首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄 (1)
雜錄 (1)
卷期：第627號 本次： 日期：1937/6 刊名：台灣教會公報/芥菜子 頁數：27-30
篇名：雜錄 (1) [ Cha̍p-lio̍k (1) ]
作者：
  顯示 : 漢羅 全羅 並列  

雜錄

1937年6月627期     27-30

 

 I. 東部教會五年來的進步。

  1. 五年前有去後山，彼時幾若个求道者有咧讀白話字，有學吟詩。這擺閣去，拄著in已經領洗禮入教會，閣也有引chhoā in的丈夫佮囡仔。

  2. 以前後山的教會無半位有獨立。Taⁿ有兩所在的教會進步到獨立；請牧師也出力咧幫贊in的支會。

  3. 幾若所在的教會有咧設法欲起新拜堂，抑是修理宿舍，也有的咧想欲設幼稚園。

  4. 彼爿的教會有真感心的會友。無嫌路遠，偝囡仔行三點鐘才到拜堂，猶過有常常來赴禮拜。毋但按呢，佇in沓沓做家庭禮拜，紲引chhoā in隔壁的人。

  5. 有所在的佈道隊盡忠，in的姊妹有四界去佈道，致到有人有買自轉車，無嫌艱苦來鍛鍊到會曉坐，通去到遠遠；或是山跤抑是真濟庄裡的所在傳道理。毋但按呢，猶原有相佮聚集家庭禮拜；順機會請in所捌的人來赴，用上帝寶貝的道理講予in聽。

咱大家個人個人若學遐的姊妹的款式，設法咱的工到有時間通出外做耶穌的干證，我確信閣無久，咱台灣的百姓較大部分的人，欲有機會通聽見得救的道理。(Bín Má-lī)

 伊I. 有益的譯話。

    (歹中揣好)

柯設偕

對歹的中間發見好。

在早羅馬真出名的雕刻家Michaelangelo，一日行路的時，佇路邊看見一塊沐塗真垃儳，真歹看的石頭。

伊就共伊抾起來，提轉去伊的厝洗清氣，後來用伊的槌仔佮鑿仔來雕刻，做一个真好看的雕刻品。

到佇現今這塊雕刻的石頭，是出名的雕刻品，是予世界所珍重--的。這塊石頭佇路邊，羅馬的人逐日káng千káng萬，對彼條路經過，攏看這塊石頭看毋起，看毋上目；是人所無注目--的，是人所無愛挃--的。Michaelangelo有抾起來，共伊雕刻，予伊成做世界出名的雕刻品。

雖然是人所毋挃的物，猶過成做世界的珍重。

這是對佇Michaelangelo對路邊歹歹的石頭，揣出伊的好處，捌伊的價值。就是對歹的中間揣出好的點。

佇中國宋朝出名的學者周敦頵，有做這篇文名做「愛蓮說」，―是咧論起伊愛蓮花的意見。

內中有一句意思是講，蓮花雖然是出對土糜，總是伊的花無沐著彼个垃儳。

蓮花雖然是對真垃儳的土糜中發起來，猶過伊的花無沐著彼个垃儳，真清氣，真媠。這是對佇周敦頵對佇土糜中所發的蓮花，揣出彼个美點。

佇世間通講，僫得有完全好的物。對個人的始祖陷落罪以來，世間變做無完全的世間。人無完全，所以人人所創--的，人所建設--的，人所組織--的，自然也是袂會完全；因為人本身已經無完全啦。

所以咱的看法 ，毋通對好中揣歹：―親像俗語講，「吹毛求疵」「歕雞毛揣空喙」。著學這兩个gâu人，會曉對歹中揣出好點。

保羅親像所建置的教會，也是有濟濟的問題(參看哥林多)。

  詩裡有講，「極好事也有烏點」。人若過頭咧要求完全--的，有時反轉會失望。人若會曉對歹中揣好，就會得著濟濟利益。

  向望咱大家相佮出力學主的款式，毋是揣出人的歹--處，反轉是gâu同情，gâu體貼，gâu憐憫重罪的人。

 III. 信仰的公園。

(蕭樂善)

