Chú-ji̍t-o̍h Kì-liām Lé-pài
(Tân Kong-hui)
1937.01 Tē 622 hō p.6
Ki-tok-kàu ê cheng-sîn sī sím-mi̍h? Iâ-so͘ Ki-tok sī sím-mi̍h in-toaⁿ lîm-kàu? Che ta̍k ê īⁿ-kháu tông-im lóng sêng-jīn ū hō͘ lâng thoat-lī choē, beh chhoā lâng kap Siōng-tè koh hô ê Kiù-chú. Chóng-sī goá teh siūⁿ án-ni, kiaⁿ-liáu khah bô kàu-gia̍h. Ū chiah ê thian-chin lān-bān chhut-sì to sī Siōng-tè ê kiáⁿ, siāng ū chu-keh thang ji̍p Siōng-tè ê kok ê sè-hàn pêng-iú, beh pó-hō͘ in, beh kà-sī in, bô beh hō͘ in ê chi̍t ê tì-kàu pìⁿ-chò choē-jîn, che chiàⁿ sī Ki-tok-kàu ê cheng-sîn.
Bô ū sî-kan, tiûⁿ-só͘ ê chó͘-tòng, nî-nî put-liông siàu-liân ti̍t-ti̍t chhut, che sím-mi̍h in-toaⁿ, ū loā phah-piàⁿ teh thoân sià-choē ê tō-lí. Chóng-sī choējîn toè-āu ti̍t-ti̍t chhut, ū cheng-tò͘, ū jiáu-loān...... Che kiám m̄-sī kà-sī lán kan-ta kóng tio̍h tû-khì choē, tio̍h chín-kiù choē-jîn, tī kin-pún hit ê iáu-boē bak-tio̍h choē ê sî, bô si̍t-chāi ê koan-sim, í-ki̍p bô chek-ke̍k ê poê-iúⁿ ê bô-hāu. Kin-pún--ê bô chò, kan-ta tì-ì tī boé-liu, si̍t-chāi bē thang khoàⁿ-kìⁿ hāu-kó. Tī ta̍k ê sè-kiáⁿ nā kó-jiân ū chin-chiàⁿ bat kàu in toā-hàn ê sî, in ê seng-oa̍h, si̍t-chāi thang sióng-siōng hit ê suí beh kàu cháiⁿ-iūⁿ. Lia̍t-uī, mi̍h phoà-khì chiah beh lâi siu-lí, á-sī tio̍h tî-hông hō͘ i bē phoà-khì. Í-keng hoān-choē chiah beh tû, m̄-ta̍t-tio̍h tī hit ê iáu-boē ê tāi-seng, ū chin-chiàⁿ ê koan-sim. Láu-si̍t kóng, lán Ki-tok-kàu beh tit-tio̍h sèng-lī, eng-kai tio̍h tī jî-tông ê toā hoat-kiàn.
Bat tha̍k-tio̍h chi̍t ê teh phì-jū kin-á-ji̍t ê kàu-hoē ê kì-sū. Khoàⁿ-kìⁿ tuì soaⁿ-téng poa̍h chuì-hàn lo̍h-lâi, chiū soan-thoân kìm-chiú; ū chha̍t liàn-lo̍h-lâi, kóng tio̍h siat hêng-bū-só͘; ū phoà-pēⁿ lâng poa̍h-lo̍h-lâi, tio̍h siat pēⁿ-īⁿ; sī toā bô-êng tī siu-lí, thiām chîⁿ tī chit ê siau-ke̍k ê kang. Koh kóng, in thái ē m̄ gia̍h-thâu chhòng chi̍t ê siám-pī, kiám-chhái uî-chhiûⁿ lâi hō͘ bô hit téng hō ê thang liàn lo̍h-lâi. Lán chai lán ê tō-lí m̄-sī kan-ta beh siu-lí hiah ê ū khiah ê, sī beh pó-choân kàu mài ū mâu-pēng chò siāng iàu-kín. Ū lâng chheng Iâ-so͘ sī hó ê i-seng, si̍t-chāi put-chí sek-tòng, in-uī hó ê i-seng m̄-sī kan-ta i-hó lâng ê pēⁿ, sī tî-hông i bô tì-kàn[sic] phoà-pēⁿ, sī ta̍k-hāng chìn-pō͘ ê kin-á-ji̍t só͘ iau-kiû ê.
