首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄
雜錄
卷期：第625號 本次： 日期：1937/4 刊名：台灣教會公報 頁數：13-15
篇名：雜錄 [ Cha̍p-lio̍k ]
作者：
  顯示 : 漢羅 全羅 並列  

雜錄

1937年4月625期     13-15

 

I. 上帝的奇妙。

吳Phau寫

 

我一个第三兄嫂，是Chú-chhiong的家母，我的三嫂是對少年的時破病傷重，死無去，紲舌根絚，耳孔重；若欲叫伊，著真大聲，較常攏用加倍力才會知影。伊咧講話攏是一句會明，閣講就用比--的。也伊的性素是真歹，攏毋通患著--伊，若患著--伊，就直直嚷袂煞，愛人的物，人若毋予伊，就愛怨恨人，看著彼个就睨人；真歹性地，閣貪心。伊的囝兒為著伊的老母這號性素遮毋好，就逐日替伊祈禱上帝，來感化伊的老母對心底共伊改變拜上帝，若無將來是袂得著救，為著按呢伊的囝兒真煩惱，不時咧掛慮。

閣我的三兄佮伊的二囝，3囝Chú-hoê攏過身。閣佇舊年4月5號，吳Chú-chhiong是大囝亦過身去。啊！真可憐，看伊咧煩惱，逐日流目屎，攏無安慰。若欲共安慰，講予伊聽，lī袂曉聽，若看伊咧煩惱，心袂免替伊傷悲。若欲叫伊來替伊祈禱，伊閣毋愛，講禮拜毋好，講伊的丈夫佮大囝Chú-hoê攏死，伊毋愛禮拜。所以無法度通予伊捌主，來受安慰。雖是按呢，阮亦是暗靜咧替伊祈禱，求主特別來救伊，免到佇絕望的所在。感謝上帝，有聽阮的祈禱，伊的查某囝Chú-to͘，亦寫批拜託先生，替伊的老母祈禱，Chú-to͘本身一日5擺咧替伊老母祈禱。

佇新曆12月13日，阮的敝會有受聖神充滿，5擺光入來，是禮拜下晡3點鐘的時，大大細細攏跪落--去，逐个啼哭認罪。有怨恨真久的，彼時攏認罪相赦免。有看著Chú-chhiong出現，手提一本冊，徛佇拜堂的台頂。閣也有看著耶穌的十字架，耶穌釘佇遐，頭殼戴刺的冕旒，血流滿身軀。看著的人身軀攏掣，坐袂 牢，仆佇塗跤，人才共 牽起來，問伊是有看著甚物，伊才講，看著耶穌佮Chú-chhiong。

我的三嫂佇13暗咧睏的時，講伊的囝Chú-chhiong來chhoā伊去看天堂。咱欲thài會知這个事是真--的，就是看伊thin-nih猶未光的時，peh起來佇廳裡，跪咧祈禱，亦咧吟詩，阮就攏走倚來問伊。伊就講Chú-chhiong-á來chhoā伊去，講Chú-chhiong佮阮三兄佮Chú-hok，Chú-hoê攏無死，佇遐真光，穿衫真長，無看著跤蹄仔，講Chú-chhiong的帽仔有一粒珠真光，講遐無塗跤，無暗，有咧吟詩彈琴，也有囡仔。真歡喜，講Chú-chhiong有chhoā伊看獅。Chú-chhiong 共伊講，你若閣貪心人的物，愛拍人，愛怨恨人，別日仔欲共擲對遮予獅咬，用火，用蟲，用蛇咬伊，攏看著。共伊講，若閣做按呢的歹，攏欲予伊佇彼內面艱苦，用這來予伊親目看著。叫伊著禮拜，愛祈禱才袂佇遐，伊就真驚，共Chú-chhiong講，伊欲拜上帝啦，講Chú-chhiong教伊吟詩。

真感謝上帝，taⁿ逐日攏有咧吟詩，祈禱，耳孔紲有聽著。若阮咧祈禱，講心所願，伊亦講心所願。家己真gâu祈禱，攏家己咧講，亦四界講予人知天堂無土，講毋通拍人，毋通罵人，毋通貪心，講伊taⁿ毋敢啦。講伊的囝攏無死，講佇遐真好，taⁿ袂閣哭，攏無煩惱啦。

真感謝上帝，拭去伊的目屎，有疼痛微細的女婢，閣是卑微的家，今仔日有顯明主的奇妙。Ha-lé-女-iā！

紲共宋博士佮張Heng-în先生大大說多謝。

  II. 台南長老教女學校校友會。

列位校友平安，收知。

天氣漸漸燒熱，向望列位gâu保重貴體。

佇母校50週年的祝賀會，咱大家得著相見的福氣。若siūn-著對2月11-14日，彼个情形，無論是音樂會，祝賀會，運動會，校友會，歡迎會，親牧會種種的事，彼个印象真深，到佇今仔日；彼个歡喜，是予咱一世人無袂記得，實在是chhoā咱閣倒轉佇囡仔時代的學校生活。咱的心袂禁得大大感謝上帝，對古早到現今，大大祝福佇疼伊的人的工作。

總是亦不止數念有先生佮校友真濟袂通出席，設使若會通齊出席，彼个歡喜，毋知欲加添偌大。

佇今年校長實川先生，有佮咱校友會聯名發800張的批予校友，其中真濟閣提倒轉，驚了是住所變更，所以批無到位。對恁真不住，失禮。拜託若有無接著批 ，抑是母校50週年祝賀刊的人，費神恁寫批通知校友會的役員會，阮就設法寄予恁；亦通幫贊阮會通閣整理名簿較好勢。

閣愛通知一項，就是佇校友會的時，咱有接著老先生文姑娘的批，咱非常的歡喜。所以咱校友會有拜託Bí姑娘替咱摃電報去共文姑娘請安佮說多謝，紲恭喜女學50週年。文姑娘接著電報的時，滿心袂講得的歡喜。伊感謝的目屎，旺旺直直流落。想著過去50年前，上帝的恩典紲到佇今仔日。伊感謝無量。

  Taⁿ愛將文姑娘的批印佇遮，予無來赴會的校友知影：-

 

=====

 

所疼的學生，以及校友會列位的朋友收知。今仔日特別因為50週年的祝賀會 ，愛共大家請安，恭喜。

我直直數念遮的早時的事，我佮朱姑娘代先佇開學的時，有19个學生通教，佇遐的日，遐的學生的中間，真濟是已經過身。總是有的佇咧，我大大咧數念恁逐人的名。

恁的聚集，實在是真好，真心適的會。我非常意愛通佮恁做伙。這較毋免講。雖罔身軀袂會佇遐，猶對祈禱，對數念，我的心神實在欲佮恁做伙佇咧。對疼恁的心，共恁恭喜，紲向望將來彼个工的那進步，紲對主本身得著祝福。願咱這間學校照光，引chhoā人真濟來信主耶穌。予人得活命，自由，敁放，就是伊nā-tiāⁿ。

紲數念遐的咧擔當這个工的責任的人。願聖神共in充滿，予in得著智識佮仁愛，到通予in日日勇壯盡本份。

我要緊欲寄恁一chām的聖經，就是保羅為著以弗所的聖徒所祈求的福氣，真會合咱今仔日的欠用。願聖神做成佇咱逐人的心(以弗所1：15-23)。

願主耶穌基督的恩典佮恁的神相佮佇咧。

                                                   (文--氏安寄)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461