首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 公告：世界祈禱週
公告：世界祈禱週
卷期：第598卷 本次： 日期：1935/1 刊名：台灣教會公報 頁數：2
篇名：公告：世界祈禱週 [ Kong-kò: Sè-kài Kî-tó Chiu ]
作者：
  顯示 : 漢羅 全羅 並列  

世界共同祈禱週
1935.01，no.598，pp.02-05
今年對1月6－13日，就是世界共同的祈禱週間。若想著佇咱頭前有種種困難的情形，就益發予咱著注意佇這个世界聯合的祈禱會。願全能的主伸出伊的聖手來扶持，將危險變做平安；oh得收拾的危局，成做光明的路關；予天國緊緊實現。要緊眾基督徒，一面著團結來祈禱閣一面著出力宣傳基督的福音。致意請各教會的當局者設法予恁的眾會的當局者設法予恁的眾會友，有份佇這个萬國同心的祈禱會。今將彼个祈禱表排佇下面：－
1月6號：禮拜日
說教的題目
1.信靠(約翰14：1；馬可11：22，24；1提摩太4：10)。
2.團契(1約翰1：3，7；約翰17：21)。
3.奉仕(馬太25：40；28：19，20；24：14)。
4.向望(行傳 26：6；羅馬8：18－25；1帖撒羅尼迦1：3，9，10)。
第7號：拜一
人類的欠缺(反悔)
感謝：
1.因為上帝的大慈悲，替咱人備辦佇現在佮將來所欠缺--的攏齊備。
2.因為上帝已經對耶穌基督做成救贖的事業，紲交託信徒著將這个福音傳報予萬百姓。
認罪：
1.因為咱做信徒，大半攏袂會應付人類的缺欠。
2.因為對咱的私心，驕傲，貧惰，小信，致到阻礙上帝欲做成的旨意。
3.因為對咱的固執，致到袂通顯出誠實的反悔認罪。
懇求：
1.求上帝開人的目睭，感化人的心腸。
2.求上帝賞賜基督徒佮未信者，攏會誠實反悔，紲得著赦免。
3.求上帝賞賜逐个信徒，攏會為著別人的欠缺來掛心。
讀羅馬3：1－26；加拉太5：1－26；詩篇51篇。
第8號：拜二
世界的教會(信仰)
感謝：
1.因為世界的教會，攏有逐國，逐腔口的民族佇teh。
2.因為上帝有施恩佇教會，予in有好的機會佮氣力通干證福音。
3.因為教會，卻有時有軟弱á是無盡忠；總是所傳的福音，猶原「是上帝的權能，欲kiú攏總信的人。」
認罪：
1.因為教會的小信，致到欠冒險進取的精神，通盡傳福音佇通世界的使命。
2.因為教會欠缺謙卑的態度，致到袂會十分表現基督的精神，佮基督的真道佇世界。
懇求：
1.求上帝予教會得著新的覺悟，踮佇耶穌充滿靈性的水源。
2.求上帝予教會較深信上帝的權能，用信心佮順趁的心，來促進上帝國的臨到。
3.求上帝予現代教會得著大氣力的靈性的奮興。
讀行傳 2：1－11；馬太16：13－28；歌羅西1章。
第9號：拜三
世界各國(團契)
感謝：
1.因為有一切的制裁，就予人類免致到過頭放縱。
2.因為逐國，攏有in 家己特別的貢獻佇世界。
認罪：
1.因為國家的顧家己，相僥疑，以及所有自己主張的政策。
2.因為宗教上的度量e̍h-te̍h，以及對言論的自由，佮良心主張的壓迫。
懇求：
1.求上帝予逐國對國際間的團契，佮彼个可能性有新的認識。
2.求上帝予逐國會得著忠實佮聰明的主腦者，通辨理國家佮國際問題。
3.求上帝予逐國得著自由，通將in的見長攏貢獻出來，來建設上帝的國。
讀羅馬12章；以賽亞2章，52章；Bí-ka 4章；啟示錄21：1－7，23－27。
第10號：拜四
世界的基督教化 (服從佮奉仕)
感謝：
1.因為世界的教會，攏知影基督教所辦逐款的事業應該掠「佈道」做中心。
2.因為逐國教會的頭chàng，現時已經有teh差in本國的先生去四界傳福音。
3.因為逐國的教會，對佇自養自傳的事，攏有大進展。
認罪：
1.因為濟濟基督徒，in的所觀察是真e̍h-te̍h。
2.因為教會大家有大忽略佇對一般未信的人所欠缺--的。
3.因為咱過頭倚靠物質，紲無十分信靠上帝的大氣力。
懇求：
1.求上帝予逐个基督徒攏明白in本身，就是一个傳福音--的；又閣見若佮別人接觸的時，就是佈道的機會。
2.求上帝予逐教會，會感覺in夠額有氣力通應付現代靈性的欠缺。
讀馬可16章；以賽亞61章；行傳 1：1－11.
第11號：拜-五
家庭，主日學，青年會，學校
感謝：
1.因為基督徒的家庭，主日學，青年會，學校，以及種種的活動，攏有為著囡仔佮青年人來圖謀靈性的幸福。
2.因為近代的青年，不止有熱烈新的精神佇teh。
認罪：
1.因為教會，猶未將為著教會奉仕的位置，交予青年人。
2.因為家庭，主日學，青年會，學校，攏猶未會盡in對宗教教育最高的天職。
懇求：
1.求上帝予現代的青年倚靠基督，對上帝有深切的信仰。
2.求上帝予佇學校，青年會，主日學teh做工--的，以及家庭的序大，會十分gâu用in的機會，佮明白in應該盡的責任。
3.求上帝引chhoā青年人會曉用伊的熱心佇正當的事業上。
讀1 撒母耳 3章；約-ní 2：18─32；1約翰2：1─17。
第12號：拜六
基督徒對猶太人的責任以及較無開化民族的工作
感謝：
1.因為佇逐所在的猶太人，已經漸漸加添反悔信主耶穌。
2.因為佇較無開化的民族，多數加入基督教。
3.因為基督教的國家的主腦者，對佇無論甚物國內彼號較少人口的民族，in的幸福，有特別teh注意。
認罪：
1.因為佇真濟基督教國內，竟然發生反對猶太人運動的不幸事件。
2.因為對佇受壓迫佮受歹款待逐款民族的欠缺，基督徒袂會及時應付--in。
懇求：
1.求上帝予基督徒，對佇受壓迫佮困苦的百姓的欠缺，有較敏捷的感覺。
2.求上帝予基督徒，有耶穌基督彼款新的觀察：因為耶穌對人，攏無有男女，國家，人種，階級的分別，攏一律歡迎；也無用外貌取人。
讀羅馬11章：1哥林多1：18─31；啟示錄7：9─17。
第13號：禮拜日
請傳教者佇本日用「基督徒合一」(翰 17：21)，做題說教。
若會通舉行佮別教會聯合禮拜，是真好。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461