首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄
雜錄
卷期：第624號 本次： 日期：1937/3 刊名：台灣教會公報 頁數：7-11
篇名：雜錄 [ Chap3-lio̍k ]
作者：黃俟命 N̂g Sū-bēng
  顯示 : 漢羅 全羅 並列  

雜錄

1937年3月624期    7-11

(黃俟命)

I. 宣道會的消息。

列位疼主的兄弟姊妹同鑒。

咱每擺坐主的桌，數念主的了後就獻金來做宣道會的路用。主講，「恁的財寶佇遐，恁的心也欲佇遐。」我有聽見濟濟人講，「宣道會有做甚物？阮攏毋知」。我聽這句話，家己真見笑。所以佇舊年12月28號，冒險過去澎湖(因為這个時期過去澎湖真無利便，有時會予風湧關咧幾若十日)。感謝阿爸爸上帝，有chhoā我過海，到逐个教會攏有巡--著，閣毋免予風湧關--著，逐所在照所預定的時日就清楚，到正月11號，就到台南赴新樓醫館一週年的祝賀會。Taⁿ我將所經過逐教會最近的教勢，報列位知：-

  1. 瓦硐教會。

傳道師：夏宇。長老；許靈魂，許Niū。執事：許永遠，許助。主日學校長：許永遠。教員3个，學生42个，每禮拜有40名出席；大人禮拜頂晡30名，下晡20名。獻金一年有22箍，總是有出外來台南做事業的兄弟姊妹，為in的教會每年有出170箍做傳道薪金，對今年起，in歡喜進步出240箍來交代宣道會。佇瓦硐有領洗禮的會友30名，小兒 13名。教勢有振興的氣象，3項：-

  (1)有兩个精神病--的，真傷重，教會迫切替伊祈禱，就遐个人，taⁿ有穿衫仔褲，會食飯，現時調養中。

  (2)有一个公學校的訓導，姓吳名Siong-sai，予官廳，社會，家族所尊敬--的，伊因為愛修養品性，造就人格，有讀濟濟修養的冊，到最近就決心認耶穌做伊的主，為著知伊的品性有缺陷，無耶穌袂通達伊的目的。這擺有領洗禮。

  (3)未信者的囡仔20外人，in的爸母送in來讀主日學。看in的囡仔來讀主日學了後，紲袂chhoh歹喙，真歡喜。

佇這兩年間，來問道理--的，有25名，接納4名。求道者有5名。

  2. 馬公教會。

傳道師黃丁旺(4月起，Loā Jîn-sêng)。女傳道：陳李--氏素。長老：李--氏Koai，李清義，戴耀如執事：陳慶章，許Khûn。主日學校長，傳道師兼任；教員有4名，主日學學生有35名，出席有29名。大人禮拜頂下晡攏有40名以上(這是對舊年宋博士奮興會了後。) 新求道者有5戶，13人，每禮拜的獻金有1.20以上。例年出傳道薪金 50箍。對1937年起，歡喜欲出120箍。領洗禮的信徒有30名，小兒有38名，中間有的搬--過來台灣，紲失蹤跡。這个教會近來也有較活動。有3項：-

  (1)發動機第一丸的船長胡Theng兄，若到馬公，就出力佈道，流目屎，求上帝著施恩佇澎湖海嶼的百姓。這个所做，予濟濟硬心的人著降服。

  (2) 女傳道，原是欲派去花宅，因為黃丁旺先生硬挽留佇遐做工，遐的女界 幾若人得著大利益。

  (3)戴耀如長老，是馬公家的評議員，予眾人所尊敬，總是伊當時是標榜伊是基督徒。教會內，教會外真有利益。其他的會友也漸漸知in做基督徒的本份。有李Moâi長老的故人倒去也熱心信主。最近兩擺問道理，有17人來問，接納7个。

  3. 西嶼，竹篙灣。

遮有兩口灶聽道理，歷過30外年，無人培養，無人照顧，受濟濟窘逐艱苦，已經經過3代人接紲禮拜逐禮拜日兩口灶做伙聚集。In的細囝，家己教白話字，有4，5个會讀聖經。領洗禮的大人有5个，細囝7个，兩家有20外人。In猶咧數念宋牧師娘早年去in遐教白話字。我佇遐共in行洗禮，守聖餐。

