三年運動特記
明有德
1937年7月628期 28-30
1. 有一擺一个老母chhoā伊的囡仔去料理店欲食晝。囡仔較毋捌禮數，給士捀飯佮菜來，就搶匙仔，連鞭拍垃儳桌頂。老母講攏無欲聽，愈嫌，紲愈攪擾。老母看對面桌有一个生份人咧食，伊感覺真見笑。彼个人代先祈禱才食，親像真斯文。老母想若予囡仔驚，看會恬恬袂；共伊講，你若遐歹，彼个人欲掠你去遠遠；總是囡仔也是無欲聽。後來來彼个老母好膽共彼个生份人下失禮，共伊講，伊的囡仔真歹，真僫約束，無啥物好方法通予伊順趁。
彼時真心適，彼个囡仔看伊的老母咧佮彼个人講話的時，伊恬恬，無咧攪擾。彼个人共伊講，你看，你的囡仔毋是歹，已經變做乖的囡仔。
這个故事檢采親像馬太15：21-28；可7：24-30，耶穌佮迦南的婦人人講話。對這站咱通將3項做參考。
(1) 基督教佮婦人運動。彼時婦人人佇猶太國比別國咧看婦人人卻有較進步；總是也是猶咧看婦人人做in的產業的一部份 (十誡的路尾條)。總是耶穌看平素予人看做下賤的，伊無看輕伊的人格，是看伊做毋是小可的人。
(2) 基督教佮家庭教育。彼个迦南的婦人人雖然是真gâu的人，伊家己無法度通教示伊的囡仔。拄著耶穌的時，才感覺伊的囡仔所欠缺--的。伊佮耶穌講話的時，是變做伊新的信仰生活的出發。對彼時起，伊的家庭的精神的確有變遷。
(3) 設教會佇異邦。耶穌看彼个迦南婦人人是親像熱心敬拜上帝，以色列家的一个。彼个婦人人佮主講話，也是感覺親像以色列家的一个。雖罔伊真保守，也是有貢獻佇異邦。以色列家是有貢獻佇異邦。以色列家是屬佇文明的世系，文明的根本是佇彼內面。
彼个婦人人感覺以色列家有真寶貝的精神，有人無得著袂用得的物佇咧。彼日通講伊的反悔，伊呵咾上帝無煞。對彼日起，出去行得救的路。
2. 聖經的要領(三運叢書2)
定價。20 送料。03。
發行所 台北市宮前町二五七 蕭樂善
(振替台灣 6804番)
已經預告久久，這擺印好。都合上對第2本刊行。聖經是咱的人生的地基；總是聖經親像佮咱的實生活離開真遠。本冊的目的，大概有幾若項：
(1) 愛幫贊讀聖經的人。若無咧讀聖經的人較無合用。
(2) 予咱所讀的聖經較會通活動，較袂感覺真僫。
(3) 所排列的是較神學tek的排列。欲解決咱的問題，毋是用局部的解決，是對基督教的本質來解決。
(4) 家己抑是別人欠安慰，欠力，欠幫贊的時，較快得著咱所欠的教示。毋免無當揣，抑是經過真久才得著。
(5) 佈道通對聖經得著真濟款的材料，通紹介上帝對世間人迫切的話，予人通對上帝的話來受感動。攏總的聚會通應用。
(6) 咱所捌的聖經常常是一部分，閣是敧一爿的信仰。這本愛幫贊咱捌全部，閣閃避重敧爿的信仰。
3. 「三年運動的總論佮實際」。(三運叢書1)刊行豫告(普及版)近刊。
4. 工作。照所計畫查經，救靈的工程現時逐區猶進行中。做工的人攏感覺現時是真好的機會，通傳報福音。逐位看見人不止較有咧追求永遠的真理。實在耶穌的福音夠額通補滿現代人的欠缺。向望大家好膽向前。詳細的消息後月會落。 |
