首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 平埔族
平埔族
卷期：第597卷 本次： 日期：1934/12 刊名：台灣教會公報/芥菜子 頁數：27-29
篇名：平埔族 [ Pîⁿ-po͘-cho̍k ]
作者：柯設偕 Koa Siat-kai
  顯示 : 漢羅 全羅 並列  

平埔族

(柯設偕)

1934。12，no。597，pp。27-29

佇台灣有數萬的平埔族。平埔族是比漢人 (一般所咧講的台灣人) 閣較代先來踮佇台灣。通講，平埔族是正台灣人！一般咧講的台灣人，是比in較後來才對支那搬過來--的。

  咱著注意一項，就是平埔，生蕃，雖然平平是對南洋海嶼彼方面來--的，iáu-kú in (平埔，生蕃)無siāng種族，有不止大各樣佇咧。

  普通一般咧用這兩句「熟蕃，」「生蕃，」實在真無合，真快予人相混亂佮誤解。聽了親像熟蕃 (平埔族)是生蕃變--的的款。其實照現時研究的結果，平埔族，生蕃，不止有各樣，也是無siāng種族。生蕃袂會變做熟蕃 (平埔族)。熟蕃毋是對生蕃變--的。這項咱著了解。

  佇台灣的傳教，佮平埔族不止有密切的關係佇咧。

  三百外年前，荷蘭人來南部，是傳教佇平埔族的中間(彼時佇南部的漢人無外濟)。有設幾若十間的拜堂，也有設神學校，也有翻譯馬太做平埔話。

  三百外年前，西班牙人來北部，也是傳教佇平埔族的中間(彼時佇北部的漢人猶真少)；也有設學堂教示平埔族。

  南部長老教會設教了，無久就傳教佇平埔族的中間。現時也是猶有平埔族的教會，傳教師，信者佇咧。

  北部長老教會設教，起頭是佇Ho̍h-ló，客人的中間，無久也傳教佇平埔族的中間。現時也是猶有平埔族的教會，傳教師，信者佇咧。

  以上所寫遮的，予咱通知，台灣的教會-不論是荷蘭人，西班牙人設--的，抑是南部長老教會，北部長老教會，-佮平埔族，不止有密切的關係佇咧。

  平埔族的教會現時猶有，平埔族的傳教師猶咧出力為主做工，平埔族的信者也是猶真濟。毋若按呢，咱咧用的聖詩的中間，有濟濟好聽的調，是對平埔族的調提來--的。

  有所在的平埔族，後來因為漢人真濟搬--過來，也受漢人的侵佔，經濟上的壓迫等等，失落土地，百姓四散，in的社 (鄉庄)廢無，對按呢遐的教會也四散，實在真可惜。總是毋通悲觀，設使若會閣揣失落的羊閣聚集倚--來，猶原會閣得著，通利益佇教會。

  早時的平埔族，因為開化的程度不及漢人，也經濟力也較輸漢人，所以受壓迫，搬徙，四散，致到in的社無--去，對按呢自然設佇in中間的拜堂有的煞--去。

  荷蘭人，西班牙人佇三百外年前，所設的教會，神學校等，了後無繼續，信者四散，今仔日無--去。總是咱袂會通嫌彼時荷蘭人，西班牙人，in的熱心佮盡力。咱袂會通笑in (荷蘭人，西班牙人)傳教的人。

  何況今仔日的教會，雖然有所在平埔族四散，致到教會減退，信者四散，拜堂廢無，猶過是一部分的事若定，毋是全部按呢。平埔族的拜堂，傳教師，信者，毋是攏總無--去，是繼續存在佇咧。

  咱今仔日傳教佇無論甚物款的百姓的中間，是咧盡咱對上帝所著做的工。設使後擺咱所引chhoā的信者，抑是咱所設的教會四散減退，抑是入別的宗教，拍算佇彼時陣的人若欲嫌咱，這敢有較無公道，也是有較克虧。

  因為傳教的工是在佇咱，彼个結果是在佇上帝！

  咱看平埔族的衰退四散，毋若毋通笑in，反轉著有同情的心才著。

  這霎寫一个實例來做參考。在早佇宜蘭，有平埔族36社。(原本宜蘭平洋，就是遮的36社的平埔族的土地)。偕牧師來北部設教了後無幾年，就佮伊的學生去宜蘭平洋傳教。起頭遐的平埔族真受氣，有的罵，有的趕。後來有一社有歡喜接納。無久就有濟濟社的平埔族歡喜承受道理，也來領受洗禮。

  人自發的欣慕主的福音，信耶穌基督，就欲thài會共in阻止？因為in有信，自然共in行洗禮。現今設使咱傳道理佇生蕃的中間，in若信，也愛欲領受洗禮，拍算嘛是袂會共in阻止才著。所以彼時佇宜蘭平洋的平埔族36社的中間，有設24間的拜堂。(因為in愛in家己的社家己有拜堂，所以有設24間)。也有濟濟平埔來淡水讀神學校，做傳教的工。後來平埔族36社，因為種種的原因，致到平埔族濟濟搬徙去東部，所以in的社濟濟廢棄，自然拜堂也是紲廢無。總是毋是攏總無去。現時平埔族的信者猶有，有的佇宜蘭平洋，有的徙佇東部，也拜堂佇宜蘭平洋猶有成十間，佇東部--的是去東部的拜堂。

  咱袂會通嫌，傳教佇宜蘭平埔族的中間毋好，是袂會通講設拜堂佇in的中間是毋著。不過in的種族四散，致到所設的拜堂有的煞去，這袂會嫌設教的動機佮方法。

  基督的吩咐是欲傳福音佇逐款種族的人的音佇逐款種族的人的中間。文明人通得，野蠻人也通得，上等人通得，下等人也通得。逐款攏有份佇救世的福音。無論甚物人，伊自發的欣慕道理，信耶穌基督，愛主拯救，要求領受洗禮，這欲thài會共伊阻擋啊！

  設使有的in的動機不純，地基無堅固，半路離開，信仰墮落，彼是in個人對上帝的直接的關係。咱是chhoā人來揣基督，捌基督；人若毋擒牢，放拺基督，彼無法度。

  佇現時人領受洗禮，咱袂會徹底知到in的心內的動機(設使有的有不純的動機佇咧來講，咱嘛是袂會知)。不過咱引chhoā人來信主，領受洗禮，咱若是袂會久長保證伊的信仰(卻會共伊指導，總是袂會保證講伊的信仰的確袂變，袂墮落)。

  閣再教會四散，拜堂廢無，毋若是宜蘭的平埔族有按呢，漢人的所在嘛是有。有興起的所在，也有衰退的所在，這是自然的事。

  佇台灣已經信主的平埔族的兄弟姊妹啊！！恁是台灣數萬的平埔族的先覺者！我向望恁猶原會出力佇傳教的工作，佇袂信主數萬的平埔族的中間。也向望讀報的兄姊，對佇平埔族，或是生蕃，會抱閣較同情，閣較理解，閣較疼痛的精神。

  若是關係「平埔族」的希望，消息，感想，抑是其他的事，若會寫來予我做參考，是真歡喜。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461