Chhiáⁿ thiaⁿ!!
(Ka Tiong:Kì-chiá)
1937年7月628期 10-11
Thiaⁿ! Thiaⁿ! Thiaⁿ! Chhiáⁿ thiaⁿ A.D.1865 nî 6 goe̍h 16 hō, Má I-seng, Tō͘ Bo̍k-su in tāi-ke thâu-pái tī Tâi-lâm chhī Khoàⁿ-sai-ke teh hêng-i, thoân-kàu ê siaⁿ. Koh bô kú, Tâi-lâm chhī-bîn giâu-gî, chhut jī-pe̍h, bû-loā toā jiáu-loān, kong-kek lé-pài-tn̂g ê siaⁿ. Í-goā tī āu-lâi ū loā-chē Thoân-kàu-su, Tióng-chip, jia̍t-sim ê hoē-iú, siū lâng cheng, phah, koáⁿ-tio̍k ê siaⁿ. In tī àm-hek ê tiûⁿ-bīn, soà kiù khi-hū in ê lâng. Chit ê siaⁿ, lán kin-á-ji̍t chin him-soān.
Thiaⁿ! Thiaⁿ! Thiaⁿ! Chhiáⁿ thiaⁿ kim-ji̍t siā-hoē teh o-ló kàu-hoē pēⁿ-īⁿ ê jîn-chû phok-ài. Kàu-hoē io̍k-eng sū-gia̍p tī siā-hoē teh chí-tō, í-ki̍p tī kàu-kài si̍t-chè teh oa̍h-tāng ê chèng Thoân-kàu-su, Tióng-chip, Chú-ji̍t-o̍h Kàu-oân, pò͘-tō-tuī. In kiám bô chē-chē sī chhin-chhiūⁿ leng-bó teh io eⁿ-á hō͘ i khùn.
Muí-nî 6 goe̍h 16 hō, sī Lâm-pō͘ siat-kàu ê Kì-liām-ji̍t. Kám-siā Thiⁿ Pē ê in-tián, iā kám-siā Soan-tō-hoē le̍k-tāi chèng Soan-kàu-su ê thiàⁿ-thàng, tī Lâm-pō͘ ū ēng chiah chē ê ki-koan lâi oa̍h-tāng. Tī 70 goā nî kú, Bó-hoē ê Soan-kàu-su í-ki̍p Pún-tó chē-chē jia̍t-sim thiaⁿ Chú ê sian-poè, ēng sim-chiâⁿ, lâu chē-chē hoeh-koāⁿ, chiah ū kin-á-ji̍t ê hiān-chōng.
Lán kin-á-ji̍t lâi chò Ki-tok-tô͘, tē-it tio̍h thè lán sí lâi koh-oa̍h ê Kiù-chú, iáu-kú m̄-sī án-ni chiū chheng-chhó, tio̍h ū chē-chē thiàⁿ Chú ê lâng hoaⁿ-hí hiàn chîⁿ, hiàn sìⁿ-miā lâi pò lán, poê-iúⁿ lán. Pó-lô chai-chèng, A-pho-lô ak-chuí, Siōng-tè hō͘ i toā-châng. Kàu-hoē ê hiān-chōng, si̍t-chāi iáu toā-toā khiàm chit 3 khoán ê kang. Só͘ sìn sī sím-mi̍h? Kàu-lí chē-chē lâng bē bêng (kî-tiong pún Tiúⁿ-ló-kàu-phài ê kàu-lí). Só͘ kóng só͘ thoân sím-mi̍h? Giân-hēng bē bêng( toā khiàm têng-thâu-siⁿ, chiâⁿ-sèng, chē-chē kò͘-chip piān-oē koáiⁿ).
Chhiáⁿ thiaⁿ! Kàu-hoē sī Ki-tok ê Sèng-thé, sī chiong-lâi Thian-kok ê iáⁿ. Tī kàu-hoē ê lāi-bīn , tio̍h ū moá-moá o-ló Chú, kám-siā Chú ê siaⁿ. Kàu-hoē sui-jiân tio̍h ū kàu-hoē ê chèng-tī, koh-khah iàu-kín sī tio̍h ū Ki-tok ê chèng-chhek: "Chhin-chhiūⁿ Ki-tok thiàⁿ kàu-hoē , iā thè i hiàn ka-tī, beh hō͘ i chiâⁿ-sèng."
Chhiáⁿ thiaⁿ! Chhiáⁿ thiaⁿ kì-liām lé-pài hiàn-kim ê siaⁿ. Hiàn 1 chiam, 1 kak, 1 kho͘......hiàn-sim, hiàn sin, hiàn siaⁿ(kiám-chhái lóng tìⁿ tiām-tiām, teh kiám-cha pa̍t-lâng).
Chhiáⁿ thiaⁿ! Sèng Sîn ê hong, hiān-sî teh toā chhoe tī hui-siông-sî sè-kài ê kàu-hoē. Tâi-oân ê Kàu-hoē tek-khak beh chiâⁿ Chú só͘ kéng ê Sèng-hoē. Hiān-sî lóng ǹg oân-choân teh chìn-pō͘, oán-jiân n̂g-kim lo̍h hoé-lô͘.
Chhiáⁿ! Chhiáⁿ! Lí chhiáⁿ!
