首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 讀聖經來體驗基督
讀聖經來體驗基督
卷期：第629號 本次： 日期：1937/8 刊名：台灣教會公報 頁數：8-12
篇名：讀聖經來體驗基督 [ Tha̍k Sèng-keng lâi thé-giām Ki-tok ]
作者：
  顯示 : 漢羅 全羅 並列  

讀聖經來體驗基督

約書亞1：8

吳義勇

1937年8月629期     8-12

 

上帝揀選摩西來chhoā以色列百姓出埃及，經過曠野，欲到迦南地的時，上帝閣揀選約書亞做頭來接紲摩西的工。當時交戰真濟，著愛拍贏31个王，才會用得，所以伊的責任非常重大；所以伊的責任非常重大；佇彼時，上帝干焦吩咐約書亞暝日著愛讀律法的冊，才通得著順序。

列位，上帝這馬也欲佇咱台灣的教會中，揀選濟濟的約書亞，來擔當教會的責任，來傳上帝的真道。鄙人咧想，今仔日教會最重要的問題，毋是經濟抑是建築物，就是對重上帝的話。無論甚物教會，若對重上帝的話，就通得著豐盛的活命；若無，就無活命，無能力。

詩篇講，「對重上帝的話的，無致到見笑。」今仔日教會的冷淡，是因為聖經猶未實在得著，所以濟濟人今仔日靈性的枵餓，毋是因為無通食；濟濟人靈性咧喙焦，毋是因為無水，是因為無聽上帝的話。咱若愛教會興起，只有愛永久對重上帝的話。佇舊約的時陣，有一擺的大奮興會，就是Í-sū-la̍t，尼希米引chhoā以色列百姓轉去故鄉的時，有開一个聖經研究會，尼希米8章有講，in清楚，來讀上帝律法的冊，說明上帝的意思予百姓明白；所讀--的，百姓聽見上帝律法的話，攏流目屎，因為in受感動來明白主的道理，後來大大歡喜快樂。

可惜今仔日教會講聖經的要道，過頭對重講新聞抑是社會問題，所以教會無有奮興的能力，因為上帝的話逐句都有能力。主講，「我的話是屬靈的活命，有活動的能力。」列位，咱若知聖經的由來，咱就知聖經的寶貝通欣慕--的。佇提摩太後書3章有講，「聖經攏是對上帝來啟示--的。」通知聖經是對聖神感動來寫--的，毋是對人的意思來成--的；所以聖經完全通信，咱著保惜來讀。有的人僥疑聖經，所以無對重聖經，無愛讀聖經，也毋愛講聖經。

咱知寫這本聖經無過3種的人：(1)就是上帝。(2)就是好人佮天使。(3)就是魔鬼佮歹人。若毋承認是上帝寫--的，就是好人佮歹人寫--的；若閣毋承認，就是魔鬼佮歹人寫--的，只有是好人寫--的，聖經只有是上帝的神感動屬靈的人寫成--的。世間有千萬種的冊，無一本會贏過這本聖經。世間有千千萬萬的人，無一个會贏過耶穌基督，因為耶穌是對道來成做人，是對上帝遐來--的，聖經也是對上帝遐來--的。聖經中第一要緊的題目，就是主耶穌基督，所以耶穌講，「替我做干證--的，就是這本聖經。」聖經講，「信耶穌的人會得著救。」世間中無有一本冊講會引chhoā人得著救，我會通接受上帝恩典來做耶穌基督的學生，就是讀這本聖經。聖經是予人得著活命，所以咱做基督徒，著常常讀聖經。我想，凡若有活命的人，的確著食，因為咱愛欲保存肉體的活命，的確逐日著食；何況有人為著欲求保存靈tek的活命，敢無欲逐日來啉食mah？若無日日享受咧？的確欲失落信徒背十字架的氣力，這是因為無日日享受上帝的米糧。

