Tiong Tiong Thong-sìn

II. Chháu-tun Kàu-hoē, Chheng-liân-hoē kang-chok-koa

1935.03 tē 600 koàn, p.19-20

(Loā Kang)

1.Chóng-hoē ê sî ū gī-koat,

Beh hō͘ chheng-liân khah hoa̍t-phoat;

Thê-chhiòng chheng-liân o̍h ián-soat,

Tāi-ke ē tit kheh hùn-hoat.

2.Chi̍t goe̍h chi̍t pái ê káng-ián,

Chi̍t cho͘ saⁿ miâ teh thoàn-liān;

Tê ba̍k suî-lâng ka-kī soán,

Thèng-chiòng thiaⁿ liáu lóng bē siān.

3.Bo̍k-su chò goán ê kò͘-būn,

Hó pháiⁿ kong-jiân kā phêng-lūn;

Tê-ba̍k kóng liáu nā-sī hó,

Tâng-chiòng khí-lâi kā o-ló.

4.Hoē-oân cho͘-chit Pò͘-tō-tuī,

Soan-thoân Hok-im tī ta̍k-uī;

Pún-chng só͘ ū ê koán lāi,

Pò-iông tō-lí hông chiâu chai.

5.Hiān-sî ta̍k-uī chin hi-bāng,

ài goán tāi-ke khì hia káng;

Thè goán siat-pī hó só͘-chāi,

iū-koh hó-lé lâi chiau-thāi.

6.Káng-oah5 tāi-ke chin ài kóng,

uī Chú chò kang m̄-kiaⁿ gōng;

Suī-jiân Sin-sū lâi teh thiaⁿ,

Hó-táⁿ soan-thoân lóng bô kiaⁿ.

7.Cho͘-chit chi̍t thoân kiōng gō͘ miâ,

Khì kàu Tek-lâm kóng-hông thiaⁿ;

Pō͘-tiúⁿ pún-ku sī Tek-lâm,

ài goán khì hia chò Chú kang.

8.Hū-kīn Thâu-hūn ū kàu-hoē,

Tāi-ke ū khì kā sio-chhoē,

Thoân-tō sian-seⁿ lâi pang-chān,

Tāi-seng thè goán lâi siāu-kài.

9.Goán chiū lûn-liû khí-lâi káng,

Tāi-ke thiaⁿ liáu chin hi-bāng;

Thiaⁿ kàu chin àm bē tuh-ku,

Kóng sī chhian-cháiⁿ ê it-gū.

10.Put-châi kán-tan siá chiah--ê,

In-uī choá-bīn ê koan-hē;

Kî-kiû Sèng Sîn lâi pan-chān,

Hō͘ goán só͘ chò bô khang-khang.