牛
1937年4月625期 7-8
今年是牛年，愛來講淡薄牛話。
牛是勤勞從順的動物，是台灣農業界的功勞者。總是毋知是四跤扛一个肚，生做毋好看的因端，抑是怎樣佇咱的俚謠罕得呵咾，較濟是用牛做看輕佮恥笑的材料。
1. 濟牛踏無糞。牛的身軀真大不止鎮地，毋但按呢，大隻動物攏較無團體統制的智識，踏糞的時步調未和，反轉愛相踏。佇現在的教會，毋是欠用人物，是欠用合一佮相疼的精神，因為雖罔有人物，猶過若是驕傲，激身分，無疼心，結局毋是會予教會和平佮進步，是予教會成做角逐的所在nā-tiāⁿ。
2. 一隻牛起兩領皮。款待家己較厚，待遇別人較薄。所以有時會生出不近情理的要求，咱的教會拍算若有用心比心的相款待(會友對傳教者相互間)就毋免按呢。
3. 騎牛揣無牛。拍算毋是精神病，也毋是健忘症，是精神恍惚的因端。聖徒的信仰冷淡，拜上帝僥疑上帝，看無明耶穌，也是無有真劍的真理追揣的精神。
4. 烏牛大影。敢是有名無實的意思，咱的教會對受奮興了後，逐位加添人額不止通歡喜。總是毋是求道者的增加通歡喜。上要緊著到佇大家有得救的憑據，若無，就變做冇蟳(蟹)夯人，用教會做休憩所nā-tiāⁿ，無意思佇咧。
5. 青盲牛毋捌虎。檢采是有勇無謀的意思。基督徒佇世間著有理智，來分別遮的神佮行做的是非。世間有濟濟魔鬼佮罪惡，所以著致意清氣家己。耶穌講，我差恁是親像羊入佇豺狼；所以著智識親像蛇......
6. 牛聲馬叫。講話無細膩溫純；有的會友檢采猶會chhoh歹喙，gâu詈罵人。向望新年換新的喙通呵咾主；遐的受咒詛的舌著佮除夕做伙除去。
7. 吳牛喘月無膽量。做基督徒驚人笑，毋敢佈道講道理分人聽。向望新年得著聖神賞賜咱神靈的舌予咱好膽認基督，變做活水江河。
8. 牛鼻毋拎欲揪牛尾。合理的事毋做，攏是欲做無理--的來惹災禍。凡事無論團體抑是個人攏著照法度；無視道德佮規矩的人，的確拄著彼个艱苦。對這个所生出的傷痕毋是遐快無去。
9. 人心肝牛腹肚。心肝是人--的，理氣明知。總是貪慾無度，吞食別人的財產。掠吞六國做英雄，袂記得是霸道。社會裡有濟濟詐欺橫領的事件，攏是這款人心肝牛腹肚的怪物的產物。
10. 心肝較大牛肺。愛賭博，欲彩票彼款人的心理sú-tú是按呢。總是著記得做人要緊著安居以俟命，毋通行險以僥倖。
11. 荏牛厚屎尿。教會內若有這款會友真費氣，冷心罕得來禮拜。閣捾一支喙批評牧師按怎，傳道按怎；長老按怎，教會按怎。總是攏毋捌想本身按怎；這款會友較好著食健胃顧腸丸抑是神通散。向望今年較勇身命，通加添教會的氣力。
12. 老牛逃車後。真濟教會，特別草地教會較濟人來赴禮拜無甚物赴時間。真無時間觀念；無論甚物事時間著遵守切切毋通有老牛逃車後的體態。
又閣教會現時是當活動，有濟濟事務會友著進前鬥援助。看教會親像家己的，無惜著磨，按呢咱的教會才會興起。所以亦莫得學老牛逃車後，著踴躍進前。
(康佳音寫)。 |
