浪蕩子
1901.01 190卷 p.8
(接前卷第96面。)
過十幾日美麗接著批就是李約翰寄來ê。批內有3箍ê銀票。魏老爺將批讀hō͘ 伊聽講，李約翰到倫敦城in 叔接納好款待，hō͘ 伊toà tī 店內幫手。伊有戒酒守禮拜也倚靠救主決意做好人。Koh講in叔有朋友是做教師。約翰將多馬ê事講hō͘ 伊聽。伊應允講，的確著用心chhoē伊到著。
美麗聽了有歡喜到bē顧得。魏老爺講，你想hit個人是靠得主mah？是不錯。心內暗靜想上帝用美麗幾句話去救hit 個人，是真奇怪。Koh想hit個乞食受伊感動得救，我為著甚物 iáu-kú boē歸服上帝來得救？
Hit日ē晡魏老爺騎馬出去行thô。Hit隻馬忽然驚著跑走，魏老爺跋落馬cheng著樹根。就烏暗眩。馬跑走，魏老爺續暈去tiàm-hia睏一點鐘久。Tú著人拖車對hia過，一下看見，會認得是魏老爺，就輕輕āiⁿ伊上車，趕緊載到in兜。醫生來看講，三條筋扑裂，頭殼也有受傷；m̄ 知會害bē。美麗聽見了就啼哭beh入去舅爺ê房間，總是醫生m̄ 准伊。講，蓋要緊著安靜，bē堪tit囡仔吵，聽候老爺較好才thang入去。
過十幾日老爺果然較好就准美麗入去，kan-ta 教伊m̄-thang講濟話，美麗歡喜到極帶一包物入去，勻勻行到床邊看見魏老爺面貌不止消瘦，頭殼包一條白巾。
（後卷beh koh接。） |