Iông-ún sè-kiáⁿ chiū-kīn goá...... (Má-khó 10：14). Iâ-so͘ chin-chiàⁿ sī gín-á ê hoat-kiàn-chiá. Tng-sî Hi-lia̍p sī bûn-hoà-tē, iáu-kú i ê hoat-lu̍t ū chi̍t tiâu kóng, "Nā-sī seⁿ cha-bó͘ gín-á m̄-ài chhī, beh hìⁿ-sak bô iàu-kín." Tī chit khoán ê sî-tāi, Iâ-so͘ kóng 'iông-ún sè-kiáⁿ chiū-kīn goá' 'Nā bô chhin-chhiūⁿ sè-kiáⁿ ê, bē thang ji̍p Siōng-tè ê kok,' hoat-kiàn sè-kiáⁿ, khoàⁿ-tiōng sè-kiáⁿ kàu án-ni. Hán-tit bô hoaⁿ-hí ê Iâ-so͘, tng tī ha̍k-seng teh kìm gín-á m̄-thang chiū-kīn I ê sî, Sèng-keng kóng Iâ-so͘ toā bô hoaⁿ-hí, in-uī Iâ-so͘ ê thiàⁿ tī-hia, Iâ-so͘ hoat-kiàn gín-á ê kè-ta̍t kàu tī-hia. Kin-á-ji̍t chē chē lâng iōng toā-lâng, eng-hiông teh kà-sī, ū Ná-pho-lûn, Nái-bo̍k, Tong-hiong chiah ê chiong-kun, chóng-sī Iâ-so͘ m̄-sī. I kiò toā-lâng kóng, lín nā bô chhin-chhiūⁿ chit hō gín-á; lāu-toā-lâng ah, lín tio̍h chhin-chhiūⁿ sè-kiáⁿ; chò lāu-pē ê ah, lí tio̍h o̍h lí ê kiáⁿ. Só͘-í tī chit ê Chú-ji̍t-o̍h ê kì-liām-ji̍t, goān lán tāi-ke koh chi̍t-pái lâi siūⁿ chiah ê sè-kiáⁿ, beh koh-khah chhut-la̍t tī in, beh koh-khah koan-sim tī in, ǹg-bāng tī chiah ê sè-kiáⁿ tióng-sêng ê ji̍t, Siōng-tè ê kok beh si̍t-hiān tī in ê tiong-kan.
Bat tha̍k-tio̍h Eng-kok bó͘ chhī ê kong-hn̂g-lāi, ū chi̍t ê Iâ-so͘ ê tang-siōng. Tī chiàⁿ-pêng ū chi̍t ê cha-bó͘ gín-ná, chhiú the̍h chi̍t luí pek-ha̍p-hoe beh hō͘ Iâ-so͘, iā Iâ-so͘ chhiú hoāⁿ tī i ê thâu-khak téng, koh kap i teh chhiò. Tī tò-pêng ū chi̍t ê ta-po͘ gín-á, siang-chhiú tuì Iâ-so͘ ê chhiú kā giú-teh, lia̍h Iâ-so͘ kim-kim-khoàⁿ. Koh chi̍t ê khah sè-hàn--ê, chiong Iâ-so͘ ê kha-poâⁿ chò chím-thâu teh khin-sang hó-khùn. Iâ-so͘ ê thiàⁿ-sioh, tī chit-ê ū toā piáu-hiān.
