首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 現代基督徒使命
現代基督徒使命
卷期：第625號 本次： 日期：1937/4 刊名：台灣教會公報 頁數：1-4
篇名：現代基督徒使命 [ Hiān-tāi Ki-tok-tô͘ Sù-bēng ]
作者：主筆 Chú-pit
  顯示 : 漢羅 全羅 並列  

現代基督徒的使命

主筆

1937年4月625期       1-4

 

使命是甚物？就是「一个人感覺伊受託應該去做的工程」。換話來講，使命，就是咱應該盡的天職。比並來講，一名警察官伊的使命，就是維持治安；一名兵伊使命，就是保護各國；一名傳教者的使命，是幫贊人生脫出罪的苦海；一名教育家伊的使命，是造就人才。

咱逐人袂通毋愛擔當使命得。耶穌設頭家用銀交代伊的奴僕的譬喻，有的領5千，有的領兩千，有的領一千，叫in去做生理，就去出外。過真久，主人轉來的時，3个奴僕攏來報告in的成績。領5千佮兩千--的攏有盡本份趁重倍，得著主人的呵咾。彼个領一千--的受主人咒詛紲刑罰--伊。伊敢有做啥歹？卻無；只有將彼一千埋佇土內無活用-伊。這就是無欲盡伊的使命，紲受主人咒詛講是貧惰閣無利益的奴僕，受趕出佇烏暗的所在，佇遐啼哭咬牙切齒。

耶穌有一擺對伯大尼欲去耶路撒冷，佇路裡看見一叢無花果樹，拄好腹肚枵，就去揣看有果子通食無？到位，揣無，耶穌就共伊咒詛；樹紲枯焦去。耶穌啥事共咒詛？無花果樹敢有做啥歹？也毋是因為伊佇遐鎮所在害著人。干焦一項的大錯誤，就是無盡伊結果子的使命。

親愛眾兄姊啊！咱著愛負使命才會用得。當佇這个時陣，咱做基督徒的使命到底是甚物？就是改造人心，建造人格。今仔日世界第一可憐--的是甚物？就是人心腐敗，人格墮落。thài會按呢？彼个原因，就是人的罪。

美國某高山有一叢樹，講有400年久，經過14擺予雷拍，以及400年久受風雨霜雪的侵害，攏無小可損傷。後來予一尾細細的蟲來食，竟然枯焦去。罪惡對人類的厲害，也是按呢。Taⁿ咱已經知基督徒第一要緊的使命，就是改造人心，建造人格。Taⁿ著想，欲怎樣來盡這个使命？我好膽講，猶未改造別人，著代先改造你家己。換話來講，愛盡咱的使命，著代先對咱本身起手。著代先改造家己，才會通改造別人。

人若毋捌字，欲thài會教人讀冊？若毋捌音樂，thài會教人唱歌？若毋捌路，欲thài會共人chhoā路？本身的心肝是腐敗，人格墮落，thài會通改造別人的心肝，建造別人的人格咧？

世界最大的人心改造家就是耶穌基督。伊愛清氣人，伊家己代先成做聖潔的人；伊愛教人謙卑，伊就代先共學生洗跤。伊愛教人著服侍兄弟，伊家己代先做人的差用。伊愛教人著有犧牲的精神，伊就代先為著人死佇十字架頂。

  Tō͘-lia̍p-su-to捌對一个熱心社會的運動家的青年講，「青年啊，你為著世界有流真濟血汗；總是著代先為著你家己流汗；你若向望一个閣較好的世界，你家己應該著做一个第一好的人；除非將天國代先實現佇你的心內，你袂會予天國佇世界實現--的。愛改造社會，著先改造家己。」

  Taⁿ欲怎樣來改造家己的心，建造家己的人格咧？對一个腐敗的人心，改造做一个完全清氣的人心；對一个墮落的人格，改造做一个高尚的人格；這號代誌，基督教叫做重頭生。所以咱若果然會明白一个人怎樣才會重頭生；就會通明白人心怎樣改造，人格怎樣提懸。

照基督教的道理，人若愛得著重頭生，著有兩方面的氣力來合作，才會成功。一方面，就是上帝的氣力；閣一方面，就是人的氣力。

(1)    論神的方面，請來相佮想：-

基督教信宇宙間有一位真神。這位真神，對咱的經驗佮基督的啟示，就會通看出有兩款的神格佇咧。就是聖潔佮疼。因為伊是齊全聖潔，所以怨恨罪惡；因為伊是疼，所以疼世間人親像囝一樣；毋愛人踏入罪惡變做罪惡的奴隸。所以伊真關心佇世間人，若牧者咧揣失落的羊，親像老爸聽候放蕩子回家。人若欲做一个重頭生的人，若毋是對上帝幫贊，無人做的到。看保羅先生的經驗就知(羅馬7：14-19，24-25)。

