首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄：澎湖教聲
雜錄：澎湖教聲
卷期：第628號 本次： 日期：1937/7 刊名：台灣教會公報 頁數：11-14
篇名：雜錄：澎湖教聲 [ Cha̍p-lio̍k: Phêⁿ-ô͘ Kàu-siaⁿ ]
作者：賴仁聲 Loā Jîn-seng
  顯示 : 漢羅 全羅 並列  

雜錄

1937年7月628期   11-14

 

  I. 澎湖教聲。

  恭敬請安眾兄姊，這時我愛將5月澎湖的教勢報恁知。總是我愛求恁諒解兩項：-

  1. 所寫是親像用我做中心來寫；親像我有做濟濟工，其實毋是。是我的同僚in蹛佇瓦硐，花宅，大事遐的細細的島嶼；是真犧牲，是真勞碌。若是我是定家己見笑，我踮媽宮是無輸踮台灣的大都市，所以攏無犧牲。

  2. 我這時咧做工是親像真熱心。總是這是熱天，若到入9月面起到明年的3月，阮是真無機會通做工。因為彼時有大風；in遮的人叫做戇風，親像風颱透袂恬。所以這時加做淡薄工也無通感心。

  Taⁿ我將5月--的，記佇遮：-

  初4日：佮戴Hong-liân先生佮我的拙內坐船去雞母塢，佇遐聚集家庭禮拜有8个人集會。

  初6日：佮戴Hong-liân先生佮當職去湖西莊佈道，有500連人來聽。我向望佇遐會得設講義所，遐離媽宮約舖二路較足。彼暝有幾若人顯然愛求道。

  初7日：去中寮佈道。阮的長執事，兄弟姊妹濟濟出席，約186人來聽；遮是較細細的社。

  初9日：禮拜日。今仔日阮有聚集頭一回的內台人合併的國語禮拜，有14人出席。

十二日：佮戴Hong-liân先生去西嶼的竹篙灣聚集會友禮拜。遐有兩戶會友信主40連年，對高篤行牧師的丈人深河伯得著道理。兩家合共25人彼下晝佇遐得著27人做伙禮拜。真拄好，彼日講是in庄裡有一个癩ko--的死的對年，通莊無煮食，講驚了癩ko的么走入去煙筒空紲穢著；所以我佮戴先生佮婦仁人攏餓一頓。咱的會友卻無讉損，總是體貼全莊的人。

十三日：佮戴Hong-liân先生做伙落去Peh-tàu。伊倒來歇熱，紲佮我做交通佈道。伊代先對Peh-tàu上陸去花宅教會。我佮許Lêng-hûn秀才的第3公子，Se-tiû先生做伙落去大嶼。到位看許Ek-chhiau先生勤勤咧教10外的姊妹佮囡仔讀冊。佇遐受伊真厚待，去看幾若位名所。彼暗佇遐佈道，約有85人來聽。

自然界的驚異。

  啊！上帝的大權能通驚。大嶼的聖景毋是筆墨所通形容。烈日蒼天洋洋大海。嶼的東爿，斷崖絕壁。狂湧浪陳，來摃遐的巍然的斷崖；成做洞空真深，海真深，水真清，海底青leng-leng。浪陳摃海邊的岩石，彼个波簸幾若丈，彼个光景的媠，也驚。啊！上帝的驚異，四邊的海濟濟岩石。有的親像厝，有親像船帆大鐘，種種的形，懸懸浮佇海面真媠。遐的人較近佇原始生活。濟濟魚船，規船的人攏露體無遮閘，藏水沬掠海膽(ウニ)佮用魚攕鑿魚。我看一个婦人人有藏水沬半分鐘較加來鑿著魚。啊！真趣味。這號的歡喜恁若無來，得袂著。

十四日：對大事透早5點連，坐和德丸12馬力的細魚船到西嶼爿細細的嶼，約蹛100外人。對船看海底現現；海底是上帝特別的花園。遐的硓kó͘照我所會，算毋若10款的花；也有海樹仔，有懸，有低，有白沙的坑仔，10花5色的魚，趖佇彼中間，對船下看約兩丈連的深，明明。彼个嶼人毋捌佇遐傳道理，Ek-chhiau先生佮我去，伊去山裡行行，我略仔眩船倒佇海邊的岩石跤歇睏。Ek-chhiau先生伊欣慕後來會佇遐佈道，離大嶼約1點鐘久的水路；後來閣開船到Peh-tàu。彼下晝佮cha下晝攏佇船波頂食飯。魚活活斬斬咧焄白水，規鼎大家跍跍咧，魚添規碗準飯扒。過晝後到花宅拜堂。