Gín-á si̍t-chāi sī toā-lâng chiàu-kò͘, poê-iúⁿ--ê, ū iáⁿ chin thang kā i kiong-hí, chóng-sī chi̍t-bīn gín-á si̍t-chāi chin khó-lîn. I ê hoa̍t-phoat bô tàng hoat-hui, bô tú-hó ê só͘-chāi thang thit-thô, koh sńg-liáu seng-khu nā lah-sap, chiū siū mē, ū sî siū phah. Tī hoé-chhia-lāi kiám ū khah kē ê í-á, peh lâu-thui mā tio̍h hoa̍h toā-lâng ê kha-pō͘, beh chia̍h-pn̄g ū loā-chē kháu-chàu pī-pān te̍k-pia̍t ê í-toh, nā bô, sī chhin-chhiūⁿ beh tiàu ām. Gín-á kiám m̄-sī bûn-hoà ê tiong-kè-chiá, siat-sú ū chit sî-tāi ê gín-á lóng bô chi̍t ê siū kàu-ióng, kiám m̄-sī hi-seng koè-khì só͘ kiat-chiâⁿ ê bûn-hoà, kiaⁿ-liáu chek-sî pìⁿ-chò goân-sí sî-tāi.
Siōng-tè ê kiáⁿ ê chiah ê sè-kiáⁿ, kiám bô ū koân-lī thang hióng-siū khah koan-sim ê kàu-io̍k. Kin-á-ji̍t chē-chē Chú-ji̍t-o̍h, ah, he hū-jîn-lâng ê sū, siàu-liân lâng ê tāi-chì, tiúⁿ-ló, chip-sū bô teh chhap, kiám-chhái iā ū thoân-kàu-chiá kóng, lán iáu pa̍t hāng kang. Chóng-sī Iâ-so͘ khoàⁿ-tiōng sè-kiáⁿ kàu án-ni......
Sím-mi̍h sī hó ê thó͘-tē? Tuì sim-lí-ha̍k-chiá ê hoat-piáu só͘ chai-iáⁿ, gín-á kàu chhit, peh hoè ê tiong-kan só͘ thiaⁿ-kìⁿ, só͘ khoàⁿ-kìⁿ ê put-chí ū kì-ek, jú ū hoè, i só͘ tit ê pí-kàu-tek khah su. Iâ-so͘ iā-chéng ê phì-jū lâi èng-iōng tī-chia, chiū-sī gín-á ê sim-koaⁿ chiàⁿ-chiàⁿ sī hó ê thó͘-tē, ū-iáⁿ toā-lâng lâi tit-tio̍h tō-lí ê bē chió, m̄-kú kî-si̍t iā chin chió. Goā-chē lâng teh pò͘-tō, hāu-kó chin sió-khoá, koh khah-siông bē thang kàu tī chin ê hoán-hoé, tú-tio̍h chhì-liān chiū seⁿ-khí gî-ngái. Hoán-bīn tuì sè-hàn chiū bat tō-lí ê, kiám-chhái ū-sî siū ín-iú, iáu-kú chiâm-chāi ì-sek beh phû-khí-lâi, chhin-chhiūⁿ ū chi̍t ê sian-seⁿ kóng Ki-tok-kàu-tek ê kái-sim, sī tuì chiâm-chāi ì-sek. Lán kiám-m̄ chhut-la̍t tī chit hō hó ê thó͘-tē ê kang-tiâⁿ.
Á-sī lán koh siūⁿ sìn-tô͘ sī chò ê, á-sī tióng-sêng ê. Lán kiám ē siūⁿ tit chi̍t pái ê soat-kàu chiū ē thang chō-chhut chi̍t ê sìn-tô͘. Lán Lâm-pō͘ Kàu-hoē téng-ē-po͘ ê chū-chi̍p, á-sī pò͘-tō, ē thang khoàⁿ-kìⁿ ke-thiⁿ loā-chē sin ê hoē-iú. Lâng sī tuì gín-á, chheng-liân, chòng-liân tī sin-thé, tī cheng-sîn teh seng-tióng. Thian-chin lān-bān ê gín-á, in ê pún-lêng-tek í-keng sī Siōng-tè ê kiáⁿ ê, kiám m̄ eng-kai kap jio̍k-thé pêⁿ-pêⁿ beh chiām-chiām chiâⁿ-chò suí ê Ki-tok-tô͘.
