Lō͘-tek-kì ê Gián-kiù
(Soat-hong ia̍t-lâm)
1937年2月623期 5-6
Sū-giân
Choân-phō ê Sèng-keng ū nn̄g-pún sī ēng hū-jîn-lâng ê miâ lâi hō--ê: chi̍t-pún sī Í-sū-thiap, koh chi̍t pún chiū-sī Lō͘-tek. Í-sū-thiap sī Iû-thài lâng kè hō͘ goā-kok ê kok-ông. Lō͘-tek sī goā-pang lâng kè hō͘ Iû-thài ê hó-gia̍h lâng, nn̄g lâng ê chu-keh sui-jiân bô siāng, chi̍t ê chun-kuì hó-gia̍h, chi̍t ê pi-bî sàn-hiong, iáu-kú tuì tī Iû-thài bîn-cho̍k ê ūn-miā, lóng ū chin toā ê koan-hē, só͘-í le̍k-sú ē-thang pâi Sèng-keng lāi, soà thang chò lán ê lêng-thêng chí-lâm.
Chit pún chheh ê sî-kan, sī Chú chêng 1322-1312 ê tiong-kan, sī Sū-su ê sî-tāi, chiàu-gia̍h thang siá tī Sū-su-kì lāi-bīn, in-uī ài piáu-bêng tuì Í-sek-lia̍t-ke o͘-àm khùn-khó͘ ê tiong-kan, iáu-kú ū chit khoán khoài-lo̍k ê ka-têng, koh ē-thang chò chē-chē kà-sī , só͘-í lēng-goā siá. Chit pún chheh kap Sū-su-kì téng-poàⁿ tâng-sî, le̍k-sú liân-chiap kàu Sat-bó-ní-kì, só͘-í iā sī chit nn̄g pún ê liân-chiap-soàⁿ, sī chin ū koan-hē.
Iû-thài lâng siú choeh-kî ê sî, ū tha̍k 5 pún ê Sèng-keng , chiū-sī Thoân-tō, Ngá-ko, Í-sū-thiap, Iâ-lī-bí Ai-ko, Lō͘-tek-kì chiah-ê. Kî-tiong Lō͘-tek-kì sī Gō͘-sûn-cheh só͘ tha̍k--ê. Khó-kiàn Í-sek-lia̍t hoē-chiòng put-chí chun-tiōng chit pún chheh.
Koh chi̍t hāng, hō͘ lán chin ū chhù-bī ê gián-kiù: Chiàu lu̍t-lē, goā-pang sī éng-oán bē-tit ji̍p Iâ-hô-hoa ê hoē, Mô͘-ap lâng koh-khah bē-ēng--tit (chham-khoàⁿ Sin-bēng-kì 23:3), nā-sī Lō͘-tek kèng-jiân ē-tit ji̍p Iû-thài lâng ê hoē sīm-chì koh ē-thang chò Iâ-so͘ Ki-tok cho̍k-phó͘ lāi ê chi̍t-ê, thang piáu-bêng Siōng-tè tuì īⁿ-pang lâng kap Iû-thài lâng ê khoàⁿ-hoat sī kong-pêⁿ--ê. Choè koh-khah kî-koài--ê, Ki-tok cho̍k-phó͘ tiong, sì-ê hū-jîn-lâng lóng sī goā-pang ê lú-chú (chham-khoàⁿ Má-thài 1:1─16), Tāi-má (chham-khoàⁿ Chhòng-sè-kè 38 chiuⁿ). Lat-ha̍p (chham-khoàⁿ Iok-su-a 2: koh 6:25). Lō͘-tek(pún-chheh). Poa̍t-sī-pa(II Sat-bó͘-jíⁿ 12:24). Chiàu án-ni khoàⁿ, hō͘ lán koh-khah bêng-pe̍k Siōng-tè bô khoàⁿ-khin goā-pang lâng, tī Ki-tok ê lāi-bīn bô hun-piat.
Chit pún chheh chiah ū 4 chiuⁿ, kiōng 85 chat nā-tiāⁿ, piáu-bīn-siōng sui-jiân sī kóng-khí chi̍t ê ka-têng ê seng-oa̍h chōng-hóng, iáu-kú si̍t-chāi ê pún-chí, sī chioh Lō͘-tek lâi piáu-hiān Ki-tok-tô͘ sìn-sim ê lêng-thêng, kap Ki-tok kiù-sio̍k ê chin-lí, hit ê ì-gī hó, chhin-chhiūⁿ hn̂g-lāi ê muî-kuì-hoe, ē hō͘ lâng kám-kak Ki-tok ê Thiàⁿ ê suí ê phang.
Chheh ê tāi-khài, sī chiong chi̍t ê goā-pang lú-chú ê le̍k-sú lâi biô-siá Ki-tok-tô͘ ê hoé-kái, jím-nāi, sìn-sim , sūn-ho̍k, kam-goān poē Si̍p-jī-kè, jīn-bat Sèng Sîn, hōng-hiàn, thèng-hāu, kàu kap Ki-tok kiat-liân, só͘ ū ê lêng-thêng, lóng hêng-iông kàu chin siông-sè. Só͘-í ǹg-bāng chhin-ài ê hiaⁿ-tī chí-moē, ēng jia̍t-sêng ê sim saⁿ-kap lâi gián-kiù.
