Kiông-chì Chòng-táⁿ
Tân Thiam-ōng siá
1937年1月622期 30-31
Chhiáⁿ tha̍k Iok-su-a thâu chiuⁿ.
Chit chiuⁿ ū kóng 4 pái kiông lín ê chì, chòng lín ê sim. Sin hoan-e̍k kóng, "ióng-kám chòng-táⁿ". Che oē sím-mi̍h lâng kóng mah? Siáⁿ iân-kò͘ lâi chhut chit hō oē tī peh-sìⁿ kap thâu-lâng? Chiū-sī chīn-tiong ê Mô͘-se sí, peh-sìⁿ teh loé-chì, kiaⁿ-hiâⁿ, sit-táⁿ, só͘-í Iâ-hô-hoa hián-hiān hoan-hù Loán ê kiáⁿ Iok-su-a saⁿ pái, āu-lâi Iok-su-a hoan-hù peh-sìⁿ chi̍t pái , Lín tio̍h "ióng-kám chòng-táⁿ", che sī tāi-seng siū hùn-sī, āu-lâi hùn-sī pa̍t-lâng.
Chit lāi-tiong ū 4 hāng thang saⁿ-kap siūⁿ:
1. Chí-tō-chiá sit-lo̍h. Mô͘-se choè chīn tiong ê lô͘-po̍k í-keng sí, i ê sù-bēng í-keng chīn, só͘ ài sìn-jīm ê m̄-chai siáⁿ lâng? Peh-sìⁿ chhin-chhiūⁿ bô chú ê khoán, só͘-í Iâ-hô-hoa giâm-giâm hoan-hù, ài ióng-kám chòng-táⁿ.
2. Bîn-sim iô-tāng. Khoàⁿ in ê chú-kong í-keng sí, chèng peh-sìⁿ sit-táⁿ kiaⁿ-hiâⁿ, só͘-í Iâ-hô-hoa pī-pān hō͘-kè-chiá Iok-su-a lâi soà-chiap, chhiat-ì kiò in m̄-bián kiaⁿ.
3. Chiân-tô͘ ê guî-hiám .Khoàⁿ-tio̍h Iok-tàn-hô hiah-nih toā, oh-tit kè-khì hit pêng, kai-chài choân-lêng ê Chú ēng koân kau-hù Iok-su-a , hō͘ hô-chuí pun-khui, chhin-chhiūⁿ kiâⁿ ta-toē, lâi kè-khì hit pêng hoāⁿ.
4. ài ta̍t bo̍k-tek toē. Chiū-sī èng-ún ê Ka-lâm toē, chin-chiàⁿ puî, m̄-kú siâⁿ kian-kò͘, khiā-khí ê peh-sìⁿ hiau-ióng, sui-sī ì-ài iā sī chin kiaⁿ. Só͘-í Iok-su-a hōng Siōng-tè ê bēng-lēng, kiò peh-sìⁿ sūn-thàn, nā uî-ke̍h, tio̍h sí choē, āu-lâi in chin-chiàⁿ sūn-thàn, se̍h-siâⁿ 7 ji̍t, āu-lâi ka-kī tó, muí-ji̍t chi̍t pái , tē 7 ji̍t ài se̍h 7 pái, kó-jiân èng-giām , lóng tó-hoāi.
Taⁿ lán ê kàu-hoē tī chhin-chhiūⁿ chit khoán ê sî-tāi, ài kiû Siōng-tè te̍k-soán chīn-tiong ê lô͘-po̍k lâi choè-kang, thang êng-hián I ê miâ.
Peh-sìⁿ teh iô-tāng ê sî, ài kiû Chú lâi pang-chān, m̄-bián kiaⁿ, I kap lán tī-teh.
Chiân-bīn sui-jiân ū chó͘-keh.
ài kiû Siōng-tè khui-lō͘ hō͘ lán kiâⁿ;
Kàu ta̍t lán ê bo̍k-tek toē.
Tit-tio̍h Chú só͘ èng-ún ê toā-hok.
Taⁿ saⁿ-nî ūn-tōng ê kang teh chìn-hêng, kiû Chú hián-hek giâm-giâm hoan-hù, hō͘ peh-sìⁿ hoaⁿ-hí uī-tio̍h Thian-kok lâi chìn-hêng, saⁿ-kap êng-kng kui tī choân-lêng ê Pē Siōng-tè. Sim só͘ goān.
