首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 教會的一考察
教會的一考察
卷期：第628號 本次： 日期：1937/7 刊名：台灣教會公報/芥菜子 頁數：25-26
篇名：教會的一考察 [ Kàu-hoē ê it khó-chhat ]
作者：吳天命 Gô͘ Thian-bēng
  顯示 : 漢羅 全羅 並列  

教會的一考察

吳天命

1937年7月628期    25-26

 

保羅寄批的時，是用所在來稱呼收批的教會。親像加拉太遮的教會；有時是用構成彼个教會的人來稱呼，親像「帖撒羅尼迦人的教會」。總是哥林多兩張的批攏是用上帝做主咧稱呼，就是講「上帝的教會佇哥林多--的」。佇哥林多的批，這款的表現卻是真簡單，毋過有表示教會的一个本質佇咧。這句，有顯明哥林多的教會毋是哥林多--的；也毋是哥林多人--的，就是上帝--的。教會是上帝國的一部，對天降落佇哥林多--的。

有註釋家解釋「上帝的教會對哥林多--的」；這句中的「佇」字講是「滯留」-寄跤的意思。我想按呢不止有表現保羅的真意。照保羅的意思，哥林多的教會是永遠--的，上帝國來滯留寄跤佇鬧熱，享樂，活動的哥林多都市。閣有人註釋講這字 「佇」有「駐在」的意思。就是講，羅馬的兵隊對羅馬的本營派遣來駐在佇哥林多，siāng這款上帝的教會派來踮佇哥林多，就是彼時的哥林多教會。我想「滯留佮駐在」是siāng款的主旨，表明哥林多的教會是上帝--的，對上帝遐來--的。

  Taⁿ上帝的教會佇哥林多是甚物狀況？照保羅所描寫是極軟弱閣有通掛慮的所在。智慧--的毋是濟，有氣力--的少，尊貴--的少；攏是軟弱--的，世間的卑微--的，受看輕的會員抑是兵士。事實彼時的哥林多教會有異教主義的迷信，有無道德，有分黨，有怨妒，無統一，有亂倫，相告佇異教徒的裁判所等的可傷的事實。致到予保羅真心痛的所在。一面哥林多教會著大大認罪，因為in辜負上主的恩，因為in予in的本營拄著見笑，予in的總元帥耶穌拄著見笑。總是這是袂免得的事；因為雖然教會是上帝--的，對上帝遐來駐在佇哥林多猶過構成彼个教會的人員，是對哥林多募集--的。這款軟弱的教會有種種的失敗，刣輸世俗的軍隊；毋過想著in的背後有常勝的將軍耶穌咧設計，指揮的時就佇遮有in的希望，戰鬥力，吞忍佮信仰。

哥林多的教會對in的現狀，著大大反省，認罪。總是想著上帝歡喜召in做伊的兵士來駐在佇哥林多，愈想in的軟弱佮失敗，就著愈感覺in的光榮佮感激的所在。因為in通有份佇上帝的教會，全然毋是對in家己的氣力；就是對恩典，毋是in會堪得佇上帝國的內面。全然是對上帝的揀召，實在予in立志，予in行好攏是對上帝。所以哥林多的教會算是上帝--的，來駐在佇哥林多。一面著認in的軟弱佮失敗，愈發精進佇in的工作；閣一面著感激in受召的光榮，來佮歹爭戰；佇爭戰的中間受訓練，那受訓練那爭戰，就到尾通成做上帝所歡喜的兵隊。

咱現時的教會佇台灣，我想，是上帝，來駐在佇台灣，咱有份佇永遠的上帝國的內面；佇遮有咱的向望，吞忍，戰鬥力佇咧。總是咱的現狀佮哥林多教會的狀況敢毋是真siâng？咱雖然背後有常勝的將軍耶穌，猶過事實上佇台灣為主的鬥爭史上有種種的失敗，顯出咱的軟弱，致到予咱的將軍拄著見笑的所在。一面咱著反悔認罪；閣一面咱著毋免絕望，因為主猶欲用咱，咱雖然軟弱，猶過對主的恩典，予咱有份佇伊的聖工。咱受這予恩愛，應該感激來精進，應答主的命令，傳福音chhoā人佮上主閣和。咱毋通因為失敗來絕望，咱著佇失敗中來認明咱是上帝所派來駐在佇台灣--的，咱的背後有常勝的將軍。著囥向望，吞忍，佮信仰來爭戰，那訓練那爭戰；親像新兵猶袂曉相刣的法度，就派去戰場，那刣那學習，那學習那刣，到成做上主勇的兵隊。

著保重咱台灣的教會！因為是上帝--的！！著勇敢！因為咱有常勝的將軍佇後面！！著認罪！因為咱有種種的失敗！！

著爭戰！因為上帝對恩典，歡喜用咱這號世間看做毋上目--的，來做伊的兵丁。台灣的教會著那學習那刣，那刣那學習；因為這是駐在佇哥林多的上帝的教會，對台灣社會的活動方針。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461