Taⁿ lâi khoàⁿ tē-it chiuⁿ:─
Tē-it chiuⁿ: Hoé-kái
Tē-it toāⁿ: Tuī-lo̍h
1 chat: Tng Sū-su pān chèng-sū ê sî, hit ê tē(Ka-lâm tē) tú-tio̍h ki-hng, tī Iû-thài Pek-lī-hêng ū chi̍t ê lâng......
Tng Sū-su ê sî, in-uī bô tiong-iong chi̍p-koân , só͘-í hit-sî ê lâng lóng chhut-chāi ì-sù khì kiâⁿ(chham-khoàⁿ Sū-su-kì 21:25). Só͘-í lâng bô chiàu kui-kí, siông-siông lām-sám chò, nā khoàⁿ Sū-su-kì lō͘-boé kuí-chiuⁿ, chiū chai hit-sî ê siā-hoē, jîn-sim lóng hián-chhut sìn-gióng kap tō-tek ê hú-pāi, siū Siōng-tè ê khiàn-chek, 7 pái kau hō͘ goā-pang lâng, só͘-í Sū-su ê sî-tāi, thang khoàⁿ-chhut Í-sek-lia̍t lâng 7 pái thè-hoà , 7 pái siū hêng-hoa̍t, 7 pái hoán-hoé, 7 pái tit-kiù, tng tī jîn-sim tuī-lo̍h ê sî, Siōng-tè ta̍k pái ēng hoat-tō͘ kiò-chhéⁿ. Ki-hng iā-sī chi̍t hāng ê hoat-tō͘ , khó-sioh chē-chē lâng uī-tio̍h ki-hng, bē-kham-tit thun-lún , chiū lī-khui Siōng-tè, chhin-chhiūⁿ A-pek-lia̍p-hán uī-tio̍h ki-hng, lo̍h-khì Ai-ki̍p, jiá--tio̍h tāi-chì (Chhòng-sè-kì 12:10). Í-sat uī-tio̍h ki-hng khì Ki-la̍h-jíⁿ, iā jiá--tio̍h tāi-chì(Chhòng-sè-kì 26:1─11). Ngá-kok choân-ke iā uī-tio̍h ki-hng chhoā khì Ai-ki̍p. Khó-kiàn Siōng-tè ê kiáⁿ-luī, sìn-sim chin loán-jio̍k, siông-siông ài poa̍h-tó, tī-chia só͘ kì ê ki-hng, tāi-khài sī Ki-tiân chò Sū-su ê sî-tāi(chham-khó Sū-su-kì 6:1─6).
Ka-lâm-tē sī Siōng-tè chiok-hok chhut ni kap bi̍t ê tē, kèng-jiân iā ki-hng. Iû-thài sī o-ló Chú ê ì-sù, kèng-jiân ū ki-hng ê pi-ai. Pek-lī-hêng ê ì-sù sī mī-pau, mī-pau ê siâⁿ ē ki-hng. Kî-koà[sic.] ah!! Siōng-tè chiok-hok chhut ni kap bi̍t ê tē, piàn-moá ū o-ló Chú ê siaⁿ, koh ū bí-niû chhiong-chiok, chit hō ê só͘-chāi iáu-kú ē ki-hng, sī cháiⁿ-iūⁿ chiah án-ni? Bô m̄-sī uî-ke̍h Siōng-tè ê bēng-lēng(chham-khó Sin-bēng-kì 28:15─18,33,38,39), siū Siōng-tè ê hêng-hoa̍t, lâng nā tú-tio̍h Siōng-tè ê koán-kàu, ū nn̄g-tiâu lō͘ thang kiâⁿ; Chi̍t tiâu sī hoán-hoé , jīn-choē, jím-nāi thèng-hāu; koh chi̍t-tiâu , sī thàn ka-tī ê ì-sù lâi kiâⁿ. Chi̍t-ê lâng chhoā chi̍t-ê bó͘ kap nn̄g-ê kiáⁿ, chiū-sī thàn ka-tī ê ì-sù lâi kiâⁿ kàu tá-lo̍h? Kàu Mô͘-ap khì. Khó-lîn ah!! kàu Siōng-tè só͘ chiù-chó͘ ê tē khì. Lōng-tōng-chú siū ki-hng pek tò-tńg lâi chhoē pē , chit ê lâng uī-tio̍h ki-hng pek-cháu lâi lī-khui Siōng-tè , sī saⁿ tuì-hoán. Khó-sioh chit ê lâng tú-tio̍h hoān-lān, bē-hiáu jīn-choē thun-lún thèng-hāu , chiū lī-khui Ka-lâm ê hok-tē, lo̍h-khì siū chiù-chó͘ ê Mô͘-ap. Chhin-ài ê hiaⁿ-tī chí-moē!! Khó-sioh hiān-sî iā ū chē-chē lâng uī-tio̍h pn̄g-oáⁿ, uī-tio̍h khoân-kéng, uī-tio̍h hong-sio̍k, uī-tio̍h jîn-chêng......lâi pàng-sak hok-khì ê seng-oa̍h, lī-khui Siōng-tè , lâi kiâⁿ ka-tī ê lō͘(chiū-sī chū-iû kàu Mô͘-ap). Lí khoàⁿ chit ê lâng pêng-sî siáⁿ-khoán? (Thāi-sio̍k)
