau, ū lâng seng siá sin-ji̍p-su, chin to-siā. Chin khó-sioh, uī-tio̍h sî-akn chin té, kap kang-tiâⁿ chin pek, bē-tit thang kàu ta̍k keng ê kàu-hoē pài-hāu, chin uî-hām. Chóng-sī chin hó kai-chài, ū te̍k-pia̍t pài-thok Ko Tok-hêng Bo̍k-su khì koan-tê Pa̍k-iá-teng kap Bān-tan nn̄g-uī Tông-hoē. Tiō Thian-chû Sian-siⁿ kap Gô͘ Tin Tiúⁿ-ló kh3i koan-tê Tâi-lâm-chhī-lāi, chêng pài-hāu bô-tio̍h--ê. uī-tio̍h in 3 uī ê sî-kan kap kang-tiâⁿ chin pek, tī choè-kīn in ē khì pài-hāu. In 3 uī nā kàu, chhiáⁿ chū-uī Bo̍k-su, Sian-siⁿ kap hiaⁿ-ché, chiah te̍k-pia̍t oān-chō͘, sī só͘ pài-thok. Kî-ū--ê, ū ēng phoe khì pài-thok, tiong-kan ū tit-tio̍h kuí-nā uī Sian-siⁿ kap Tióng-chip chin tông-chêng, thè goán siat-hoat, ū-ê í-chêng kià hiān-kim lâi, ū-ê seng kià sin-ji̍p-su lâi, chin kám-siā.
Pè-hoē tī 5 goe̍h 28 hō, í-keng ū chiong kiàn-tiok ê tô͘-bīn, su-iūⁿ-su[sic.] kap hú-khó-goān the̍h-chhut tī koaⁿ-thiaⁿ. àn-sǹg tī 10 goe̍h ē-tit-thang tāng-kang. Chóng-sī bô phah-sǹg koaⁿ-thiaⁿ tī 8 goe̍h 17, kap 28, kiōng nn̄g pái lâi chhek-liōng pài-tn̂g-tē, uī-tio̍h beh kiàn-tiok ê tē, gāi-tio̍h chiong-lâi chhī-khu kái-chèng ê tō-lō͘-soàⁿ. uī-tio̍h án-ni, ēng chē-chē hong-hoat, chia̍p-chia̍p khì Pó-an-khò kap Thô͘-bo̍k-khò kau-sia̍p. Kiat-kio̍k tio̍h koh the̍h-chhut kái-chèng ê tô͘-bīn kap sū-iūⁿ-su (chêng ê tô͘-bīn sī kàu-hoē-tn̂g liân siok-sià; chit-tia̍p ê kái-chèng tô͘-bīn, chiū-sī kàu-hoē-tn̂g hoān kàu-hoē-tn̂g, siok-sià hoān siok-sià, uī-tì piàn-keng, kî-û chiàu-kū). Taⁿ kái-chèng ê tô͘-bīn í-keng the̍h-chhut liáu, tāi-khài tī 11 goe̍h hā-sûn hú-khó ē-tit chhut. (In-uī bān-sū ū kap tong-kio̍k kau-sia̍p liáu). Nā án-ni, koat-tēng tī 12 goe̍h chhe beh tāng-kang. Só͘-í ài te̍k-pia̍t pài-thok chêng ū siá sin-ji̍p-su, chîⁿ-hāng iáu-boē kau ê hiaⁿ-ché, nā ē tit-tio̍h lia̍t-uī jú-kín kià-lâi sī bān-hēng.
Kang-sū tiong, chi̍p-hoē ê tiûⁿ-só͘ ū soè tī Kî-āu kū Hái-chuí-e̍k-tiûⁿ (pài-tn̂g ê keh-piah). Bo̍k-su siok-sià soá tī 高雄市旗後町四丁目四番地 (Kî-āu Phài-chhut-só͘ ê āu-piah).
Choè-āu ài pài-thok liat7-uī, ji̍t-iā thè goán bî-jio̍k ê kàu-hoē kî-tó. ǹg-bāng tuì lia̍t-uī ke̍k-le̍k ê oān-chō͘, kàu-sî ē-thang lâi khí Iâ-hô-hoa ê Sèng-tiān tī Kî-āu chò bān-bîn kî-tó ê chhù.
"Iâ-hô-hoa ah! Goán beh tâng-sim hia̍p-le̍k, tī Kî-āu kiàn-tiok Lí ê Sèng-tiān, lâi kèng-hōng Lí ê Sèng-miâ, kiû Lí siúⁿ-sù khuì-la̍t pang-chān goán kàu chiâⁿ".
Kî-āu Kàu-hoē,
Jīm-chit-hoē pài-khé.