耶利米用主的話，做食物，所以耶利米有勇健的氣力，來做主的工。閣看約伯會贏過濟濟試煉，這是因為伊對重上帝的話來贏過逐項的食物。聖經實在真寶貝通欣慕，因為有佮咱的性命大關係。可惜濟濟人講無時間通讀聖經。我捌問一位的會友講，「你捌讀聖經mah？」伊應講，都無時間。我閣問伊講，你有食飯無？伊應講，有。閣問伊講，都有時間通食飯，thái無時間通讀聖經？有時間通拍算肉體的活命，thái無有時間通求屬神的活命咧？」(馬太4：4)。耶穌講，「人的活，毋但干焦倚靠餅，就是倚靠對上帝的喙所出攏總的話。」詩篇講，「主的話親像光，讀聖經的人，就行佇光明。撒旦的勢力非常的大，愛陷害咱，現在咱做信徒--的，踮佇這个撒旦掌權的地界，若無日日讀聖經，的確會予魔鬼陷落，因為人佇烏暗中行khám-khia̍t的路，若無光通照，就的確會跋倒。以弗所的批有講，「著攑聖神的寶劍。」咱有對敵，撒旦就是咱的對敵，咱只有著攑神的劍，就是上帝的話，才會得勝。咱看耶穌佇曠野受試的時，三擺引起聖經的話來較贏魔鬼；也閣亞當佇樂園的時陣，上帝對伊講，「分別好歹樹的果子，毋通食，因為食的日，你的確死。總是魔鬼對伊講，「無的確會死，」是因為亞當無確信上帝的話，到尾跋倒。

約翰講，「少年人啊！上帝的道理著常常囥佇恁的心內，恁就欲贏過遐的歹」。閣聖經親像水，會洗清咱。詩篇講，「主的道理，會洗清氣人的心」。以上所講，聖經親像米糧，親像劍，親像活水。Taⁿ親像這款的寶貝，thài濟濟人毋愛讀聖經咧？咱人若無想欲啉食，就是因為伊有病，親像喙齒疼的人，無想愛欲食物；親像有罪的人，也較毋愛讀聖經。我做神學生的時陣，捌一擺去訪問著一位的信者，佇伊咧讀聖經的時陣，共伊聽詳細，伊若讀到佇罪惡抑是犯罪的所在，伊煞恬--去，就跳過站才閣讀。後來我才知伊有犯著聖經的教示，家己知罪，毋敢讀，後來伊若欲讀聖經的時，攏著過揀，才讀，因為有罪就毋愛讀聖經。彼得前書2：1，2有講，「所以恁著除去攏總的惡毒，以及攏總的詭譎佮假好，佮怨妒，攏總譭謗的話，就著親像拄仔生的嬰仔，欣慕神靈choan的奶，予恁長大到得著救。」可惜濟濟人袂曉欣慕，親像以色列人佇曠野，上帝日日賞賜嗎哪，總是in棄嫌，無想愛食，只有咧回想著in佇埃及所食的瓠仔，韭菜，in所以厭賤嗎哪，因為in干焦欣慕瓠仔，韭菜。親像咱有人干焦欣慕一个世間，無欣慕聖經一樣。這个世界，就是咱的埃及，濟濟人愛裝thāⁿ，就無愛聖經，愛讀小說，時事，就紲袂記得讀聖經。聖經是親像光，甚物人無愛？總是若行佇烏暗中的罪人，就毋愛；親像目睭疼的人，就毋愛光；因為光若射著伊的目睭，會加較艱苦；也有的人讀聖經，驚予聖神鑿著伊的心，所以伊毋愛讀聖經，這是毋愛讀聖經的大原因。

列位，咱著佇主的面前，求主鑑察咱的心，求主醫治咱的喙齒，予咱的食；也來醫治咱的目睭，予咱的目睭的會看見光。啟示錄3：18講，「我苦勸恁，著買藥膏來抹你的目睭，予你會看見。」所以咱有罪--的，著認罪，求主赦免；猶過有罪，反轉愛離開主遠遠的人，是第一可憐，第一戇。耶利米8：9有講，「In棄sak耶和華的話，心底有甚物智慧neh？人若肯謙卑佇主的面前，就主的確看戇人做有智慧」。

列位，咱的祈禱，是人對上帝講話，若是讀聖經，是上帝對人講話；親像咱所講的話，愛予上帝聽見，的確著代先聽趁上帝的話，若毋是按呢，就咱的祈禱，就變做夢想，無得著應允。我蹛佇教會的時陣，常遇著會友來問我講，「怎樣上帝thài無欲聽我的祈禱咧？我就用撒迦利7：13的話講，「因為伊捌叫，in毋聽；按呢in欲叫，我也毋聽，坐是萬軍耶和華所講--的」。這節的聖經講，咱毋聽上帝，上帝也親像按呢毋聽咱。咱若愛上帝，上帝也親像按呢毋聽咱。咱若愛上帝的聲，只有愛讀聖經，若無讀聖經，靈性，活命的確枯焦。

