Chit goe̍h tio̍h chò lín ê chiaⁿ-goe̍h
Chhut 12:1
1937年2月623期 4-5
Chêng chò lô͘-châi, liân la̍k-ji̍t bô chū-chú. Taⁿ Siōng-tè lâi tháu-pàng, lâi kiù-sio̍k. Chit-tia̍p liáu-āu sī kok-bîn, sī chū-chú , la̍k-ji̍t iā ài to̍k-li̍p chū-chú, si̍t-chāi sī khian khun it-choán lah! In-uī Siōng-tè ū oāⁿ-sin bān-mi̍h. Chiū-sī oāⁿ la̍k-ji̍t ,"Chit-goe̍h tio̍h chò lín ê chiaⁿ-goe̍h." Oāⁿ lô͘-châi chò chú-bîn─Chhut Ai-ki̍p. Oāⁿ choē-jîn chò I ê hō͘-sû. Si̍t-chāi sī keng-thian tōng-tē ê sū-si̍t lah!
Koan-hē "Chit-goe̍h" ê le̍k-sú , lán bián gī-lūn. "Chit-goe̍h" chiū-sī tit-kiù Chhut Ai-ki̍p ê kì-liām lah! Sī Í-sek-lia̍t chong-kàu-sú-siōng ê chi̍t choán-ki, iā-sī lán sìn-gióng seng-gâi ê kài-soàⁿ. Sìn-gióng si̍t-chāi sī lán ê seng-gâi ê chhut-hoat-tiám, sī lán sìn-gióng ê chiaⁿ-goe̍h! In-uī tuì choē-ok tit-kiù m̄-sī kiat-boé, sī sin seng-gâi ê thâu-chi̍t pō͘, sī sin oa̍h-miā ê khí-thâu, sī sìn-gióng seng-oa̍h ê chiaⁿ-goe̍h lah!
"Chit-goe̍h" sī kì-liām Siōng-tè ēng I ê toā koân-lêng lâi sím-phoàⁿ hiah ê ap-pek I ê peh-sèⁿ--ê, chiū-sī Í-sek-lia̍t lâng ê "Poâⁿ-koè-cheh" lah! Tuì "Poâⁿ-koè-cheh ê iûⁿ-ko"(I Lîm 5:7). Chiū tit Chhut Ai-ki̍p, bián koh chò lô͘-châi. Chit ê iûⁿ-ko tio̍h "bô hâ-chhû"─oân-choân, "boē moá-nî"─sèng-kiat, "iûⁿ-ko-á" - lêng-le̍k, chiàⁿ-sī Siōng-tè iûⁿ-ko lah!"(Hān 1:29). Nā m̄-sī tuì chit ê iûⁿ-ko, chiū bô lō͘ thang tit-kiù. Lán tāi-ke kiám m̄-sī tī Ai-ki̍p ê Í-sek-lia̍t lâng mah? kiám m̄-sī choē-jîn mah? kiám ū sím-mi̍h kong-lô thang tit chheng-chò-gī mah? "In-uī chai lán siū-sio̍k thoat-chhut tuì chó͘-kong só͘ liû-thoân khang-khang kiâⁿ-chò, m̄-sī ēng ē pāi-hoāi ê mi̍h, he̍k-sī gîn, á-sī kim; sī ēng pó-hoeh, chhin-chhiūⁿ bô hâ-chhû, bô ù-oè ê iûⁿ-á--ê, chiū-sī Ki-tok ê hoeh."(I Pí 1:18,19). "Hoeh" chiū-sī oa̍h-miā ; lâu-hoeh, chiū-sī hiàn oa̍h-miā. Mn̂g-bâi, mn̂g-khiā boah-hoeh, sī piáu-bêng tī hit lāi-bīn ê lâng lóng í-keng sí. Lán sìn Chú , chiū-sī pún-sin sí, ǹg Siōng-tè lâi oa̍h. "Goá bat kap Ki-tok tâng tèng si̍p-jī-kè, goá iáu-kú teh oa̍h , m̄-sī iû-goân goá, chiū-sī Ki-tok tiàm tī goá teh oa̍h, koh goá hiān-kim tī jio̍k-thé só͘-ū ê oa̍h, sī chāi tī sìn Siōng-tè ê Kiáⁿ lâi oa̍h "(Ka 2:20). (Chham-khoàⁿ II Lîm 5:14, 15). M̄-nā boah iûⁿ-hoeh, iā tio̍h chia̍h iûⁿ-bah! M̄-sī chi̍t pō͘-hūn nā-tiān , sī "thâu, kha, ngó͘-chōng", chiū-sī choân-pō͘ lóng tio̍h chia̍h, oân-choân sêng-siū lah! Lán sìn Ki-tok, iā-sī tio̍h oân-choân sìn-khò Ki-tok ê 'choân jîn-keh' lah! In-uī sìn-gióng Ki-tok , bô ū pō͘-hūn-tek , iā bô chā-ji̍t, kin-á-ji̍t. M̄-sī chā-ji̍t sìn hit pō͘-hūn, kin-á-ji̍t sìn chit pō͘-hūn; sī tio̍h oân-choân hâng-ho̍k, oân-choân sêng-siū, oân-choân sìn-khò lah!
Taⁿ Siōng-tè hoan-hù tio̍h kái-le̍k(改曆) lâi kì-liām I toā koân-lêng ê chín-kiù, hō͘ lán chai lán ê Siōng-tè sī sin-kí-goân ê Siōng-tè. Lán lâng siông-siông ê sit-pāi , nā-sī Siōng-tè ū koh hō͘ lán sin ê ki-hoē, kā lán khui sin ê kí-goân.
Chhiáⁿ mn̄g lán ū kái-le̍k, khui sin kí-goân bô? Bat tiàm tī iûⁿ-ko ê hoeh lâi tit-kiù bô? Ū oân-choân sêng-siū iûⁿ-ko ê bat bô? Ū Chhut Ai-ki̍p bē? Hiān-chāi ê seng-oa̍h sī tuì sìn-khò Iâ-so͘ Ki-tok lâi oa̍h mah? Lâng tuì sìn Siōng-tè ê Kiáⁿ Iâ-so͘ Ki-tok liáu-āu, i ê seng-oa̍h tek-khak toā kái-kek , toā piàn-hoà, chiū-sī chiâⁿ-chò chi̍t ê sin chhòng-chō ê lâng lah! Che chiū-sī hit ê lâng ê sin kí-goân, chiū-sī i ê sìn-gióng ê chiaⁿ-goe̍h lah!
(Tân Kim-jiân)
