首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 兩个賊釘十字架
兩个賊釘十字架
卷期：第622號 本次： 日期：1937/1 刊名：台灣教會公報 頁數：9
篇名：兩个賊釘十字架 [ Nn̄g ê chha̍t tèng Sip-jī-kè ]
作者：
  顯示 : 漢羅 全羅 並列  

兩个賊釘十字架

(路加23：43)

1937.01    第622號p.9

 

(這篇是沈Gē-tun先生佇東門說教--的；記者得著伊的允准，就印佇遮)。

咱做信基督的人常常著會記得，常常著來三思。論基督的十字架，因為這是上帝所欲用來救咱人的法度。這是咱的福音的中心點。這若是無影，咱人著失望，因為無路通得著救。總是感謝上帝有路，就咱毋免驚欲過頭來研究基督的十字架的意義，因為意思那想，那深。

  今早起所愛欲想--的，就是咱的主基督耶穌佮遐的兩个賊佇十字架的時，所講的話(讀路加23：39－43)。咱佇遮有耶穌佇十字架頂的時，所講7句話中間是第二个。第一--的是(路加23：34)，「爸啊，赦免in；因為in所做的in毋知」。

  猶有5句話：－

(1)    約翰18：27，「老母啊！看你的囝」，「看你的老母」！

(2)    馬太27：46，「我的上帝我的上帝！啥事放離我」！

(3)    約翰19：28，我喙焦」。

(4)    約翰19：30，「事明白啦」！

(5)    路加23：46，「爸啊，我的神交代你的手」！

  今早起咱通干焦來想，論對賊所講第二句話－ 「今仔日你欲佮我到樂園」。

有人捌講耶穌基督對天落來出世佇罪人的中間，常常愛除去罪人的苦楚，致到人罵伊，講伊是歹人，罪人的伴；也閣佇極路尾佮兩个犯人同釘佇十字架，拄拄佇in中間。按呢生對頭到尾，攏是佮罪人同受苦，佮in相佮死，愛欲救--in。

總是有一項是非常真要緊--的，就是耶穌釘佇十字架的大理由。彼个較大的原因：－

I. 啥事耶穌著死佇十字架？啥事伊甘願拄著伊所知欲來無公道的審判，侮慢，予鞭拍，棄拺，釘死佇柴裡，彼身，p遐8死？啥事無欲走？啥事袂免得拄著世間人中第一重的苦楚？啥事按呢？咱著常常會記得。設使耶穌有講，「我毋是上帝所揀選的做基督，做理想的王，做萬主的主；我毋是上帝獨一的囝，我毋是猶太人真久所聽候完全的王，是欲設立上帝的國--的」。設使伊有講我毋是彼號，的確伊毋免死十字架。所以我毋是上帝獨一的囝，我毋是猶太人真久所聽候完全的王，是欲設入上帝的國--的」。設使伊毋免死佇十字架。所以耶穌死佇十字架的大原因，是因為伊算家己佮創造宇宙的上帝平等；做萬權能--的，做所欲審判咱逐人--的，做上帝成做人。猶太人的公會咧審判伊的時，in有問伊講「你若是基督，著共阮講」，讀路加22：67－。到總督的面前也是按呢，百姓攏告伊講(路加23：13)。閣耶穌釘佇十字架的時，所愛欲褻瀆的也是按呢(路加23：，35 ：6，7，8，9 )。按呢生咱著明明知耶穌的罪，就是掠家己做理想的王，做萬權能--的，做上帝所揀選做完全的王，做永遠佇咧的基督。伊若無家己做基督，就毋免拄著罪人最第一重的刑罰。自然設使彼時遐的人有信伊的話，信伊是萬權能的上帝獨一的囝，佮上帝平等。設使人有聽伊所講的道理，閣聽伊的話，論家己實在的性質，論伊本身是甚物款的－伊毋免死佇十字架。所以通講耶穌死佇十字架較大的因端，是人的硬心，真驕傲，無欲信這个人通做遐爾好--的，通做遐大權能--的。

II. 啥事賊來信？總是今-早起我所愛咱大家來研究--的，就是啥事這个賊釘佇柴裡，咧欲死的時陣，有信耶穌，講「耶穌啊，你佇你的國來的時，著記得我」。這是非常奇怪的事啦！各个公會佮總督無欲信伊。伊的學生攏有走去了了。閣後日學生有講「阮平素咧向望伊，就是彼个欲贖回以色列--的」(路加24：21)。閣聖經是講(路加24：17)，「in就徛咧，面帶憂容」；對按呢通知耶穌的學生攏失志，無向望，攏失落in的信心，(信仰)。按呢生啥事干焦這个賊nā-tiāⁿ，拄拄佇欲死佇十字架的時，有來信耶穌做天國的王。照目睭前的事來看，無偌久耶穌的死，攏輸，攏無權能；閣這个犯人隨時欲死，無向望。按呢生來共耶穌講「你佇你的國來的時，著記得我」，死的耶穌有國，無？按怎樣會利益死的犯人？這是真大奧妙，總是毋是攏暗暗的問題。

