Sòng Bo̍k-su-niû
1901.02 191 koàn p.9-10
Sin-le̍k chiaⁿ-goe̍h 17 hō, Sòng-Sian-siⁿ-niû tī Tâi-lâm-siâⁿ Sin-lâu koè-óng.

Sòng Sian-siⁿ-niû sìⁿ Christie, miâ I-lī-sa-pek; chhut-sì tī So͘-kek-lân Kai-loē-su siâⁿ. I tiàm-tī Chó͘-ke ū tha̍k-chheh, o̍h i-seng, chìn-miâ, chhin-chhiūⁿ kî-û hia-ê i-seng; nā beh toà hit-pêng hêng-i khiok ē kham-tit. Chóng-sī in-uī í-keng phoè Sòng Bo̍k-su tiaⁿ-tio̍h, só͘-í tio̍h toè i koè-lâi Tâi-oân. Kàu 1892 nî tiàm-tī Hiong-káng ha̍p-hun, āu-lâi kàu Tâi-lâm siâⁿ.
Hit-tia̍p o̍h Tâi-oân oē chiū khoài chìn-tek, bô loā-kú chiū chhut chháu-tē khì chhoē chí-moē, ū-sî chham Sòng Sian-siⁿ chò-hoé khì, ū sî ka-tī toà tī pài-tn̂g. Hit-sî i só͘ chò ê kang, hêng-i, pun-io̍h, kiù lâng ê sìⁿ-miā, goán tī-chia m̄-bián kóng, lín chèng-lâng í-keng lóng chai.
āu-lâi chē-chē lâng gī-lūn eng-kai tio̍h siat chi̍t keng Lú-i-koán hō͘ Sian-siⁿ-niû hoāⁿ sī khah hó; i iā kam-goān tam-tng, Chó͘-ke ê Kong-hoē iā chún. Chit-keng khiok siat iáu-boē chiâⁿ, in-uī só͘-chāi bā iáu-boē hó-sè. Chóng-sī tuì án-ni bô hō͘ i-koán kang-tiâⁿ pa̍k--teh, chiū khah ū êng thang sì-kè khì hō͘ lâng chhiáⁿ kàu in-ê chhù. Só͘-í siâⁿ-lāi-goā ê lâng chē-chē bat i, sī lâng siông-siông lâi teh chhiáⁿ i.
Tī 11 goe̍h-kan i kap i saⁿ-ê kiáⁿ khì Ba̍k-sa, hit-sî Bo̍k-su bē-tit kap i khì. Tī-hia jiám-tio̍h pīⁿ, chiàⁿ koh tò-tńg-lâi. I-ê sin-thé chiām-chiām lám, in-uī mi̍h chia̍h bē tiâu pak, siông-siông ài thò͘, hit-sî tó-lo̍h chhn̂g, bô koh peh--khí-lâi. Ū chhiáⁿ An I-seng lâi khoàⁿ, iū-koh chhiáⁿ Ji̍t-pún ê I-seng Tiok-san Sian-siⁿ lâi chham-siâng. Tāi-ke ēng ta̍k-hāng hó hoat-tō͘ lâi tio̍h-boâ, chóng-sī bô hoat--i. Tī pài-sì ê-hng la̍k tiám cheng khuì tn̄g, lī-khui sè-kan.
āu-lâi hiaⁿ-tī chí-moē chai siau-sit, thiaⁿ-liáu chin gông-ngia̍h ê khoán-sit, tāi-ke chin iu-būn hoân-ló, cháu-lâi māi i, khoàⁿ-liáu bē kìm-tit siong-sim lâu ba̍k-sái; iā ū chē-chē lâng hoaⁿ-hí sàng hoe-khoân, hoe-nâ, chhái, te̍k, hit-hō ê mi̍h.
Pài-la̍k ē-po͘ n̄g tiám cheng chhut-soaⁿ. Tī lâu-téng iā tī Tiong-o̍h lé-pài, hit-sî Lâu Bo̍k-su iā tī-teh. āu-lâi chhut-chòng kàu pak-mn̂g-goā ê kong-thióng, ū chin-chē lâng sàng; chiông-tiong iā ū kàu-hoē-goā ê lâng koāⁿ-mi̍h lâi sàng-chòng, piáu-bêng kám-in ê sim. In-uī siâⁿ-lāi-goā ê peh-sìⁿ chē-chē bat i, só͘-í ū lâng gī-lūn tio̍h ûn-ke hō͘ chèng-lâng chai, chhin-chhiūⁿ kap lâng saⁿ-sî ê khoán-sit; Sòng Bo̍k-su iā chún. Tuì ke-lō͘ koè, pông-piⁿ ê lâng lóng chai-iáⁿ sī sím-mi̍h tāi-chì, si̍t-chāi thang hoân-ló, in-uī bô thang koh tit-tio̍h Sian-siⁿ-niû ê hó khoán-thāi. Kàu bōng-po͘ tī-hia koh-chài lé-pài, chiàⁿ tò--khì.
Sian-siⁿ-niû ê hoè-siū 34 hoè. I-ê pē-bó iáu tī-teh. Khiok bô chí-moē, ū saⁿ ê sió-tī, lóng sī ha̍k-si̍p i-hoat, n̄g-ê í-keng chò i-seng, chi̍t-ê iáu-kú teh tha̍k-chheh.
Lâng tú-tio̍h chit-hō tāi-chì éng ài mn̄g siáⁿ-sū tio̍h án-ni. In-uī i iáu-kú siàu-liân, iā hán-tit phoà-pīⁿ, ta̍k lâng teh ǹg-bāng i thang toà tī lán ê tiong-kan chē-chē nî, toā-toā lī-ek kan-khó͘ lâng. Chóng-sī chit-hō tāi-chì lán bē-tit-thang chheh-to̍k; Siōng-tè só͘ chò lán chit-tia̍p m̄-chai, āu-lâi ē chai. Khah iàu-kín sī ta̍k-lâng tio̍h siū bián-lē, ji̍t--sî chò lán ê Pē ê kang, mî kàu chiū bô sím-mi̍h thang chò. Soà khó͘-khǹg lán ê chí-moē tio̍h o̍h i-ê bô͘-iūⁿ, chiàu in só͘ ē lâi chīn pún-hūn. Sui-jiân bē-tit-thang ta̍k-lâng chhin-chhiūⁿ i tha̍k-chheh, bat i-tō, m̄-kú lán nā chiàu Siōng-tè só͘ hō͘ lán ê châi-tiāu khì ho̍k-sāi, chiū kàu boa̍t-ji̍t thang hō͘ I o-ló kóng, Hó ah, lô͘-po̍k tiong-hō͘ ah, thang ji̍p lí-ê Chú ê khoài-lo̍k.