  1. 基督的教會欠缺上帝大港的水來灌沃；總是彼个水頭拍歹，致到無水通來。濟濟人無要緊欲修理水頭，家己開鼓井，家己供給。總是家己細細的井所灌沃的田園是極小灌沃的田園是極小部分，閣著出真濟力。家己雖罔會得著淡薄水，也看四界攏無水通潤澤，咱敢有平安？教會若變做個人主義的教會，已經是無上帝的神佇遐，是那失力。

感覺責任要緊著修理水頭有偌濟人？咱的先生常常出外，為著愛修理水頭，予大港的活命水會流到全教會，會友真毋愛。總是咱著安心，今仔日不止必要彼款的工。水頭若修理好，大家通得著潤澤，也彼个水猶原流入咱家己的教會。

  2. 有信仰著有明確。曖昧，雙面光，雙面好，這是畸形的信仰。信仰敢無教示咱愛得著一項，著一項放拺，做犧牲。愛得著兩項，是夠額智識，也是無夠額勇氣。為著驚人，抑是愛計謀甚物事，致到成做兩重人格的人，是咱所著警醒--的。喙講一款，心肝囥一款，行欺騙人，閣欺騙家己的良心。這咱無算做罪mah？著誠實，這是上帝對頭到尾的要求。「喙親熱，心奸惡，親像磁器安銀的渣滓」(箴言 26：23)。

  3. 「阮的過失佇你的面前加添濟濟，罪惡做干證告阮；罪過佮阮相佮佇咧，論到阮的罪過，阮攏知；就是背逆，毋認耶和華，越倒轉毋綴阮的上帝，講出制壓佮悖逆的話，心想白賊話就紲講出。閣公平轉轉退後，公義徛佇遠遠，誠實跋倒佇街路，正直也袂進入。誠實少少；離開歹--的，反轉成做受搶的物；彼時耶和華看見，因為無公義，就不止無歡喜」(以賽亞59：12―15)。

 IV. 持防假先知

  「著持防假先知」。因為有這句的警告，亦予咱通知，人若無細膩深想，徛在佇四正的sìn-chiàⁿ的信仰[sic]，就快快受假先知的迷惑。論先知的真，假的確毋是予人凊彩看會捌。若隨便予人看會捌，伊連鞭免賺食，亦無人會入迷惑，就世間亦無假先知。總是世間實在有假先知，in的假做真巧妙，常常予人躊躇毋敢拒絕伊，致到予教會拄著歹影響，彼个損害是非常。保羅對加拉太的會友講，「若有人傳福音予恁，各樣佇恁所捌受的，伊著受咒詛」。已經信來受洗禮。已經脫離罪惡的重擔，來踮佇主的恩典中的人，若是閣再僥疑伊本身的得救，僥疑聖神所做佇伊的工程，來追求人的新奇，世間的新款--的，實在是辜負主救咱的大恩。

總是咱欲怎樣來分別假先知，咱欲怎樣來家己徛在佇四正的信仰？有幾若點咱通注意的所在，咱通用按呢來分別佮持防：―

  1. 看in的信仰啥款？

  2. 看in有照聖經無？

  3. 看in有合道德抑無？

  4. 看in的態度啥款？

    1. 假先知猶原是傳主的名。In顯出真熱心較贏過普通的傳教者的款式。所以按呢，對外面來看的時，真僫得分別。總是若看到佇內面，就會知in的信仰是佮咱無siāng款。假先知的信仰是用人做中心，逐項事攏是利用上帝，求人的目的。要緊伊變的神蹟，袂記得傳福音，毋知kioh人的反悔，靈魂的得著醫好是閣較大，閣較要緊的神跡。In是對重肉體過頭佇靈魂。In的信仰的本質佮異教徒無各樣。是對人的動機來就近上帝，是為著人的上帝。按呢佮基督教的信仰有本質tek各樣的所在，所以若是自己本位的信仰，抑是平素的信仰生活無確實的人，卻快快入這號的迷惑，若是咱決斷著持防這號非信仰tek的異端。