Gín-ná tī siā-hoē sī siāng nńg-chiáⁿ ê, siāng pit-iàu lâng ê pang-chān ê, iā sī siāng ū chiong-lâi ê ǹg-bāng ê. Chhut-miâ ê soat-kàu-ka ブルツクス kóng, "Pang-chān gín-á ê, chiū-sī pang-chān jîn-luī, nā bô tī gín-á ê sî lâi pang-chān, bô ū sím-mi̍h khah tú-hó ê ki-hoē thang pang-chān jîn-luī." Iâ-so͘ kóng, "Chiap-la̍p chì bî-sè ê, chiū-sī chiap-la̍p Goá." Lán bô m̄ thiàⁿ Iâ-so͘, bô m̄ thiàⁿ jîn-luī só͘-í tī sè-kiáⁿ ê koan-sim sī lán tuì Siōng-chú î-it ê chīn-tiong. Goá tiāⁿ-tiāⁿ siūⁿ, lán teh kiû Siōng-tè ê kok lîm-kàu, m̄-kú siat-sú ta̍k ji̍t chhin-chhiūⁿ Gō͘-sûn-cheh, 3000 lâng lâi hoán-hoé, iáu-kú muí-ji̍t chha-put-to 150 bān (chiàu lâng hoat-piáu ê choân sè-kài ê thóng-kè) teh chhut-sì ê gín-á, kàu bān-bān nî kiám m̄-sī iû-goân bē thang si̍t-hiān. Chhut-miâ ê Sian-seⁿ ベソチヤミソキード kóng, "Nā kan-ta koan-sim tī sè-kiáⁿ, m̄-bián chi̍t sè-kí ē thang si̍t-hiān sin ê thiⁿ sin ê sim." Iâ-so͘ kóng nā bô chhin-chhiūⁿ sè-kiáⁿ--ê bē-ē ji̍p Siōng-tè ê kok, si̍t-chāi in sī thian-kok ê tē-it iàu-sò͘, kan-ta toā-lâng ê kàu-hoē bē kè-sio̍k. Kin-á-ji̍t ê kok-bîn kàu-io̍k chin tì-ì, iōng gī-bū ê teh poê-iúⁿ tē-jī tāi ê kok-bîn. Nā kan-ta tiàu toā-lâng lâi tha̍k, m̄-chai ē àn-choáⁿ ho͘N2?
Lán khoàⁿ-tio̍h sè-kiáⁿ bô m̄ kó͘-chui, in sī thiàⁿ ê hoà-sin, chheng-pe̍h ê ài tī in ê sim-lāi, chit khoán ê thang thiàⁿ, choè kīn tī in sī thiàⁿ ê hoà-sin, chheng-pe̍h ê ài tī in ê sim-lāi, chit khoán ê thang thiàⁿ, choè kīn tī Siōng-tè ê sûn-choân ê, in-uī Siōng-tè thiàⁿ in, lán iû-goân beh chiàu-kò͘ in. Iâ-so͘ kóng, Kìⁿ-nā hō͘ chì-bî-sè ê chi̍t-ê siū that-gāi, lêng-khó͘ ēng toā chio̍h-bō lâi tiàu tī ām-kún lâi thiām tī chhim-hái. ēng toā chio̍h-bō lâi thiām-lo̍h chhim-hái, sī tng-sî Hi-lia̍p só͘ ēng ke̍k tāng hoān-lâng ê hêng-hoa̍t, Iâ-so͘ khoàⁿ that-gāi chì bî-sè ê chi̍t-ê sī kap che siāng khoán. Iâ-so͘ koh kóng, Kan-ta ēng chi̍t poe léng-chuí hō͘ chiah ê sè-kiáⁿ ê chi̍t-ê lim ê, koat-toàn boē sit-lo̍h i ê siúⁿ (Má-thài 10: 42). Goān lán tāi-ke ēng toā chio̍h-bō chò kàm-kài, koh ē kì-tit sī chiap-la̍p-tio̍h Iâ-so͘, tī lán ta̍k lâng ū koh chi̍t-hoan tuì jî-tông ê chong-kàu kàu-io̍k, lâi ka-poē í-siōng ê chhut-la̍t, sī sim só͘ goān.