這犯人捌看耶穌做神蹟，抑是捌聽伊講道理，抑無？咱攏毋知影，攏無寫佇聖經。有人咧想伊是巴拉巴，遐的佇城內作亂，閣刣死人的黨的一个，總是咱無甚物證據。咱所知--的，就是耶穌佮遮的兩犯人攏相佮夯本身的十字架來出衙門。出來了，遐的犯人不止有機會通看耶穌所經過的情形。In的目睭捌看見主行十字架路的款；in的耳空捌聽見主對耶路撒冷的婦人人所講--的，佮主所替對敵祈禱--的(路加23：27－31；23：34)。

的確所講「爸啊，赦免in，因為in所做的in毋知」－為著對敵祈禱上帝疼對敵到死；彼款的話，有非常大感動力佇咧。總是毋但按呢nā-tiāⁿ，伊有閣看見耶穌的情形，看見伊的面，看見伊的吞忍佮安心。對按呢伊知這毋是犯人，這毋是平常人；佮伊本身抑是伊的同伴來比，無相siāng。伊咧想我佮彼爿的賊實在有罪，總是這耶穌真各樣，所以有講。。(路加23：41)。對老實來想，老實講伊有認伊家己做毋著，做罪人；閣聽見真濟人暝耶穌做過的基督－伊有斟酌看耶穌威儀，親像王的款，看伊的安心佮伊疼怨恨伊的人的態度－按呢就信伊毋是假--的，這是真的基督，這是人以上--的，這是萬權能--的，這是欲憐憫人，欲救人--的。按呢就真謙卑，認伊的毋著。閣講，「你佇你的國來的時，著記得我」。是干焦「記得我」nā-tiāⁿ。伊毋敢求赦免，毋敢講「著記得我」。伊信耶穌有真大功勞，就干焦記得伊，才有大功效。

按呢生咱大家來得著救，干焦欠兩項(羅馬10：9)。

(1)    謙卑閣老實來認家己的毋著，認家己做大欠缺的人，做毋好--ê。

(2)    信耶穌佮創造人的上帝平等，有萬權能通救你佮我。

III. 毋免聽候到毋著的攏改了，為著咱甚物意思。

  佇遮有兩項真要緊的教示：－

(1)    頭一項：論得著救的人是甚物款。

(2)    第二項：佇死後信主的人欲按怎樣？In佇佗位？有甚物款式？

1. 咱著會記得有兩个賊釘佇十字架；一个到死譭謗耶穌做假的基督，毋信伊。這是因為伊硬心，驕傲心，無欲想這耶穌是比伊非常閣較好--的。伊毋信這是人以上--的，伊算伊是咧騙家己，真戇來死，痟人；因為算家己做上帝所差--來，做萬權能--的。伊袂信佇柴裡的人通做上帝獨一的囝。伊若是基督著落來，拍滅伊的對敵。伊袂曉疼痛的上帝欲用疼痛nā-tiāⁿ，來較贏。伊的驕傲予伊親像青盲，袂看見主實實的情形，致到袂信伊，就死佇罪裡！

予遮的兩犯人分開，一个得著救，一个無向望佇死裡；是硬心佮軟心的關係。是親像這霎佇遮有的咧講無影，這个基督是假--的，無影會救我，我毋信－用彼款驕傲，硬心的態度，按怎樣會得著救？基督有講(約翰6：37)，「就近我的人，我決斷無棄拺伊」－遮的會得著救－總是若講「毋免，我毋來」；基督無欲用強制予伊來。所以咱著常常祈禱，聽候硬心變做軟心。

2. 路尾項就是耶穌對彼个賊所講的話，有2，3項論死後的教示佇咧。伊有講，「今仔日你欲佮我佇樂園」：－

(a)    是親像這个犯人有講「我知，你是天國的王；你佇你的國來的時著記得我」。按呢生耶穌攏無責備伊講「毋通對我求，我也是人nā-tiāⁿ；咱所欲到的所在，咱平平毋知影」。總是攏無按呢講，反轉有准彼人所稱呼講，「今仔日你欲佮我到樂園」。是親像伊不止熟似，亦有顯明佇遐是伊咧掌管。到死，伊算家己做天國的王。

(b)    這句話，「樂園」是真心適。佇希利尼的話，這佮創世記2章的伊甸拄拄siāng一句話。意思就是雖然你是罪人，對你的信你咧欲到無罪，無煩惱，有福氣滿滿的所在。「你欲佮我佇咧」；按呢就有真大大安慰的話。耶穌有信伊欲較贏死，伊的神交代萬權能的天爸，就這个罪人毋免驚，伊猶原有份佇耶穌的較贏。

閣一句話「今仔日」毋免出世閣死幾若遍；對伊的信，伊是頭一个人佮耶穌入佇活。伊是頭一個人對信耶穌來較贏死的管轄。為著咱也是按呢；今仔日，這霎有機會通入天國，毋免聽候到死來離開罪的權勢。干焦著謙卑認毋著，來信耶穌做贖回咱贖回咱的罪的主。對按呢咱入佇永遠的活，就毋免驚死。咱佮疼痛的主相佮佇咧，就按呢有福氣滿滿！
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461