Kéng-séng
Gô͘ Chheng-ek
1937年5月626期 22-23
1. Sîn-jiah. Tuì-tiōng kiâⁿ sîn-jiah i-pīⁿ, khah kè-thâu tī thoân Hok-im--ê; chit khoán ê sìn-gióng sī guî-hiám. Kiâⁿ sîn-jiah i-pīⁿ sī sím-mih ì-sù? Sī beh hō͘ lâng séng só͘-huì oē tit-tio̍h pīⁿ hó, á-sī beh hō͘ lâng tit-tio̍h jio̍k-thé siōng ê an-choân kap siám-pī bo̍k-tek, kiám m̄-sī uī-tio̍h Hok-im kap uī-tio̍h beh hián-bêng Siōng-tè ê êng-kng? Beh ū ké Ki-tok, ké Sian-ti lâi lán tiong-kan. Lán tio̍h kéng-séng m̄-thang ji̍p tī bê-he̍k.
2. Sià-bián. Siōng-tè ū sià-bián lâng ê choē, sè-kan lâng ia̍h tio̍h saⁿ-kāng sià-bián. Ū lâng chin gâu ēng chit nn̄g jī "sià-bián". Lâng nā-sī tuì "sià-bián" lâi bat Siōng-tè ê un-tián bô hān-liōng, kap bat lán èng-kai tio̍h hoaⁿ-hí sià-bián lâng, che sī tio̍h. Chóng-sī nā ū lâng siūⁿ kóng, lán thang chia̍p-chia̍p choè m̄-tio̍h lâi kiû Siōng-tè ê sià-bián, ia̍h bô siūⁿ lán tio̍h sià-bián pa̍t-lâng; án-ni sī hui-siông ê gō͘-kái. Lán thang bô tiâu-kiāⁿ sià-bián hiaⁿ-tī, chóng-sī m̄-thang iàu-kiû kóng lí kiám boē thang tī Ki-tok ê thiàⁿ sià-bián goá mah?
3. Tē uī. Ki-tok-tô͘ tit-tio̍h tē-uī ê sî m̄-thang lia̍h-choè thé-biān, lia̍h-choè êng-kng lâi khoa-kháu, hoán-tńg tio̍h mî-ji̍t khoà-lū, beh cháiⁿ-iūⁿ lâi chīn i ê sù-bēng . Choè chi̍t ê Ki-tok-tô͘, ia̍h m̄-thang khoa-kháu kóng goá sī hó-lâng, chiū-sī tio̍h tē-it gâu hoán-hoé kap jīn-choē. Ki-tok-tô͘ só͘ thang khoa-kháu ê m̄-sī tē-uī kap bêng-lī, chiū-sī Chú Iâ-so͘ ê Si̍p-jī-kè.
4. Kám-chêng. Goá ēng hó kám-chêng hō͘ lí, chiū lí ia̍h ēng hó kám-chêng hō͘ goá. Goá ēng pháiⁿ kám-chêng hō͘ lí, chiū lí ia̍h ēng pháiⁿ kám-chêng pò goá. Chin-lí, chèng-gī poah chi̍t-piⁿ, bān-sū tuì-tiōng lâng ê sim-ì; che sī bô ha̍h tī Ki-tok-tô͘ ê tō-lí. Lán tio̍h saⁿ-kap kéng-séng thàn Chú, m̄-thang thàn jîn-chêng.
5. Tiong-li̍p . Ū chi̍t khoán ê lâng chú-tiuⁿ kóng i sī tiong-li̍p. Che sī chhin-chhiūⁿ bi̍t-pô tī chiáu-siù(鳥獸) khí-thâu beh chiàn-cheng ê sî kóng i bô sio̍k chiáu, bô sio̍k siù, tio̍h chún i tiong-li̍p. án-ni khí-thâu chú-tiuⁿ ê bi̍t-pô kiat-kio̍k sī uī-tio̍h ài siông-siông tiàm tī sèng-lī. Chhin-chhiūⁿ án-ni ū lâng ài sêng-kong tī sè-kan kiû bêng-lī; chóng-sī koan-hē Siōng-tè ê sèng-kok chiū koat-toàn m̄-sī án-ni. Siōng-tè kap Mô͘-kuí ê chiàn-cheng boē oē iông-ún lâng ê tiong-li̍p. Thian-tông kap tē-ga̍k ê tiong-kan, ia̍h bô ū tiong-li̍p ê só͘-chāi. Nā m̄ sī oá Siōng-tè, chiū-sī oá mô͘-kuí. Só͘-í lán choè Ki-tok-tô͘ tio̍h ū koat-toàn-tek, bêng-khak, sì-chiàⁿ, kian-kò͘ ê sìn-gióng. Tio̍h kéng-séng m̄-thang ū tiong-li̍p-tek ê put-sìn-gióng.