  4. 花宅的教會。

傳道師是戴Hōng-liân長老。伊來佇遮教漢學，早暗，禮拜日，chhoā遮的會友禮拜。佇遮的教會中，男女的青年第一捌道理，佮gâu祈禱--的，是佇遮。這原因，是逐日，早，暗，戴Hong-liân長老咧傳道理，咧教祈禱。可惜婦人人遐个做老母--的，無人通引chhoā。戴先生佇遮真犧牲，也遮的人真尊敬伊。早年王Kang長老有起這間拜堂，已經攏歹。佇舊年佇台南奮興會的路尾暗，特別為著遮的獻金有240箍，閣有有志者加添到260箍，來做遮起拜堂的路用。Taⁿ in有起一間真媠，會容允得130，140人，佮修理小厝，共開500外箍，會遐省，是戴長老佮伊所教的學生，出力做工，得著石頭濟濟，佮免倩小工。所有不足--的，有得著宣教師，女宣道會，佮咱部會，以及戴先生的兄弟叔孫，來鬥出力，致到佇不足中，欠缺中，對戴長老一人的犧牲，予大家生起相幫贊的心，到有夠額，真也感謝上帝。佇這海嶼中通看著為主背十字架的兄弟，真歡喜到極。

 

這个教會前途不止有望。現時長老頻Hú；執事高Chhiòng，也真出力。

  兩擺問道理有38人(較濟是戴先生的學生)，有接納4人，領洗禮的大人才有14人，小兒 11人。遮的會友較濟出外佇高雄。禮拜日普通是20外人(主日學無在內)。主日學猶原是戴先生一人咧教。

  5. 大嶼教會傳道師許益超，今年新卒業，照看不止合遮个海嶼為主做工--的。伊掠艱苦，無文明的生活做滿足，願佮遮的艱苦的百姓做伙生活，將伊的份額佮遮的人公家用，家己真克己。這个海嶼差不多有5千人咧蹛，近來交通利便：比早前較好景況。雖然是按呢，才有7，8百人有通食3頓nā-tiāⁿ。其餘普通--的是干焦食兩頓。所做的事業攏是討海，若拄著災殃，是全家的查埔人攏無--去；佇邊仔幾若个海嶼攏是親像這款的生活。破病無錢，也無醫生通醫治。這个先生看著這等號的苦情，伊真甘願佮in同生活，來傳福音予in。

論遮的教會是第一濟人--的。In前每年出薪金 140箍。Taⁿ in有活動欲出180箍。有3个長老：夏傳，夏 Sùn，閣一个女長老4个執事。主日學真活動。我去，有赴--著in 咧祝聖誕，真gâu備辦，所做的齣，簡閣明，真有好的教示。台南呂Chhun-tông君去佇遐鬥活動。

