Nái-bān-ke ê siáu[sic]-lú
1937年6月627期 20
1. Kó͘-chá ū chi̍t toā kiông-kok,
Só͘-chāi sī tī Iû-thài kok ;
Miâ-jī chheng-ho͘ chò A-lân,
Chē-chē toā-hô kap bêng-san.
2. Chia ê thô͘ sī chin puî-suí,
Tong-sî Lia̍t-kok pâi thâu-uī ;
Hoe-chháu, chhiū-ba̍k ke̍k bō͘-sēng,
Goā-lâng ài khoàⁿ chit hō kéng.
3. Ū soaⁿ miâ chò Lī-pa-lūn,
Hn̄g-hn̄g saⁿ tuì sī Hek-bûn ;
Téng-bīn lóng chèng pek-hiuⁿ-bo̍k,
Sǹg sī chhiū-tiong hó-liāu chok.
4. Tāi-má-sek sī in kiaⁿ-siâⁿ,
Lâu-tâi, koân-thah kài ū miâ;
Tiau-khek oē-siōng chin-chiàⁿ suí,
Kiàn-tiok iâⁿ koè chin chē uī.
5. Goá taⁿ m̄-bián siông-sè lūn,
Chhiáⁿ kóng kok-tiong chi̍t chiong-kun;
Miâ-jī chheng-ho͘ kiò Nái-bān,
Chin Sîn ēng i pêng tāi-lān.
6. It-seng chò lâng chin eng-hiông,
Tit-tio̍h kun-ông só͘ tiōng-iōng;
Khó-sioh āu-lâi siū put-hēng,
Choân-sin hoat-siⁿ thái-ko pēng.
7. Suî chhiáⁿ bêng i lâi tiau-tī,
Khang huì chîⁿ-gîn bē thang i;
In-uī che pīⁿ sī chin ok,
Lāi-bīn hoat-chhut ū toā to̍k.
8. Chá bat kap Í-sek-lia̍t chiàn,
Lia̍h-tio̍h chi̍t-ê lú siàu-liân;
Tiâu-tî chhoā kàu i ê chhù,
Hō͘ i chò kán chhe cha̍p-sū.
9. Siàu-siàu liân-liân lī pún-hiuⁿ,
Lī-pia̍t chhin-lâng kap tia-niû;
Nā ū hiaⁿ-tī kap chí-moē,
Bē thang kap in koh chò-hoé.
10. Tī-chia moá-bīn só͘ khoàⁿ-kìⁿ,
Lóng-sī chhiⁿ-so͘ sit khiam-pi;
To̍k-to̍k chin Sîn bû put-chāi,
Chò I kiáⁿ-jî I chin ài.
11. Kî-tiong ū ò-biāu ê ì,
Goá taⁿ put-tek-put kóng-khí ;
Tio̍h chai Nái-bān pún ū la̍t,
Jiám-tio̍h thái-ko sim phah-kat.
12. Chin Sîn te̍k-ì beh kám-hoà,
Beh ēng siáu[sic]-lú thang thoân-oā ;
Ū tuì i ê chú-bó kóng,
Goá siūⁿ chú-lâng ê khó͘-thàng.
13. Chí-ū goán kok ê kiaⁿ-siâⁿ,
Chi̍t-uī Sian-ti chin chhut-miâ ;
Tek-khak ē i chit khoán pīⁿ,
Chhiáⁿ tio̍h khí-sin tuì hia khì.
14. Nái-bān si̍t-chāi chhoē bô hoat,
I-seng ia̍h bô sím-mi̍h koat ;
Taⁿ tuì siáu[sic]-lú chi̍t-kù giân,
iàu-ì chàu-bêng tī ông chiân.