有人咧想，欲thài會知有一位真神上帝，又閣會幫贊我？列位！這是一个真奇妙的問題。所以基督教是真奇妙的宗教。因為這个問題，袂通用言語，抑是智識來說明到清楚。這个問題，是關係佇咱個人的經驗。只有實際經驗，才會明白到彼个徹底。若無這款的經驗，就無論咱怎樣研究，怎樣討論，到尾也袂通明白內中的實在。

比並爸母對囝兒的愛情，你若問爸母佮囝兒中的愛情是甚物？我雖然會用濟濟話 共你解說，爸母疼囝，是共伊抱，共伊唚，養飼，照顧，教育--伊；總是這毋是愛情的實在。無論我怎樣解說，攏袂會將愛情的實在，完全顯明出來。所以明白彼个愛情，是對伊家己的經驗。就是聽候你家己有囝兒，你就會知到清清楚楚。抑是親像出世就青盲--的，伊毋捌看見日頭，出在你怎樣共說明，伊都聽袂曉得。只有一法，就是予伊目睭光，予伊親身去經驗。

親像按呢，咱愛去經驗。上帝的力，會幫贊咱，也是無別法。只有親身，進入一款經驗。就是咱這面，著堅心決意欲追求重頭生，然後將遮的事，誠實交託上帝，時刻親近伊，佮伊交通，時刻接受伊的氣力，承受伊的教示。我好膽講免偌久，佇你的身上欲得著一種神秘力。保羅有這款經驗，所以袂行好的舊保羅，變做會行好的新保羅。Ò-kó͘-sū-teng因為有這款經驗，就對一个大罪惡頭，變做教會的柱石。路得馬丁因為有這款的經驗，就對一个予罪束縛的痛苦的心情，變做一个自由快樂的人生。列位！咱若果然會得進到這款上帝氣力幫贊的經驗，咱也會得著這款經驗的結果。

列位疼國，疼教會的兄姊啊！咱時時刻刻倚靠這位真神，伊是咱的天父，著對伊來追求重頭生。咱本身果然重頭生，就會改造人心，建造人格，來完成咱今仔日頭前的使命。

(II)論人這方面，請閣來想看：-

這个人愛得著重頭生，毋但著得著上帝的氣力的幫贊；閣一面咱家己著佮神合作。有兩面佇咧：

(1)    反悔(消極的)。

(2)    信仰(積極的)。

論反悔是啥意思？就是心的改變，抑是心肝的轉向。

反悔著有3項：

a)     知罪。

b)     對罪，表示悲傷痛恨的態度。

c)     決意除去罪。

路加15章所記彼个放蕩子，是按呢：

(1)    伊知罪(17節「伊醒悟」)。

(2)    伊對罪表示悲傷痛恨(18節「我有得罪天佮佇你的面前，taⁿ了後袂堪得稱做你的囝」)。

(3)    決意除去罪(20節「起來去揣伊的老爸」)。

Ò-kó͘-sū-teng也是按呢。咱愛改造家己，除求上帝的氣力來幫贊以外，第一要緊著追求反悔。咱逐人佇上帝的面前，著家己反省，到會知咱是一个罪人，對咱閣會決意除去罪，將咱的舊我佮基督釘佇十字架。

論信仰是甚物意思？信仰就是咱人活命中一條新的活路，見若進入--的會得救(翰 3：16)。所以信仰就是信靠，依賴，交託的意思。就是已經知基督是咱的救主：

(1)    對一方面，就是咱著將咱的全身，

全心全副的活命，完完全全無條件交託信賴伊。予咱一切的生活攏予伊管轄。凡事聽伊的指揮，凡事趁伊的命令，伊愛咱做的事，咱才做；伊毋愛咱做的事，咱毋通做。凡事趁伊的旨意來行。

(2)    閣對一方面來看，就是完全接受

耶穌做咱一切的救主。將伊的教訓做咱一生的法則；將伊的生活，做咱的生活；將伊的心，做咱的心；將伊的目的，做咱目的。予咱的生活佮伊的生活同化。咱佇伊的內面，伊佇咱的內面。若保羅先生講，「我猶過咧活，毋是猶原我，就是基督踮佇我咧活」

咱若有這款的信仰，毋免驚咱袂重頭生，也毋免驚咱袂得著救。

列位，咱今仔日做基督徒第一大的使命，就是改造人心。

咱愛改造別人的心，著對改造家己的心起手。愛予別人重頭生，咱家己著愛先重頭生。

咱家己若重頭生，就通改造別人的心肝。予全國民的人心攏改造，無有私心，無有罪惡，變做新新的人，充滿基督犧牲，奉仕，疼人，疼國的精神。這就是咱現代基督徒第一大的使命。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461