  2. 頂面所講假先知的信仰，已經毋是有合聖經的信仰。閣in的教示佮所做亦濟濟毋合聖經。In所傳的道理攏是咧宣傳in共人醫病趕鬼。若是照聖經耶穌有禁止，莫得共人講。In是對重肉體，看人的破病是罪惡，較重罪的是死，人若猶活佇世間就是有信仰，就是無罪。這款的講法攏毋是照聖經。人若嫌in，in就隨時共人咒詛，紲宣傳in的咒詛的效力有予人死。In所捌的聖經是部分tek，照所愛來解說，in毋捌全體，毋捌真的意義，in的信仰佮聖經對反，欲thái會照聖經？

  3. 自己宣傳的誇口，膨風，講白賊，假做，遮的是道德上所袂得通容允得的事。道德上都袂容允得，信仰上欲thài會容允得。假先知白賊宣傳in會醫病，趕鬼，迷惑淺信的人。有人破病拄欲好，就講是in醫好。有人後來反轉較傷重，in亦毋知，四界宣傳講予in醫好。按呢反轉予人僥疑聖神的權能。閣有的全然無影，in亦宣傳某人病勢偌急，對in共伊祈禱就即時好。按呢實在是非常的白賊。

  4. 假先知的態度是非常誇口，閣假謙卑，敢隨便看輕無視別人的工程。In敢無視全世界的教會，講是魔鬼咧做工。儼然的事實。聖神的工作in敢無視，盲目tek(盲目的)的自誇，感情tek的酒醉，學別人的形容佮假做的音，親像狂人，聖神thái有踮佇彼款人的內面？有時假哭，顯出悲哀痛苦的聲音，顯出宛然親像地獄的款式，啥人會通承認in的所傳是真實基督的福音啊？

最後來講，假先知起初是較幼稚。後來受人嫌佮批評，in的喙雖然反抗，總是事實上in咧受教育。所以in漸漸會換in的方法，到都市就顯出較斯文，到鄉庄就閣照in的粗魯的法度。對全體來看，in經驗若濟，就會那約束家己來合眾人的要求，通得著人的歡迎。In的心底若實在變換來擒牢佇聖書tek的信仰，就in的工實在通做主的路用。總是in的受教育若干焦限定佇外皮，心底全然無變換，猶原是徛佇反聖書tek的信仰，猶原做物質tek，魔鬼的奴才，干焦進步佇閣較gâu假做in的外貌，就in的害教會是閣較傷重。所以咱著勤讀聖經，細膩來研究，求聖神開啟咱的心目，予咱會真實來捌聖經的根本tek的真理，予咱對按呢會徛在佇四正的信仰，毋免快快入迷惑。

  V. 訂正這條。

(北部編輯部)

教會報4月號第28面，北部中會第 23 條的記事，照編輯部會佇3月的議決，有下面所記的理由，所以愛取消。

  「北部中會第 23 條所報關係補助苖栗，公館的賑災慰問金，照部員的中間有人所聽見的，就是這條錢才託財務部去研究，看有通設法抑無？因為有這款的異議，所以議決這條毋免落佇教會報，紲託書記寫批共中會書記通知。」

  VI. 公告。

台灣大會聖詩部會所備辦的新聖詩試用版已經有獻予台灣大會，得著接納，通感謝主。佇這个新聖詩的生產期，有得著真濟的有志者特別鬥援助，或是金錢的寄附，抑是譜，以及歌詞的訂正，有鬥盡力，致意共大家說多謝。

總是真濟位有寄試用版去予in的，猶未收著in的寄附金的援助，佇遮愛拜託列位才較趕緊將所愛寄附的錢額寄來福音社(替振台灣二一八番)來鬥補充經費的不足。

用按呢說謝佮拜託。

                                                     (駱先春)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461