首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 路得記的研究
路得記的研究
卷期：第629號 本次： 日期：1937/8 刊名：台灣教會公報 頁數：3-6
篇名：路得記的研究 [ Lō͘-tek-kì ê Gián-kiù ]
作者：雪峰逸嵐 Soat-hong Iat-lâm
  顯示 : 漢羅 全羅 並列  

路得記的研究

雪風逸嵐

1937年8月629期     3-6

(接7月第6面)

 

  6. 向十字架的路來行

  19節：「對按呢兩人相佮行......」。呵咾主：放拺一切綴主，同心同行，來行十字架的路，困苦的路，散凶的路，受恥笑的路。檢采路裡遇著熟似人欲笑伊戇，綴外國的乞食婆去外國；有爸母親像毋挃，甘願去外國，無依倚，毋但本國的人笑，檢采到猶大也欲予遐的人恥笑，譏刺。路得攏無要緊，直直綴大家來行客西馬尼的路(=悲慘的路)。呵咾主！！！

  20，21節：「這是拿俄米mah？講，莫得閣叫我拿俄米，著叫我瑪拉......出去的時滿足......空空倒來......啥事叫我拿俄米啊？」兩人行到伯利恆的時，通城攏搖泏起來，眾婦人人講這是拿俄米倒來mah？拿俄米講，「Taⁿ毋通閣叫我拿俄米(甜)，著叫我瑪拉(苦)啦。因為上帝降災厄予我，我去的時是少年，有行李，駱駝，驢，有丈夫，有囝，逐項物充足，taⁿ予我空空無半項倒來啦。上帝予我艱苦，這个艱苦是應該--的。Taⁿ毋是甜(拿俄米)，是苦瑪拉)啦；所以著叫我瑪拉。」這站毋是拿俄米哀怨的話，是一篇的悔過書。呵咾主！！！若是上帝實在的百姓，雖然怎樣漂流，到時上帝的確欲揀召in倒轉來(西番雅 3：17-20)。感謝主！！！咱若有錯誤連鞭知通越轉，上帝永遠無放拺咱。拿俄米雖然無丈夫，予伊無閣記念守寡的時的見笑，因為創造伊--的，就是伊的丈夫(以賽亞54：4，5)。倒轉來到上帝所應允的麵包城(伯利恆)，閣歇佇上帝的翼下(路得記2：12)，就通得著永遠的平安啦。

檢采遐的婦人人閣問，拿俄米就欲閣應講taⁿ攏無半項啦，干焦帶一个外邦的新婦倒來nā-tiāⁿ；檢采對人欲呵咾路得的孝順疼心，gâu體貼，gâu相款待的事予in聽(參考2：11)。十年久所得著--的，就是一个外邦的女子。親愛的兄弟姊妹！！！耶穌來世間歷過種種的苦痛，經過各各他，受死佇十字架，就是欲揣迷路的羊倒去。你是迷路的羊，已經予耶穌揣著抑未？耶穌雖然遐受苦，猶過你若盡忠綴主，主也會歡喜受安慰。

  22節：「按呢拿俄米倒來......伊的新婦路得也佮伊來......」這節通做本章的結束，就是頭一部的靈程，你到tá落，我也到tá落。離開拜偶像，烏暗的世界(埃及)地，主來入佇榮光的國(出埃及)，通講是重頭生啦，有歡喜無？

  第2章：靠聖神背十字架。

  1. 順服聖神。

呵咾主！！人若甘願行十字架的路，就上帝的恩賜常常佇頭前引chhoā，予人得著。路得佮拿俄米來到伯利恆的時，拄拄是欲割麥的時，人的勞苦到佇收成的時是真歡喜，按呢in倒來的時拄拄是歡喜的時。呵咾主，聖神的引chhoā雖然是苦，猶過有歡喜。

  1節：「拿俄米有伊的丈夫的親人...。。名波阿斯，也是大好額人。」波阿斯的意思有能力，伊實在也是有能力，也是大好額人。呵咾主！！！咱有至大的波阿斯(耶穌)，有大能力，大權能，大尊貴，大榮光；咱若得著耶穌，就伊所有-的，攏是咱--的。波阿斯通代表基督，抑是代表聖神。

  2節：「路得共拿俄米講予我去園裡......抾麥屑......講我的查某囝啊！！！做你去，人若踮佇聖神，凡事著順服聖神的引chhoā。路得綴拿俄米來，食苦無要緊，雖然散赤，猶過凡事著問老大家，無看輕伊老，散凶；欲做甚物著問到伊有聲，猶原尊重--伊。咱重頭生了後，猶原著佮主同受苦，向望後來的福氣，因為現在的艱苦是暫時。路得逐早起著問大家的意思，才敢去做。咱也著逐早起祈禱，讀聖經，求主指示咱一日所著做的工，凡事順服主。綴大家做乞食，甘願去園裡做工抾麥穗，是因為予疼所催逼，就毋驚環境的恥笑。咱得著主的疼，也是著好膽。

