樂山園訪問記
吳清鎰
1937年2月623期 25
鄙人佇舊年12月15日，佮陳，蕭，張，三位先生對台北坐バス去訪問八里庄癩病院樂山園。彼早起台北的雨不止大，總是八里庄真好天閣燒熱。行路的時對遠遠就看著樂山園的全景真正美麗好景緻。Têng園青翠的花木整頓真四序。得著陳先生親像案內見學。園內攏是近代tek的設備。逐項清氣閣好勢。園內的患者六日慇勤做工作菜園，第7日安歇守禮拜，得著牧師的靈tek栽培好教示。親像按呢，in每日的生活不止有趣味，逐人攏是感恩佮歡喜。現時患者總數58 ，內中女子15个。佇12月26日，阮得著園長戴醫生的招待，閣一擺去訪問in，赴in聖誕的祝賀會。In所做的齣頭真有特色閣趣味。有「伯利恆的放送，也有ソロモン王的審判，佮Í-sū-thiap的聖劇。」大家看了不止受感激。感謝上帝，有賞賜這款的機關，通收容遮的可憐的兄弟，予in通得著比社會普通較好的生活，毋但按呢，閣亦有主的福音到佇in，通chhoā in入永遠佮主徛起的好生活。
最後紲報咱知樂山園的園長戴醫生，今年欲轉去祖家歇睏，總是有所數念的 吳牧師娘佮吳姑娘欲來。願上帝祝福欲去佮欲來--的，亦大施恩佇樂山園的頂面。 |
