首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄
雜錄
卷期：第627號 本次： 日期：1937/6 刊名：台灣教會公報 頁數：8-11
篇名：雜錄 [ Cha̍p-lio̍k ]
作者：
  顯示 : 漢羅 全羅 並列  

雜錄

1937年6月627期     8-11

 

  I. 數念梅牧師

劉主安

  數年前我常常捌佮林燕臣牧師禮拜日去草地的教會禮拜。佇車內，抑是咧等車的時陣，我常常捌聽著林牧師講，早梅牧師佇台灣的時真熱心佈道，摃鼓，摃鑼，歕ラツバ，傳道理佇逐所在，可惜因為台灣的氣候無合伊的身體，致到袂通閣再來。

三年半前，我捌一擺chhoā學生去旅行，頭一擺到草屯，看見遐一間大的禮拜堂。彼時有對郭朝成牧師聽著講，「這間教會是對早梅牧師佇遮佈道所結的果子」。

閣我前佇女學咧做工的時，捌幾若擺聽著一位的先生咧數念梅牧師，牧師娘佮in的克己，大為著學校大援助的代誌。

我本身毋捌見著梅牧師。總是平素聽著這款的消息，兩年前我欲去英國的時，袂免得有這款的希望，就是講若到位，的確愛一擺來去見這位的牧師。我佇7月尾出發台南，9月中旬到位，隨時入學校佇Birmingham。

未出發的以前，我有佇公報社抄轉去英國的宣教師的住所，總是無抄著梅牧師的。閣入學了後真濟工，致到一時紲袂記得。佇10月尾有一位的先生(Mr. Mackie)來學校講演。講演後，我有得著介紹佮伊面會。Mr. Mackie的老爸是梅牧師的好朋友，所以有問我講，「你捌梅博士抑無？」。我就講，「我本身毋捌見著伊，總是常常捌聽見伊的名佮做工。我真愛得著佮伊相見的機會，毋知伊現時踮佇佗位？」Mr. Mackie有講梅牧師的住所，總是我連鞭袂記得，(起頭到位的時，外國的地名真僫得記)。過兩三日佇無拍算的中間，有接著一張批，是對梅牧師本身的。彼張批大略是按呢：「我有對我的朋友Mr. Mackie聽著講你有對台灣來，現時佇Birmingham咧讀冊。阮雖然離開台灣真久，總是猶過不止咧數念。你若佇歇睏中有來蘇格籣旅行，請才來揣阮。」後來有閣兩三擺的通訊，12月16日學校放假，我就出發訪問幾若位宣教師的家族，佇21日到蘇格籣。彼ê-hng就到梅牧師in的所在，就是Leⁿoxtown，離Glasgow約略10英里。我3日久佇in兜，毋但受牧師佮牧師娘的好款待，也得著濟濟教示，閣受真好的感化。欲離開的時，我心肝家己想講，在早耶穌的訓練學生，大部分是對人格的感化。三日久，所聽見佮所感的事真濟，總是來記淡薄就好：-

  1. 對梅牧師聽著早前台灣教會的消息，感覺真心適，閣有利益。梅牧師的台灣話猶過真熟，閣真明。伊捌共我講中部咧叫人名的時，較常用「a」做代先，若是南部是用「a」做路尾，親像阿Péng，阿萬，Péng仔，萬仔。有時聽著伊用真明的音咧數念阿罩霧，大社，葫蘆屯，大雅，牛罵頭。聽著真感激。

  2. 梅牧師佇十數年前離開台灣，起頭身體真健康，有去濟濟所在，講台灣教會的消息，有時也捌步行真遠的路站。後來沓沓拄著身體欠安。幾若擺有加真爽快，就想講無久會通閣過來，總是閣再拄著身體的阻擋，致到袂通照心所愛。現時較常攏佇眠床咧歇睏，有時捌淡薄的散步，真罕得通出席佇禮拜堂。

  3. 雖然身體有欠安，若是伊的心神真健康，數念台灣的心猶真大。牧師佮牧師娘佇早暗的家庭禮拜的時，常常讀白話字的聖經，逐日為著台灣咧祈禱，毋但為著教會的團體，也為著個人來祈禱。親像舊年宋博士來的前後，in佇遠遠有出力用祈禱咧援助。

  4. 梅牧師in的厝內有一支蔫脯的甘蔗佮一支ラツバ吊佇壁裡。我想彼支ラツバ就是林牧師定定捌共我講，彼支佈道咧歕--的。我捌聽人講早時佇田庄，囡仔若聽著ラツバ的聲就嚷講，「耶穌來啦！耶穌來啦！」

