Chèng-gī ê Chú-tiuⁿ
Gô͘ Chheng-ek
1937年3月624期 24-25
"Béng sai teh háu, siáⁿ lâng m̄ kiaⁿ, Iâ-hô-hoa ê só͘ kóng, siáⁿ lâng m̄ thoân?"(A-mô͘-sū 3:8, 私譯).
Chèng-gī sī sím-mi̍h? Sè-kan lâng choē-choē ka-kī siūⁿ kóng goá ê chú-tiuⁿ chiah sī chèng-gī, hoān-nā hoán-tuì goá-ê lóng sī put-gī. Chóng-sī che sī lâng ka-kī ê só͘ siūⁿ, m̄-sī ū sím-mi̍h sū-si̍t ê kun-kù. Chèng-gī ê phiau-chún, m̄-sī chāi tī lâng, gâu lâng, sian-ti á-sī sèng-jîn. Chèng-gī ê kun-kù, chiū-sī chāi tī Siōng-tè ê só͘ kóng, Siōng-tè ê oē. Só͘-í lâng beh chú-tiuⁿ chèng-gī, m̄-sī beh chú-tiuⁿ lâng ka-kī ê ì-sù, ka-kī ê tia̍t-lí[sic.], sī kan-ta hō͘ Siōng-tè choè chhe-ēng, thiaⁿ Siōng-tè ê siaⁿ lâi kóng nā-tiāⁿ. Taⁿ koan-hē chèng-gī ê chú-tiuⁿ siá kuí hāng choè chham-khó:─
(1) Chú-tiuⁿ chèng-gī ê tōng-ki. M̄-sī tuì lâng, chiū-sī tuì Siōng-tè ê sèng-ì. Sī Siōng-tè ê bēng-lēng, sī Siōng-tè ê sèng-chí. Só͘-í thiaⁿ lâng teh chú-tiuⁿ Siōng-tè ê chèng-gī ê sî, m̄-thang kā i khoàⁿ-khin kap biáu-sī.
(2) Chú-tiuⁿ chèng-gī ê jîn-bu̍t. M̄-sī lâng só͘ kéng, sī Siōng-tè só͘ tēng. Só͘-í m̄-sī lâng kah-ì ê lâng, chiū-sī Siōng-tè kah-ì ê lâng. Lâng ê kah-ì sī toē-uī, chîⁿ-châi, miâ-siaⁿ kap kám-chêng, Siōng-tè ê kah-ì sī sêng-si̍t ê sim-sèng. Só͘-í sui-bóng tī sè-kan hō͘ lâng khoàⁿ bô tio̍h ê hiaⁿ-tī , nā-sī Siōng-tè ê só͘ kéng, chiū oē chú-tiuⁿ Siōng-tè ê chèng-gī.
(3) Chú-tiuⁿ chèng-gī ê sî-chūn. Siōng-tè ê chèng-gī put-sî tio̍h chú-tiuⁿ. Chóng-sī lâng khoàⁿ choè m̄-bián ê sî, jú choē lâng, jú ū toē-uī ê lâng khoàⁿ choè m̄-bián ê sî-chūn, chiah jú sī iàu-kín tio̍h chú-tiuⁿ chīn pún-hūn.
(4) Chú-tiuⁿ chèng-gī ê só͘-chāi. M̄-nā tī khòng-iá, iā tī chhī-koe. M̄-nā tī ke-têng , ia̍h tī kàu-hoē. Chóng-sī hit tiong-kan tē-it iàu-kín ê, chiū-sī tī kàu-hoē.
(5) Chú-tiuⁿ chèng-gī ê hong-hoat. M̄-sī ēng oân-ke, ia̍h m̄-sī ēng bú-le̍k. Tio̍h ióng-kám, chóng-sī m̄-sī lâng ê hó-táⁿ. Sī ēng chin-lí kái-koat, m̄-sī ēng kim-chîⁿ choè la̍t. Sī tio̍h ēng thiàⁿ-thàng, m̄-sī ēng oàn lâng. Tio̍h sî-siông kín-sīn, m̄-thang ka-kī khoàⁿ-khin. Tio̍h ū chìn-chhú ê hông-sè, koat-toàn m̄-thang tò-thè.
(6) Chú-tiuⁿ chèng-gī ê bo̍k-tek. Sī uī-tio̍h thiàⁿ-thàng, sī uī-tio̍h kiù lâng. M̄-sī ài hō͘ lâng kiàn-siàu bô û-toē, sī ài hō͘ lâng thoat-lī choē. Sī khoà-lū lâng ê só͘ kiâⁿ m̄ sì-chiàⁿ m̄-sī ài beh pò-iông ka-kī ê miâ-siaⁿ. M̄-sī beh chiâⁿ lâng ê sim-su, chí-ū tio̍h chiâⁿ Siōng-tè ê ì-sù.
(7) Chú-tiuⁿ chèng-gī ê kiat-kó. Hiān-sî kiám-chhái khoàⁿ boē kìⁿ, chóng-sī choè-āu tiāⁿ-tio̍h sī sèng-lī. Chin-lí siū oan-óng, chèng-gī siū thún-ta̍h, chiah-ê boē bián-tit ū, chóng-sī tio̍h hiòng-chêng m̄-thang tiû-tû. Kiat-kó m̄-sī lán só͘ tio̍h khoà-lū, in-uī che sī Siōng-tè ê ì-sù. Tio̍h thun-lún thèng-hāu, Siōng-tè ê kok ún-tàng kàu.