  1)日日讀聖經(使徒行傳17：11)，遮的人比帖撒羅迦人較文明，因為in致意領受道理，逐日查考聖經，看遮的事果然有按呢抑無？這節講Pí-lí-a人比帖撒羅尼迦人較gâu，就是因為in日日讀聖經。咱也著日日讀聖經佮Pí-lí-a人一樣，我想咱肉體日日啉食，親像按呢，咱的靈性著日日啉食。可惜有人佇奮興會的時，逐日讀十外章的聖經，真感心，總是奮興會後，連一章也無愛讀，這款是真錯誤。咱著逐日無停來讀才好請問甚物人佇禮拜日，一日久會食幾若頓的飯咧？這是袂會--的，因為昨日食，chā日食，今仔日嘛著閣食，明仔載嘛著閣食，咱日日著愛食，所以咱靈性的啉食，也是相siāng。以色列人咧抾嗎哪，是逐日咧抾；若抾起來勸，愛生蟲，變臭，這是咧教示咱求靈性的啉食，應該著日日來抾，所以咱著逐日讀聖經，向望咱逐日得著奮興，有人的的奮興是倚靠奮興會彼時nā-tiāⁿ，奮興會若煞，伊就煞；這款是靠奮興者nā-tiāⁿ，奮興者若轉去，伊也綴伊轉去。咱愛得著久長的奮興，的確著逐日讀聖經，因為若逐日讀聖經，就逐日得著奮興。鄙人大大欣慕咱大家逐日讀聖經，來得著永久的奮興。

  2)照次序來讀。舊約對創世記起，新約對馬太起，有的人今仔日讀民數記，明仔載讀創世記，無次序讀法，較無甚物得著利益。鄙人佇神學校的時是亂-讀一場，較無得著甚物利益。向望大家照次序來讀。

  3)透早的時來讀聖經。讀聖經毋是干焦次序的問題nā-tiāⁿ，時間真要緊。以色列百姓抾嗎哪，是佇清早的時陣來抾，若到下晡時就無--去。請列位佇清早的時陣來聽上帝的聲，耶穌教示咱著先求上帝的國佮伊的義，毋是叫咱代先做咱的代誌到清楚，才來聽上帝的話；咱若專心欣慕上帝的話，我確信上帝的確欲祝福咱。

對咱讀聖經，最後有一項重要的事，就是讀聖經，的確愛信聖經，親像衛司禮in彼派的人，攏信聖經，所以上帝用--in，一旦既予上帝用，in就做出偉大的工程。佇世界講道理真有能力的人，都攏是真愛讀聖經的人，親像日本賀川豐彥先生，抑是中國宋尚節先生，in的講演真有感動-力，若是看in的傳記就知in是真愛讀聖經的人，因為聖經有活潑的能力佇咧。不幸有這款的人隨便批評聖經是趁人的意思來批評，是用拳頭母咧拍空氣，只有敗害人的信心，做魔鬼的工nā-tiāⁿ，所以咱著求信心，佇未讀聖經的以前，代先祈禱，讀了後，亦著祈禱，毋通靠人的教示，只有著倚靠聖神的引chhoā。歌羅西3：16講，「著予基督的道理佇逐樣的智慧充滿佇恁的心，用是用歌，用神的賦相教示，相苦勸；對恩典佇心內咧吟來呵咾上帝。」所以咱手提聖經也是好，聖經下佇咱的心內閣較好。大衛王講，「我將主的話下佇我的心內。」上帝的話若佇咱的心內，就有能力。佇平安的時，是看袂出，總是人若遇著苦難的時，聖經的話就顯出來照佇人的中間，會激勵人，會安慰人，有歡喜快樂，佮大的能力。向望咱大家用祈禱的精神來讀聖經，就予咱得著聖神氣力，贊咱用上帝的話來活用，佮實現佇咱日常生活的各部分。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461