Mô͘-se toān

1937.08  p.13-14

1. Ū chi̍t Í-sek-lia̍t ê cho̍k,

Chó͘-kong chhut-goā Ai-ki̍p kok;

āu-lâi kiáⁿ-sun soà-soà thoân,

Kun-ông kiaⁿ-liáu in bô͘-hoán.

2. Só͘-í giâm-siú chhut hō-lēng,

Hoan-hù khí-chō nn̄g tāi-sêng;

Lô-lô lo̍k-lo̍k chò khó͘-kang,

Sio-iô chò-chng bô làng-phāng.

3. Tàn[sic.]-sī sui-jiân siū khó͘-chhó͘,

Hoán-tńg ji̍t-ji̍t thiⁿ jîn-sò͘;

In-uī thiⁿ-téng chin oa̍h Sîn;

àm-tiong pó-iū I jîn-bîn.

4. Kun-ông ê sim koh-khah pháiⁿ,

ài beh bia̍t in gín-ná chai;

Bēng-lēng nn̄g-uī ê siⁿ-pô,

Seng-sán ê sî khoàⁿ hō͘ hó.

5. Nā-sī só͘ siⁿ ta-po-kiáⁿ,

Li̍p-khek tio̍h hāi i ê miā;

Chhut-sì khoàⁿ--tio̍h sī lú-jî,

Lâu miā m̄-bián hō͘ i sí.

6. Hó-tit chit nn̄g-ê sán-pô,

Chit khoán to̍k-chhiú m̄-káⁿ chò;

Kun-ông koat-ì ài sêng-sū,

Só͘-í koh-chài chhut sèng-jū.

7. It-poaⁿ seng-sán nā lâm-jî,

Tio̍h hiat hô-tiong chìm-chuí sí;

Tú-tú hoat-chhut chit hō ì,

Chi̍t ê toā uí-jîn chhut-sì.

8. Pē-bó khoàⁿ-kìⁿ chin khiáu-khì,

M̄-kam hiat i tī hô--nih;

Só͘-í khǹg-liáu saⁿ goe̍h-ji̍t,

Kiaⁿ-liáu boē thang koh pì-bi̍t.

9. Choân-ke sèⁿ-miā ē lân-pó,

Siūⁿ-lâi siūⁿ-khì sim cha̍p-chô;

Chiū chò lô͘-tek siuⁿ lâi khǹg,

Chiong iù eⁿ-á hē tiong-ng.

10. Bó-chhin ū kap i toā-chí,

Pàng tiàm hô-piⁿ lô͘-tek--ni̍h;

Hiat-liáu hn̄g-hn̄g khiā teh khoàⁿ,

Khoàⁿ i sió-tī beh án-choáⁿ.

11. Kó-jiân teh lâi lú kong-chú,

iā toà chhe-ēng ê siáu-lú;

Cháu-lo̍h hô-tiong sé sin-khu,

Thiaⁿ gín-ná háu ba̍k-nih-kú.

12. Khoàⁿ siuⁿ tī hit lô͘-tek--ni̍h,

Chhe-kah[sic.] lú-pī khì the̍h i;

Khui khoàⁿ ū chi̍t ê lâm-hâi,

Chai sī chhut tī Hi-pek-lâi.

13. In ché li̍p-khek cháu kīn-chêng,

Khui-chhuì ǹg kong-chú seng-bêng;

Boeh, m̄, chhiàⁿ léng[sic.]-bó lâi io,

Goá chiah suî-sî lâi khì kiò.

14. Kong-chú thiaⁿ-liáu chiū ìn hó,

In ché chiū khì chhiàⁿ chhin-bó;

Tn̄g leng sàng kàu ông-kiong siâⁿ,

Tit-tio̍h chheng-chò Mô͘-se miâ.

15. Ì-sù tuì chuí kiù khí-lâi,

Bián siū chìm-sí ê chai-hāi;

Tit-tio̍h sêng-jīn bêng-lêng chú,

Tha̍k-chheh chhang-miâ choè khó-chhú.

16. āu-lâi kàu tī sì-cha̍p-hoè,

Chhut-goā khoàⁿ-tio̍h in ê poè;

Tú ū chi̍t ê Ai-ki̍p lâng,

Phah in pún-cho̍k chhò-sim tāng.

17. Mô͘-se khoàⁿ in ê chó-iū,

Li̍p-khek phah-sí chi̍t hiong-chhiú;

Chiū chiong sin-si iám soa-tiong,

Ná kiâⁿ ná siūⁿ hoê ông-kiong.

18. Keh-ji̍t koh-chài khì goā-uī,

Khoàⁿ-kìⁿ tông-pau teh saⁿ-chiⁿ;

Mô͘-se chhiat-khǹg bû-lí--ê,

M̄-thang saⁿ hāi saⁿ oan-ke.

19. Khó-sioh m̄-thiaⁿ ìn chit khoán,

Lí kiám iā beh phah-sí goán;

Mô͘-se thiaⁿ-liáu sim kiaⁿ-hiâⁿ,

Kiaⁿ chêng só͘ chò lâng chai-iáⁿ.

20. Só͘-í tô-cháu kàu Bí-tiân,

Chi̍t lō͘ tit Chú si khó-liân;

Tī hia ū chhoā chè-si lú,

Chiū tiàm in tiūⁿ-lâng ê chhù.

21. Kam-goān khì-sak ông-kiong hok,

Kái chò bo̍k-chiá hoán-tńg lo̍k;

Chit khoán keng-koè sì-cha̍p chhiu,

Tông-pau siū-khó͘ i siông siūⁿ.

22. Chi̍t ji̍t koáⁿ iûⁿ kàu soaⁿ-tē,

Khoàⁿ-tio̍h chhì-phè hoat kng-hoé;

Sui-jiân siū sio lóng bô huí,

Sim-tiong gî-he̍k koh-iūⁿ luī.

                   (Boē-oân).