  2. 背十字架

  3節：「伊就去......，chhàu-khám到波斯阿的一坵園。」單身的外國婦女，毋驚恥笑，看輕，欺負，甘願到生疏的田園抾麥屑。伊攏無想人欲予伊抾抑毋，會看輕伊是外位人，番仔婆，來咧做乞食......伊甘願背十字架來做工，因為大家疼--伊，伊疼大家；檢采咧想大家佇厝裡咧無通食的狀況，想著家庭的悲哀，困難，所以真勤緊咧做工(參看7，17)。無毋是為著欲孝順伊的大家，所以熱心做工，熱心來抾。檢采拿俄米佇厝內也咧替伊祈禱，予伊所欲做--的無拄著阻礙。呵咾主！！！Chhàu-tu-khám到波阿斯的園去。親愛的兄弟姊妹！！！到園去做工是真榮光，真歡喜的事；到上帝福音的工場來做工，是閣較榮耀的事。親愛的兄弟姊妹！！！上帝的園遮闊，田攏到時，稻也熟熟，甚物人欲去做工？甘願做天國工人的一份子nī？咱看路得做甚麼工？抾麥屑。這是講人的好模樣，偌濟人攏愛做大工，較有名聲，工仔，(小工)較無人愛做。總是咱著知佇福音的田裡有偌濟小工咧愛咱做，若無人通抾麥屑，就會偌濟的麥屑受棄拺。有人愛做大佈道家，對個人就看較無要緊。這就是看輕麥屑，著知一粒麥屑若抾-起來，也會成做真好的種子；也會結穗，所以雖是小可的工，咱也毋通忽略。呵咾主！！！路得chhàu-khám到波阿斯的園去，這予咱想也是真奇妙，按怎會遐拄好到波阿斯的遠位？是路得的氣運？抑是拄chhàu-khám？抑是有上帝的神所引chhoā nī？這也是不止有通予咱研究的所在。咱著知咱的境遇，出入，萬事攏是上帝安排--的。上帝賞賜路得有犧牲背十字架的精神，甘願出來做工。就閣賞賜聖神引chhoā--伊，予伊一步一步那進到高尚的靈程；這攏是上帝的好意思。親像摩西佇河邊的時，上帝就備辦法老的查某囝去抾--伊。凡事攏是欲成上帝的旨意。親愛的兄弟姊妹！！路得受苦到園裡揣米糧，到波阿斯的園揣米糧。咱欲得著神靈的米糧，也著到上帝的聖經內來揣才有，就咱做工會那歡喜，那有材料，家己的那滿足，也有通分予別人。所以咱著肯背十字架，犧牲來做主的工。

  3. 充滿平安

  4節：「波阿斯......對割麥的人講，願耶和華佮恁佇咧；in應講，願耶和華賞賜福氣予你。」通世間毋捌看見頭家佮工人親切疼痛到按呢。設使有這款的頭家，也無這款的工人；有這款的工人，也無這款的頭家。頭家對倩工祝福請安講，「願耶和華佮恁佇咧。」通知波阿斯的做人，是深信上帝的人，才會經驗佮上帝佇咧的福氣，也會曉愛伊的工人猶原佮上帝相佮佇咧，是有滿滿的疼心。親愛的兄弟姊妹！！！人若佮上帝相佮佇咧，所得的福氣，所得的平安是偌大啊！！！若毋是實在得著經驗的人，是毋知影。咱閣看遐的做工對頭家的感情怎樣？應講，「願耶和華賜福」。也是對上帝所賞賜滿滿的疼情，攏無怨惡頭家遐好額；家己定定咧做工人，猶原對頭家祝福，愛上帝賞賜閣較濟的福氣予頭家。實在是好閣盡忠的奴僕，若毋是上帝有佮in佇咧，in定著袂遐有疼心。感謝主；頭家疼伙計，伙記疼頭家，就全園內攏充滿平安。親愛的兄弟姊妹！！！佇咱的教會內若攏無好額，散凶，尊貴，下賤的心理，就會通滿滿的平安。可惜佇會內有人有財有勢，就運動結黨，看輕散凶人，講話激鼻空管，藐視無學問--的，袂堪得活動佇上帝的工。因為無博士銜，抑是學士銜，抑是甚物專門卒業。也散凶人有的就家己餒志，拍算教會是好額人--的；也有的欲激散凶癖，想講你好額做你好額，我都毋向你的鼻空風。為著按呢，會內無一屑仔相疼的元氣；毋是干焦會友，就長老，牧師也有濟濟分黨，致到教會無平安。(筆者毋免講傷濟)。感謝上帝，伊差聖神的會來燒滿滿的污穢予以後的教會欲成做聖潔尊貴的聖體，就通充滿平安。願做信者的人，逐人攏欲成做上帝盡忠的工人。

佇這節也通看出兩篇的祝詞；一篇頭家對工人，一篇頭家對工人，一篇工人對頭家，也攏是有應驗的話。感謝主佇這本冊予咱也看出兩項罕有的事：就是罕得有的大家新婦，佮罕得有的頭家伙計，無毋是做咱真大的教示，咱攏是上帝的工人。所以著盡力做工，就會得著滿滿的平安。Taⁿ咱越倒轉來想路得佇這款的園內抾麥屑，有平安抑無？
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461