首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 禮拜的雜感
禮拜的雜感
卷期：第629號 本次： 日期：1937/8 刊名：台灣教會公報 頁數：22-24
篇名：禮拜的雜感 [ Lé-pài ê cha̍p-kám ]
作者：駱先春 Lo̍k Sian-chhun
  顯示 : 漢羅 全羅 並列  

禮拜的雜感

駱先春

1937年8月629期     22-24

 

詩篇第100篇，是欲入上帝的厝，來敬拜的人所應該著讀--的。佇第4節做詩的人有講，「著用感謝入伊的門，用呵咾入伊的院；著感謝伊，呵咾伊的名。」

先知哈巴谷的冊的內面有極力咧主張講，「獨獨耶和華佇伊的聖殿，全地佇伊的面前，攏著靜靜」(2：20)。

佇伊的面前咱著有顯出敬虔，恬靜，恭敬的精神。因為伊是榮光的君王，全能的主宰，疼痛的天爸，至聖的上帝，公義的支配者。

耶穌佮撒馬利亞的婦人人的回話的中間有教示講，「上帝是神，敬拜伊的著用神用誠實」(約翰4：24) ；所以禮拜是人對上帝心神上的服侍，靈性的交陪，啟示的領受佮召命的應答，所以斷然毋通有形式tek虛假的行為。

教會若有壯嚴佮敬虔的禮拜，就較會予人感覺上帝佮人的臨在，也較會意識榮光的神佮人的會見，佇遐通鑒納罪人的敬拜，紲應允伊的囝類對伊所要求的好事。毋但按呢，也會予人聽上帝託傳教者的喙，所講的話予伊較明。

福音主義的教會，禮拜是對重神聖，嚴肅的精神。禮拜者佇禮拜的所在，欲聽公義的審判司對人的罪嚴嚴的審判，佮聽聖愛天爸對反悔認罪的人所宣告赦罪佮拯救的福音。所以禮拜者佇威嚴的上帝的面前，著有謙卑恭敬的心，來想咱是罪人，是上帝的對敵，袂堪得近倚伊，是倚靠耶穌基督做咱的中保，共咱引薦佇上帝的面前。對反悔認罪，倚靠耶穌完全的功勞佮基督贖罪的氣力，面才通閣向上帝通佮上帝閣和。按呢無功勞的罪人徛佇上帝的面前，是對上帝白白的恩典，所以基督徒佇上帝的面前禮拜的時著有謙卑，肅靜，敬虔的態度，來聽上帝對聖神的氣力所對咱講的聲。

關係禮拜。佇遮愛特別來檢討咱的教會有較幼稚幾若點：相佮來反省--的，紲來出力積極tek鼓舞佇上帝的面前有價值的神聖的禮拜；因為凡事是欲榮光上帝。

咱著來反省咱對禮拜毋知：-

1. 有形式tek的所在抑無？

無備辦心，無想去拜堂的意義佮目的，佇一定的時間挔詩佮聖冊到拜堂；若是心內已經有混雜的思想來鎮滿，無摒空，綴人坐，徛，開喙；若是無感觸--著上帝的活命佮聖神的做工，就歸佇空空。

2. 對祈禱的訓練甚物款？

有用祈禱來終始抑無？用祈禱來備辦咱的心聽上帝的話。用祈禱對主求能力，予咱所聽的真理會通實行，得著好的結果。走赦馬，抑是講一瀉千里的祈禱，敢毋是咱著閃避的mah？無想話的意思，對心底來表現的祈禱，是形式tek的祈禱。

3. 有肅靜抑無？

著約束禮拜中或是大人抑是囡仔的喧嚷。若無，驚了無通領受主咧對咱講的話。會友佮會友佮的故事，抑是生理事，抑是一般的俗事，毋是欲佇拜堂參詳--的。因為上帝的厝毋是生理場，也毋是賊岫。有信者佇禮拜-中對主理者問「第幾首」，「第幾面」，抑是「讀tá-lo̍h的聖經」等彼款--的，通講是無敬虔的態度。若有無明，較予好著問隔壁的人。教會若有印週報的所在，自然看彼就會知。

4. 對獻金的態度甚物款？

獻金亦是敬拜上帝的一部分。咱著恭敬來獻，有人無謹慎hiat到khin-khiang叫。有人紲愛誇示，愛予人知伊所出的是真濟；有人雖罔無氣力，所獻的是真少，總是也毋免驚惶提出。盡所會來獻--的，對主的聖別已經是成做無價的寶啦。「歡喜提出--的，上帝疼--伊」。

5. 有帶聖經佮聖詩抑無？

有人來做禮拜無帶聖經佮聖詩，是親像無戰器去出征。無舉箸欲食飯，無手形欲領金，無車單欲坐車一樣。卻也有目睭花無看見的人，彼袂講得。有人拍算佇禮拜堂有備辦聖經佮聖詩，所以貧惰無欲帶來，便便欲用禮拜堂--的，兄弟姊妹啊！遐的是欲預備通予出外的基督徒，抑是會外的人忽然間來通用--的。咱大家著訓練帶家己的聖冊佮聖詩。

6. 有赴時間抑無？

咱大家著訓練到一定的時間著到位；或是祈禱，抑是讀聖冊來備辦心見上帝。有人到禮拜的半中站才來，會攪擾講的人，聽的人；閣會搝會眾的注意，予人致到袂專心聽上帝的話。聽候某長老，某執事，某好額人，會友來才來開會的弊病若會通除去，就袂予遐濟人費了遐濟的時間。

7. 吟詩有較早peh--起-來抑無？

會友大家著鼓舞一切徛起來好習慣，毋通別人咧吟，咱才peh--起來。所以ji̍h琴的人咧ji̍h路尾逝猶未了的時攏總徛--起-來，通一齊吟和諧的聖詩呵咾主。

8. 有買食物騙囡仔欲來予伊恬靜抑無？

這款的歹習慣毋通用。買物予囡仔食，毋但食物的殼，粕，紙，皮等四界掖，來拍垃儳聖殿nā-tiāⁿ，閣會予人較未生出敬虔的心，按呢就袂達囡仔的靈性育的目的。

9. 你是為著欲來禮拜，紲來買賣：抑是為著欲來買賣，紲來禮拜？

「著守安息日做聖日」。這條的解釋甚物款？

10. 你是欲來聽上帝啟示的話，基督救靈贖罪的福音；抑是欲來聽講古，笑詼，小說，抑是新奇的言論？

獨獨著上帝的話，才有救人的能力，堅固人的信仰，建立人的德行，chhoā人捌上帝。

最後愛講兩項予咱全台屬主聖會的兄弟姊妹通來佇禮拜的時來實行：-

1. 祈禱煞的時，大家著和齊講「アーメン」，就是心所願換做「アーメン」；意思就是'實在'，'真實'，'誠實'，'同意'彼款的意思，是表明咱祈禱的熱誠。這句「アーメン」是萬國共通的腔口。

2. 吟聖詩煞的時，大家也著和齊吟「アーメン」，才有頭尾。「アーメン」這兩音若和齊來吟的時，感動人的氣力毋是小可。

以上幾若項，雖罔是親像普通的枝葉問題。總是大家若協力鬥鼓舞，鬥指導，鬥留心，對理論實現到佇實際；就主的聖會的確會脫離幼稚的形式禮拜。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461