首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 雜錄
雜錄
卷期：第629號 本次： 日期：1937/8 刊名：台灣教會公報 頁數：12-14
篇名：雜錄 [ Cha̍p-lio̍k ]
作者：
  顯示 : 漢羅 全羅 並列  

雜錄

1937年8月629期    12-14

 

  I. 教會生活雜觀。

  1. 教會是上帝的厝，是靈魂得著安歇的所在，無論甚物人入來到遮，應該有歡喜快樂才著，因為是有欣慕愛得著心神的米糧，得著上帝的恩惠，愛獻感謝，祈求服侍敬拜的心肝，所以才有到這个所在。「人對我講，咱來去耶和華的厝，我就歡喜」(詩篇122：1)。做詩的人有表明in的自發tek的意志，所以穩當有經驗著彼个「去耶和華的厝」的幸福。

  2. 詩篇84篇的記者有怎樣咧戀慕耶和華的厝，若掀起來讀的人就知。真媠的京城，就是新的耶路撒冷對天降落，彼个形影彷彿佇入聖殿來敬拜的人的中間，誠心求叫主，呵咾感謝的聲音透到佇天頂，就有經驗著主的臨在，滿滿有福氣，靈魂永遠袂喙焦，親像河水清清長流無歇。主講，「就近我的人，我決斷無棄sak伊」(翰 6：37)。「因為不論甚物甚物所在，有兩三人佇我的名聚集，我也佇in中間」(太18：20)。「義人求叫，耶和華聽見，就救in脫離一切的患難。耶和華oá-近傷心的人，拯救靈性痛悔的人。義人有濟濟苦難，總是耶和華救伊攏脫離」(詩篇34：17-19)。「所以恁著反悔來越轉頭，予恁的罪會得擦消，予安樂的日期的對主的面前來；閣主欲差為著恁代先定著的基督，就是耶穌」。(使徒行傳3：19，20)

  3. 教會的地基就是耶穌基督(I林3：11；I比2：4-6)，是主流伊的寶血來建設--的，對伊的寶血咱得著佮上帝閣和。基督的身軀，就是教會，伊是身軀的頭，「伊所賞賜的，有使徒；有先知，有傳福音的，有牧師佮先生，為著欲予聖徒齊備，來做差用的工，起造基督的身體；直到咱眾人佇信，以及捌上帝的囝來合一，到成一个完全的人，到得著基督的充滿來長成彼般」(以弗所4：11-13)。眾信徒著攏，「長長踮佇信，有地基閣堅固，無受搖動，來離開福音」(歌羅西1：23)。「才會佮攏總的聖徒曉悟'基督的疼'，彼个長，闊，懸，深，也知基督的疼，就是盤過佇人所會知的充滿來得著充滿」(以弗所3：18，19)。

  4. 「按呢恁無欲閣做外面人，寄跤--的；就是佮遮的聖徒siāng國，做上帝家內的人，受起造佇遮的使徒佮先知的地基等，基督耶穌家己做厝角要緊的石；在佇伊見若所起--的，攏相連絡，踮佇主來漸漸成做聖殿；恁也踮佇伊相佮受起造，成做上帝用神所徛起的厝」(以弗所2：19-22)。「敢毋知恁是上帝的殿，上帝的神踮佇恁內面mah？人若毀壞上帝的殿，上帝欲毀壞伊；因為上帝的殿是聖，殿就是恁遮的」(I林3：16，17)。「若是時欲到，現今就是，真實敬拜的，欲用神用真實敬拜爸；因為爸是愛這無人敬拜伊。上帝是神；敬拜伊的人，著用神用真實來敬拜」(翰4：23，24)。

  5. 「我的兄弟啊，恁守咱的主耶穌基督榮光的主的信，毋通用外貌取人」(雅各2：1)。「所疼的兄弟啊！咱著相疼；因為是對上帝來；見若疼的是對上帝生，閣捌上帝是疼」(I 翰 4：7，8)。「咱有疼，因為伊代先疼咱，若有人講，我疼上帝，也怨恨伊的兄弟，就是白賊--的；因為無疼有看見的兄弟的，就袂疼所袂看見的上帝」(I 翰 4；19，20)。「恁對順趁真理已經清氣恁的神魂，致到疼兄弟無假，就著對心切切相疼」(I彼1：22)。「凡事莫得為著結黨，抑是空空的榮光來做；獨獨大家用謙遜的心看別人的事。恁著有基督耶穌的心做心」(腓 2：3-5)。「恁中間愛做大--的，欲做恁的差用；愛做頭--的，欲做恁的奴僕。親像人子來毋是欲差用人，是欲予人差用；閣獻伊的性命來贖回濟濟人」(太20：26-28)。「著存無通責備的良心；才恁佇tá-lo̍h一項事受譭謗，就佇彼項事會予遐的誣賴恁踮佇基督的好品行--的，家己受見笑。因為上帝的旨意若愛按呢，就恁行好來受苦，比行歹來受苦較好」(I彼3：16，17)。

所以著除去白賊，逐人佮伊的厝邊講真實，因為咱相仝做體(以弗所4：25)。「對敵恁的著疼in，窘逐恁的，著替in祈禱」(太5：44)。著用仁慈相款待，存憐憫的心；大家相赦免，親像上帝佇基督捌赦免恁一樣(以弗所4：32)。「著疼厝邊親像家己」(羅馬13：9)。「所以恁若愛人款待恁--的，恁亦著按呢款待人；因為這是律法佮先知」(太7：12)。「上帝會行做盤過佇咱一切所求所想--的，就是照伊所運行佇咱的權能。願佇教會佮佇基督耶穌榮光歸伊到萬世，代代無煞。Á-bēng」(以弗所3：20，21)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461