  5. 梅牧師in的厝內有一个山，不止親像咱遮的牛罵頭。六七年前林茂生先生捌到遐。看見就講，彼个果然親像牛罵頭。Stalker佇伊的保羅傳的(p. 124)有捌講，「早保羅佇該撒利亞的時，常常散步佇城頂，看著地中海的海水，面向Má-ki-tùn，亞該亞，以弗所的方向，心袂免得數念遐的教會，想講遐有咧欠用伊的幫贊。」親像按呢，梅牧師佮牧師娘，常常對in的埕裡看著彼个山親像牛罵頭，心肝袂免數念in前捌傳福音的教會。

佇英國捌有一个婦人人共我講，「梅博士對轉來了後，不時希望欲閣去，總是可惜予身體阻擋。佇台灣捌一位的朋友共我講，「我本身無甚物捌梅牧師，總是捌一擺佇大社的禮拜堂赴創立的記念禮拜，彼時的記得有一个老長老佇台頂咧數念梅牧師，講到流目屎」。

向望咱也常常佇祈禱的中間來數念in。

II. 澎湖教聲。

媽宮（翻註：馬公）：賴仁聲

不才來著任到今仔日，5月初3，拄滿一月日。Taⁿ將幾句報恁知阮的消息。

對台灣常常接著好朋友的批的探問，親像天交落月的歡喜。閣常常接著宣道會董事陳金然牧師的通訊激勵真感激。

有人問講，踮了有趣味無？實在真趣味。逐項都是新，奇異毋捌看。會友親切，不時予人送物，雞卵大粒，內面毋捌斷。宿舍頭前就是海，空氣好，魚鮮有，蹛了真爽快。

若是按呢人thái會講歹蹛？有影歹蹛：蠓厚，胡蠅厚，風飛沙坱，風真透，in遮的人講號做「戇風」透毋知煞，有時咧行拺倒退幾若步，無一叢成物的樹，無樹林，無溪仔，溝仔，水窟攏無，四界焦燥，攑目只有看著海佮天，抑是番黍，番藷園，焦燥燥，空lo-lo，行來行去撞著海，若受充軍佇一个海嶼，攑頭無親，無故舊的朋友通相安慰，人情風俗各樣。澎湖的話，真好聽，試寫幾若句。

先生lú io甚物人來。Taⁿ thin io-io欲落hiō loh，mài-èng tò-khù，若hai-thoē我io lú來khù海底掠hû抾loè-ah。

鄉下嫁娶新娘坐牛車，in遮的牛車是兩輪，無4輪的。鄉下的婦人人解跤穿鞋，鞋尾翹翹，頭殼包一塊烏布巾仔，頭前tin一个紅膨紗，實在真毋慣勢。

按呢taⁿ欲按怎？我想只有一項，就是甘願佮主相佮食苦，也佮遮的人同化，按呢就逐位是天堂。

教會一月日久的經過(1)頭一禮拜款行李，拚掃教會堂，宿舍內外。(2)第二禮拜總巡會友一遍。(3)第三禮拜，去探澎湖廳的要人，去訪問支廳長，警務課長，行政主任，高等主任，保安係長，視學，佮正廳的特務，行事，攏熟似，後來佮憲兵隊，該管的出所攏遮，就訪問街長，助役等等。後來就訪問行郊大商人，學校佮內地人信者等，大概重要的人攏熟似。

閣進一步佇第4禮拜天堂節彼暗，就開頭回的路邊佈道。早到taⁿ，當局真嚴，總是這pang主幫贊，當局大開恩門，准咱佈道，佇馬公家內無論甚物位攏通，總是著用國語來講。主幫贊我慣勢，無要緊，佇鄉下就通用本島話來講，透暗佇拜堂前約70人左右來聽，20外的會友來助戰。

也4月27日，阮有開澎湖宣道會所屬教會的教譯者會，這是第1回。阮有參詳主日學修養會，佮交通佈道的事。彼日，瓦硐夏宇先生，花宅廙Hong-liân先生，媽宮我本身來赴。開佇媽宮，可惜大嶼許先生袂得赴，因為通知無拄好。我5月中，若無阻擋，欲落去揣伊，向望對伊得著濟濟教示。

  四月30暗，頭擺聚集內台信者合併的家庭禮拜，彼暗有12名出席，紲參詳對5月9號起，每禮拜暗，欲特別開內台信者合併的禮拜。

其餘我佮拙內有去瓦硐訪問夏先生佮先生娘，細囝，看in攏平安，真歡喜。

也論施設修理。媽宮教會有修理門窗雨扇，新起浴間，也對我來，教會歡喜買新聞。

按呢大家活活重重咧鬥做。我真向望這个氣象，毋是一時的。求主幫贊阮，也恁大家替阮祈禱，予阮會用誠實的心來榮光主。

致意共大家請安。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461