首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 著傳基督佮伊的十字架
著傳基督佮伊的十字架
卷期：第626號 本次： 日期：1937/5 刊名：台灣教會公報 頁數：11-14
篇名：著傳基督佮伊的十字架 [ Tio̍h Thoân Ki-tok kap Si̍p-jī-kè ]
作者：吳義勇 Gô͘ Gī-ióng
  顯示 : 漢羅 全羅 並列  

著傳基督佮伊的十字架

吳義勇

1937年5月626期           11-14

 

上帝佮人的中間只有一本冊，會予人捌伊，也只有一个中保，予人對伊來親近上帝。聖經是上帝寫成的冊，耶穌是對上帝的道來成--的，耶穌講，恁研究聖經共我做干證的，就是這本聖經。咱做信徒的人最要緊，就是愛知捌上帝佮耶穌。保羅佇哥林多前書2：2有講，「因為我決斷佇恁中間毋知別項，只有知耶穌基督釘十字架nā-tiāⁿ」。保羅是真博學的人，伊原本也是知影真濟項的代誌，毋過伊為著救人的事，所以毋講別物，只有講耶穌基督釘十字架的道理nā-tiāⁿ。咱做傳道理的人，所著知的也是這點，一生所著傳的也是佇這點，可惜人知影真濟項的學問，所以紲袂通將耶穌的十字架來舉起。哥林多前書2：2，一節的聖經有3項要緊的代誌......是人得救的根本，這就是耶穌基督佮伊釘十字架的事。因為耶穌基督是獨一的救主，釘十字架，就是獨一救世的方法，若無有耶穌基督，咱就無有救主，只有耶穌才會拯救咱nā-tiāⁿ。

1)     因為伊是上帝獨生的囝。佇使徒行傳4：12有

講，「除去耶穌以外無有別的拯救。因為佇天下無賞賜別的名佇人的中間，予咱踮佇伊來得救，」這是真實的事。我看除去研究聖經以外，無通揣出拯救的方法。世界的宗教真濟，毋過只有耶穌遮的予人得著救。因為耶穌是對上帝遐來，伊是上帝的囝，伊是墓上帝的使命來世間，拯救世間一切的罪人。佇未降生以前，已經佇舊約創世記3：15有講起，「這个婦人人的後裔欲傷你的頭殼。」這个婦人人的後裔是指主耶穌。佇以賽亞7章也有講，「的確有在室女懷孕生囝。」這是預言耶穌是對在室女來生--的。耶穌未出世佇以前就有預言耶穌出世佇伯利恆。總-講，耶穌是第2个亞當，是對上帝的神感動，在室女來生--的。對道成做肉體，有人講這無合生理學，毋過這正正是超越科學的法則來生--的，佮證明耶穌是上帝的囝，伊用特別的奧妙來生，閣再表明耶穌毋是亞當的後裔。

上帝創造人有4个方法。

(A)   是有爸母來生，是有男有女。

(B)   是無男無女做出來的。

(C)   有一男無女造出來的，親像夏娃。

(D)   是有女無男造出來的，是親像耶穌。

我想創造人已經用這4个方法，毋過世間人，對第一到第3个方法攏無攻擊，卻攻擊彼个第4个方法，毋信耶穌是對在室女來生，所以有人毋愛講這个題目，來用家己的方法欲來救人，欲來較贏上帝的方法。甚物人知影上帝的智識咧，上帝的智識最上低的，也贏過人的智識。

2)     耶穌是無罪--的。耶穌是一个無罪的人，但礙世間人逐个都有罪，所以世間人袂會通做救主，獨獨是耶穌家己無罪，只有是為著人的罪來釘佇十字架；行洗禮約翰干證耶穌講，「伊是上帝的羊羔，擔當世間人的罪過的。」羅馬人書5章有講，「因為基督佇咱猶做罪人的時替咱死，因為上帝的疼就顯明佇咱的中間。」。這是講耶穌的死，是因為你我的罪來死，伊是獨一的救主，咱有看見耶穌是咱的救主；伊無罪，又閣替咱的罪，予咱得著稱做義。耶穌這款的死，是證明上帝的囝是咱的救主。

3)     因為耶穌有對死閣活。耶穌的閣活是一个大的神蹟；伊予人釘死了後就埋佇墓裡，過3日就對墓裡閣活。伊的閣活是證明伊是咱的救主。耶穌的閣活，是叫逐人著知，別的宗教無有講起閣活的道理，只有基督教才有；當時講閣活猶是受政府的禁止。耶穌閣活這个題目，就是五旬節後頭一的講道理題目。保羅先生講若是基督無閣活，阮所傳的就變做空空，恁所信的也是空空。感謝咱的救主，伊有閣活，伊也踮佇上帝的大爿永遠活佇咧，伊也欲閣來迎接咱。論到別宗教的教主，in都無閣活，都袂會救咱脫離罪惡，免入佇地獄的艱苦，只有耶穌死了有閣活，所以伊才有這款的能力。