這兩擺道理有17人，接納5人。領洗禮50外人。是真散真艱苦的生活。總是靈性上真有厚望。

請列位常常替遮的海嶼中生活艱苦的兄弟來祈禱。到遮个海嶼中聽著人咧吟詩呵咾上帝，比佇大都會的聖歌隊，閣較受感激，歡喜咱的阿爸爸上帝到佇天邊海角都有人咧稱讚。

佇遐做工的人，比佇咱遮較有犧牲克己，所以咱著大數念in。

  II. 南大主日學。

部會佇1月4號聚集議士。

議定：-

  1. 今年(12年度)欲開南部大會主日學校長會議。請各教育部，設法各中會內校長(代表)4名來出席。

  2. 白話字教科書：-議定採用王守勇牧師著[主日學讀本]請各主日學對公報社注文。

對南大建議：-

  1. 主日學教員課本，歸公報社設法，毋免予各中會加貼Y48.00。

  2. 主日學用大幅掛圖歸公報社設法；因為較利便。

  3. 主日學部會費繼續徵收，一年一擺的事。

報告。設教70週年記念：-

  1. 主日學教員10年以上勤続表彰(昭和十年止)照下面：-

  (1)台中中會內。

彰化，連--氏馬玉21年，潘Î-cheng 20年，李Thian-sióng 12年。

台中，劉樹20年。

鹿港，黃Chia̍h-pô 17年。

  員林，蔡Kai-tit 17年，張火樹11年。

  南投，梁--氏讚美16年，吳--氏Siōng-jím 10年。

霧峰，梁--氏Chàn-chiok 13年，黃--氏Siōng-hoa 10年。

  田中，陳Hoé-chong 13年。

  和美，莊--氏Hí-loân 13年，黃信德13年。

  二水，張天送12年。

草屯，賴Se 11年。

  Soa-san，侯--氏素娥10年。

共17名。

(2) 嘉義中會內。

  鹹水，郭Hiong 20年，胡--氏Siām 20年，范Khiân-sùn 10年以上，郭金枝10年以上，蔡Suī 10年以上。

  嘉義，王--氏16年。

  東後寮，蔡Liān 10年以上。

Lo̍k-moâ-sán，邱連福10年以上。

土庫，林Poe 10年以上。

  (3)台南中會內。

台南，侯--氏青蓮29年，高--氏Siù-îⁿ 16年。

  新化，李Goân-sēng 20年。

  安平，張--氏阿好19年。

  善化，林--氏Loân 19年。

頂中洲，邱義18年，吳Chiau-seng 10年。

  佳里，蘇Lîm 18年。

  安順，吳Chheng-liân 17年。

  歸仁，林--氏茉莉17年，郭Khún 16年。

Soaⁿ-pà ，穆Chuí-lêng 19年，戴明德10年，Phiau--氏毋11年，羅Chiong-sin 13年，羅Bûn-siông 13年。

頂山跤，戴孔明17年，蕭--氏瑞敏13年，Go̍k先鋒11年。

  左鎮 ，卓Tek-chu 10年，Mái--氏Hoa 10年，Mái--氏快10年，李--氏Bí 10年，Mái Hui-tek 11年，黃Lâi 13年，羅Chheng-êng 12年。

  新市，穆珍珠12年。

東門，Kéng--氏瑞珠13年。

  岡仔林，黃--氏秀蘭10年。

  (4)高雄中會內。

鳳山，歐信德34年，蕭--氏lo 20年，方--氏Siàn 13年。

萬丹，彭--氏Ho̍h-liân 30年，黃--氏聖金20年。

男子，吳 Thian-sek 21年，林--氏Choan 14年，林--氏Iau-chu 14年。

  東港，Ngó͘--氏Hēng 20年。

  旗山。劉--氏Hiáng 17年，黃--氏Soat-l的12年，李--氏Chuí-thoah 12年。

  屏東，吳Khó-bián 18年，Ki--氏Âng-kam 15年，吳--氏Chhong-gio̍k 17年，林Chhim-hok 14年，吳--氏Lân-hiong 13年，周--氏Chhoā-tī 10年。

  木柵，Ki Thian-huī 17年，戴--氏Chhun-gio̍k 17年，穆發財12年，Mái Tiong-gī 10年，Báu Tiau-choân 12年。

海埔，你Boé 15年。

里港，黃Bān-hoat 11年。

  溪洲，陳Uí 10年，吳--氏Khêng-eng 10年。

  溝坪，Mái Khun-san 10年。

  2. 聖句暗念賞。

有9間教會32名學生得著賞。

  (a) 77節7名。(b) 57節8名。(c) 27節17名。

通知。南大主日學部會費，未交的教會。

請對振替(臺灣振替) 4943 (ヨコヨミ) 岡山郡楠梓三九○南大主日學部會寄來交。

南大主日學部會。

部長：王守勇。

書記：林照。

  III. 台灣的巴克禮。

中學的學長萬Eng-hoâ牧師有著一本冊，咧論巴牧師佇台灣為著福音怎樣咧做工，也寫出當時的環境。是英國話；文媠閣淺現。紙好，閣冊輕，有200外面。冊名台灣的巴克禮(Barclay of Formosa)。價錢，2箍半。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461