首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 三年運動特記
三年運動特記
卷期：第625號 本次： 日期：1937/4 刊名：台灣教會公報/芥菜子 頁數：25-27
篇名：三年運動特記 [ Saⁿ nî ūn-tōng te̍k-kì ]
作者：
  顯示 : 漢羅 全羅 並列  

三年運動特記

S. L. S.

1937年4月625期       25-27

 

  1. 主張。信仰予人有利佮金的目睭，親像鷹鳥對懸懸不時咧看伊的機會佇佗位。對上帝得著的信仰，應該親像按呢，不時咧揣佗位有上帝所愛伊做的工。

信徒常常想伊無工通做，實在毋是無工：佇咱的目睭前，佇咱的後面，佇遠，佇近，上帝勸真濟工愛咱做，干焦咱無咧揣，無愛發見，咱的目睭無金，無利。

有時信徒也看見真無閒的款；總是伊所揣出的工，無榮光上帝，這也是伊的信仰，無予伊的目睭金，來分別甚物是上帝所愛咱做佇今仔日所要緊的工。

總是雖罔咱盡力愛揣，也是僫揣--著，僫得分明甚物是要緊。相心兩意愛這項，也愛彼項。愛予上帝歡喜，也愛罪惡妥協。著--的，也無掠做著；歹，也無掠做歹。對福音無真劍，無判斷力，也無確信來做工；這是對伊的心內無福音的光。對好，愛出力；對歹，力毋敢出。人會行好，毋是叫做好人，是好膽敢攻打罪惡，才是好人，才會做上帝的做工人。

信徒的性格有濟濟款，有的較好膽，有的較小膽，有的職款，有的彼款。檢采對生成。總是伊對主所得著的信仰無做伊的力。所精差，就是一粒細細粒的芥菜子的信仰nā-tiāⁿ。

今仔日咱這項未，彼項未，好，歹，是，毋是，袂分明。對好較好膽，對罪惡較無膽。這敢毋是驚魔鬼，也毋驚上帝？

有時人講彼人有特別的才，伊做的工，別人僫做，共伊看做是生成。總是事實毋是生成--的，是，「天」共伊生成--的，是信仰共伊生成--的。若有得著siāng款的信，逐个攏會。

世間人講，黃金萬能；」總是信徒是「信仰萬能。」做信徒至少著經驗對信仰無一項天國的事僫做。

欲予教會發展，毋是欠缺別項，只有欠缺一粒細細的芥菜子的信仰nā-tiāⁿ。今仔日咱所得著的信仰，是親像真闊的園；若是所咧潤澤的水，是淡薄仔 nā-tiāⁿ。連鞭進，連鞭退，連鞭熱心，連鞭冷淡，連鞭獻身，連鞭顧己。這攏是無有信仰的潤澤！

  向望今年，咱對這較進步，對明確的信仰來揣步，對明確的信仰來揣出濟濟工來做。毋是別人共咱揣，是咱家己著揣；毋是別人叫咱做，是咱家己著向前去做。這才是有活命，有信仰的信徒。總是人若利己，顧己，伊是已經離開上帝。

咱逐日甚麼工？行好，疼人，這是要緊；總是咱未記得對上帝的行好。就是幫贊教會較有力，予福音較著現佇社會中，照顧上帝的名夠額予人通降服。

信徒若逐个得著這款的洗禮，教會隨時，變做真有力。上帝揀召咱來信伊，福音予伊有力，有發展。所以通知逐个信徒有濟濟工，也彼个工，就是上帝的祝福。咱無經驗上帝的祝福，是因為咱無咧發見咱所著做要緊的工，親像寶貝佇園--裡，無去掘，無去揣，就袂通做咱的。

第二年的三年運動，愛咱傳教師佮平信徒逐人揣出所著做的工，逐日有定著的工，逐禮拜有定著的工，毋是攏著siāng款，是彼个地方所欠缺--的，向望逐區有伊的特色，通相激勵。按呢咱第二年才會較進步。也本部也是咧揣本部所著做的工。

  2.工作。(1) 赴中會佮備辦報告書提出中會。(2)準備三運叢書的刊行。因為印刷所的都合，袂得通較早刊行，實在真遺憾。(3)準備4月東部區佮大甲，新竹，桃園區特別傳道。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461