  Taⁿ愛講一个譬喻予恁較明：從前捌有兩个人跋落水，拄拄欲淹死的時，岸頂有一个人趕緊放一條索仔落去救in，彼兩人看見彼索仔，就緊緊搝牢，岸頂的人就出力共伊搝起來，拄拄到一半的時，忽然有一塊大柴流到佇in的身邊，其中一个看見彼塊柴遐爾大，閣浮佇水面，就想伊所搝彼條索仔真細條，就放拺彼條索仔，就去mo͘h彼箍柴。總是一个猶搝牢彼條索仔攏無放冗，到尾予人共伊救起來，但礙通可憐！彼个中途放彼條索仔，去攬彼塊大柴的人，後來佮大柴流到大海受kek死。怎樣大塊柴袂救人，細條索仔反轉會救人咧？不過彼條索仔是佮岸頂的人有關係，大塊柴雖然真大，究竟是佮岸頂的人無關係。

列位看報的兄姊，耶穌是咱的索仔，伊雖然是散凶，受人看輕，怨恨，予人釘死，毋過耶穌講我是對天爸遐來--的，我也欲歸佇天爸。伊已經閣活上天，轉去到上帝的所在，耶穌是親像對岸頂放到水中的索仔，叫咱著趕緊搝予牢，就通得著救。佇世間有濟濟的宗教，外觀雖然真好看，所講的也是仁義，道德。In也教人著做好人，毋過in干焦予人佇水面咧漂流nā-tiāⁿ ，卻袂會予人的靈魂永遠得著救，只有主耶穌獨一的救主，因為伊是對聖神感動在室女來生--的。伊無罪，只有是擔當咱的罪釘佇十字架，佇遮來成做人類獨一的救主。保羅先生講，「我只有知耶穌基督佮伊的釘十字架nā-tiāⁿ。」咱也應該講，我只有知耶穌基督佮伊的釘十字架nā-tiāⁿ。

以上所講，耶穌是獨一的救主，若是這馬所欲講，十字架是獨一的救法。佇希伯來書有講，若是無流血，罪就袂會得通赦免，咱若詳細用心來研究聖經，就看著對創世記到啟示錄有一條血線直直透落--來。咱著知，無流血，就無有赦免；無赦免，就無有得救。佇希伯來書9章有講耶穌用家己的血，只有一擺入聖殿成做永遠贖罪的代誌。現在因為對耶穌一擺的流血，會通得著幾若項代誌來講佇下面。

1.    成做永遠的救贖。彼得講，「咱得著贖罪，倚靠基督的寶血。」在早以色列百姓犯罪，愛倚靠羊羔來擔當人的罪，總是耶穌是上帝的羊羔，是擔當世間人的罪過，因為按呢，伊就成做永遠的救贖，以色列人出埃及，著用羊羔的血抹佇門楣頂，佮左右的門徛，因為耶和華欲四界行來刣死埃及人，伊看見血抹佇彼个門楣等，佮左右的門徛，就定著盤過彼个門，這款的，上帝毋是為著人的行做，是因為血來盤過。列位，咱會得著救，毋是倚靠咱的行為，是倚靠耶穌的寶血。有人講，耶穌死了千外年，按怎今仔日的人猶會通靠耶穌來得著呢。這款的問題，就是因為伊毋知影耶穌對一擺的流血，會通成做永遠的救贖的事，予凡若信伊的血的人，就攏會對佇伊的血來得著救贖。

2.    會洗清氣咱的心。若有人講，甚物會洗咱的心啊？我就欲緊緊應伊講，只有主耶穌的血，會洗清氣，除去一切的罪惡佮污穢，只有主耶穌的血，會清氣咱的污穢，予咱比雪較白。

3.    會除去死的行為。遐的未信靠主的人真濟死的行為，閣有人想對靜坐(坐禪)來得著救，這也是死的行為，有人聽著烏鴉咧哮的聲，就掠做歹的兆頭，這也是死的行為。我有一擺去庄裡，忽然間，庄裡的人真奇怪的聲咧喝，予我真驚，我就緊問是甚物代誌？伊應講，我聽見烏鴉咧哮；我閣問伊，怎樣聽著遮爾驚？伊講聽著烏鴉咧叫，是歹的兆頭。列位，你想這敢毋是死的行為mah？佇舊約的時，這位大先知，就是以利亞，上帝勸密伊佇約旦河東爿Ki-lia̍p的溪邊，上帝吩咐烏鴉來飼伊，按呢烏鴉早暗攏咬餅佮肉予伊食。請想以利亞看見烏鴉飛--來，伊敢會奇怪著驚mah？我知伊定著袂，只有會大聲呵咾主，感謝主。講到死的行為，毋但干焦無文明的所在nā-tiāⁿ，就佇文明的所在也是有通看死的行為，萬國的人也有，只有信靠主的寶血的人才無。

4.    會叫人服侍永遠的上帝。咱前逐人攏是咧服侍魔鬼，taⁿ咱是倚靠主的寶血來佮上帝和好，閣會得通服侍上帝。佇遮，因為伊用伊的寶血開這條路，叫咱通到上帝的面前，感謝主！咱前是服侍家己的私慾，這馬咱是倚靠主來服侍上帝啦！

5.    會得著永遠的家業。彼得先生講，信靠耶穌通得著天頂的家業，佮會通做上帝的囝兒，相佮做上帝的後嗣，來承受上帝的家業。你想這敢毋是真富足mah？
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461