Nái-bān-ke ê Siáu[sic]-lú

1937.07  628期  13-14

(Chiap 6 goe̍h 20 bīn)

 15. A-lân ê ông hit chi̍t-sî,

    Bēng-lēng chiong-kun kín-kín khì;

    Soà kià phoe hō͘ Í-sek-lia̍t,

    Só͘ siá siông-sè oē koh chhiat.

 16.Nái-bān khí-sin bô iân-tî.

    iā toà chin-chē kim kap mi̍h;

    Chûn-sim ǹg-bāng ē kín hó,

    M̄-kiaⁿ kan-khó͘, m̄-kiaⁿ lô.

 18.Giâu-gî sī teh chhoē khang-khiah,

   Thiah-phoà i-chiûⁿ lóng boē chia̍h;

   Tiâu-lāi jîn-sîn it soà it,

   ia̍h sī choân-pō͘ boē hiáu tit.

 19.Kai-chài ū Í-lī-sa siaⁿ,

   An-uì kun-ông m̄-bián kiaⁿ;

   Hoan-hù tio̍h kàu goá só͘-chāi,

   I chai ū sian-ti chiah lâi.

20.Nái-bān chi̍t thiaⁿ chit hō giân,

    Liâm-piⁿ chē chhia kàu mn̂g-chiân;

    Teh siūⁿ I beh cháu chhut-lâi,

    Thè kiû thiⁿ-téng toā Chú-cháiⁿ.

 21.Jiân-āu chiah bong só͘ hoān--chhù,

    Thái-ko chiū thang tit i-tû;

    Put-liāu Í-lī-sa ēng hoat,

    Chí-ū chhe lâng lâi thoân-soat.

 22.Kiò I tio̍h khì Iok-tàn hô,

    Sé-e̍k chhit pái chiū ē hó;

    Nái-bān chi̍t thiaⁿ chit hō oē,

    Nō͘-khì chhiong-thian ài hoê-ke.

 23. Siūⁿ goán Tāi-má-sek kiaⁿ-to͘,

    Hoat-hoat kap A-pa-ná hô;

    Pí lín chia ê chuí khah chheng,

    Hia sé kèng koh-khah ha̍h ēng.

 24. Hó tit kin-toè--ê kīn-chêng,

    Hó-táⁿ tuì i ti̍t kóng-bêng;

    Siat-sú Sian-tī ū bēng-lēng,

    Ē I lí pēⁿ sī khak-tēng.

 25.Hòng koh chí kóng sé sin-khu,

    Chhim-goān chú-lâng bô tiû-tû;

    Nái-bān tuì chia kó-jiân khì,

    Sé liáu chhit pái hó lī-lī.

 26. Kàu hó sin-thé ná iù-tông,

    Kng-kng ku̍t-ku̍t chin kiān-khong;

    Sim-lāi ū siūⁿ kàu chin-chêng,

    M̄-sī hô-chuí ē tī-pēng.

 27. Bô m̄-sī tī ú-tiū-lāi,

    Chin-sîn Iâ-hô-hoa chûn-chāi;

    Chiàⁿ sī chit cho̍k ê Siōng-tè,

    Kiong-kiong kèng-kèng hiàn toā lé.

 28. Bô-liāu chit uī toā Sian-ti,

    Chài-saⁿ m̄ siu kā I sî;

    Chêng-goān khek-khó͘ koè kong-im,

    M̄-ài hoat-châi phāu pù-sim.

 29. Tong-sî Nāi[sic]-bān sim thong-ta̍t,

    Koat-sim m̄ koh pài Phô͘-sat;

    Siat-sú bē hiáu ū chhò--chhù,

    Beh kiû chin Sîn si khoan-sù.

 30. Toā siaⁿ gîm-si o-ló Chú,

    Chi̍t lō͘ kám-siā I jîn-chû;

    Chit khoán thái-ko ē tit i,

    Lâng-lâng to sī khoàⁿ chò kî.

 31. Chí in siáu[sic]-lú ê chi̍t kù,

    Chiong-kun tāng-tàⁿ thang thoat-tû;

    Chia khí siáu[sic]-lú seng-oa̍h lō͘,

    To siū chú-lâng chhim ài-kò͘.

 32.Hiān-kim hōng khǹg kok siáu[sic]-lú,

    Tē-it tio̍h kèng-uì Siōng-chú;

    Sui-sī tú-tio̍h ū chhì-liān,

    Bo̍h-tit sim léng siūⁿ ià-siān.

 33. Tio̍h chai Chin-sîn ê ò-biāu,

    Tek-khak siúⁿ-sù lí châi-tiāu;

    Put-lūn ū kàu siáⁿ só͘-chāi,

    Lī chhin lī chhek pún m̄-ài.

 34. Chin-sîn ēng choan-sim ho̍k-sāi,

    Hoān-sū ē tit I an-pâi;

    Sî-khek m̄-thang sit ki-hoē,

    Jia̍t-sêng kap Chú saⁿ kau-poê.

 35.M̄-thang the-sî bē hiáu kóng,

    Ū-sî chi̍t kù iā ha̍p-tòng;

    iū-koh bo̍h siūⁿ goá iù-chíⁿ,

    Kiaⁿ-liáu kiò lâng kiò bē chhíⁿ.

 36. Chhì khoàⁿ chit uī toā eng-hiông,

    Tuì tī siáu[sic]-lú it giân tiong;

    Sin-thé thái-ko tit kiù-tī,

    Lín siūⁿ che sū kiám bô kî.

 37. Hòng koh chò lâng sui siàu-liân,

    Kóng chhut si̍t-chāi chèng-keng giân;

    Hō͘ lâng ē tit thang bêng-pe̍k,

    Ē seⁿ hāu-kó toā iú-ek.

 38.Hiān-sî lâng-lâng thái-ko to̍k,

    Chiū-sī lêng-hûn ê choē-ok;

    Kín-kín tio̍h khì pò lâng chai,

    Chhoā kàu Chú ê só͘-chāi lâi.

 39.In-uī Kiù-chú toā chû-pi,

    Beh chiong choē-gia̍t tû kàu lī;

    Si̍t-sim khak-sìn Chú koân-lêng,

    Chiong-lâi it-tēng siū tāi êng.