佇這个細細的海嶼有一間媠媠的拜堂。十字架的記號懸懸徛佇聖堂厝頂的尖峰；實在感慨無量。大啊！上帝的鴻恩。佇遮聽幾若年前劉振芳，吳天賜牧師予風湧關的慘景；也愛笑，也可憐。總是in關了真好；彼時in來舊拜堂破sàm漏雨。In關佇遮遮的痛感彼个情形來鼓舞。也上帝盡忠的老奴僕戴Hong-liân先生佇遮。伊的令郎戴iāu-lû醫學士，開愛生醫院佇媽宮；西洋樓毋蹛，願來遮跔，家己pû oê-á，今年透4年--啦。按呢佇遮來指導起這間拜堂。啊！呵咾主。彼暗佇遐佈道約125人來聽。

十五日：去訪問望安支廳長，船紲坐無著，後來倩一隻5馬力的最細魚船倒來媽宮；我佮Se-tiû君倒佇船波等若咧曝魚脯，透中晝11點連到午後約2點半到媽宮。曝幾若點鐘，風真透，北風，湧懸，船夯上湧尖，挵落湧溝，水潑入船，規頭面淋海水，恬恬倒毋敢蟯。Se-tiû君幾若擺險吐，伊是瓦硐人。雖然按呢猶過真艱苦，到厝紲起中耳炎，現在猶倒床中，請替伊祈禱。佳哉主庇佑我平安，隔日禮拜閣通教主日學佮3擺的主理。

十七日：真好機會佮一个吉貝嶼的公醫做陣去吉貝嶼，著坐官船。北島燈台船，這个燈台是東洋第一懸的燈台，比鵝巒鼻的較懸。感謝主，遮有天南丸，Chhoan-ú丸，有名丸3隻官船。官廳准我來坐，船長我攏佮in會面，坐in的船約2點鐘的水路。遐未捌聽福音，有約2000人踮。出產鐘螺通製造螺鈕，佮鰇魚真濟。遇著落雨，佇店內約32人來聽，有送in約10本的冊。遮的人早常常做海賊；人大漢，粗勇。早船常常佇遮摃破。彼下晝予警察請，彼下晡連鞭倒轉來。

  二四日：閣一擺坐官船佮拙內去花宅教會。彼暗佮戴先生佮女傳道呂玉蘭先生去Chuí-oaⁿ佈道，有215人來聽。予遐的警察真厚待，隔日連鞭倒來。

  二六日：佮拙內閣去等山，瓦硐教會。夏宇先生佇遐盡力拖磨；用信佮疼心來照顧兩个精神病的兄弟；一个嶄然較好，一个較頑。先生娘是台南市的人，猶過真願同苦。彼下晝佮先生佮戴秀麗女士(華南大學在學中。Hong-liân先生的令嬡)佮拙內去後寮佈道，得著莊協議員的好意，有134人來聽。

二七日：佇Bûn-ò-té佈道132人來聽。

  二八日：去湖西訪問前日去佈道遐的較有求道心的人，聚集10个人做伙禮拜。

彼下晝來西溪訪問故陳Lo̍k先生的親戚，兄弟。彼莊無人欣慕道理，甚至in的親戚紲恥笑上帝的無勢力。講陳Lo̍k先生做公學校先生去傳道，傳無一年就死，云云。卻也有的呵咾講拜上帝--的有疼心，鬥培養故先生的遺族。啊！想著先生的好膽離故鄉，無要緊親族的攻擊來為主。也雖然死，猶過伊的第二令郎約翰君現時猶原咧讀神學，欲閣紲接老爸的遺志。閣想著先生早捌佮我同學佇神學。心酸，嚨喉淀，數念澎嶼西溪的偉傑，靈界的戰士故陳Lo̍k先生的做人。一時心真艱苦。來到西溪橋邊，(這條是澎湖唯一的溪，其實是溝仔，總是泉對太武山出。這个山約懸350尺；溪流約4，5里路，是汫水的長流水。所以真趣味，佇小小的海嶼有這條溪，有一座山，山跤有幾若的汫水的蓮花池；有汫水魚，這攏是上帝的驚異)。食我的麵包過一頓，心追慕故陳先生，悶悶一路用步行倒來媽宮，(因為無車逝)。

以上是5月較緊要的工作。請恁替阮祈禱，予主的榮光滿滿佇澎湖。

                                                (賴仁聲記)
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461