首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 六十六卷的聖冊
六十六卷的聖冊
卷期：第630號 本次： 日期：1937/9 刊名：台灣教會公報 頁數：5-9
篇名：六十六卷的聖冊 [ La̍k-cha̍p-la̍k koàn ê Sèng-chheh ]
作者：許水露 Khó͘ Chuí-lō͘
  顯示 : 漢羅 全羅 並列  

六十六卷的聖冊

許水露

(接7月第8面)

1937年9月630期      5-9

 

第8講：路得記

路得記就是六十六卷的聖冊的第8卷。怎樣會排佇士師記佮撒母耳記的中間？因為這个事件是發生佇士師的時代，也是撒母耳記所著記彼个大衛王的祖先。所以為著便宜上才予伊排佇士師記佮撒母耳記的中間。若照希伯來的原典是雅歌，路得記，哀歌，傳道，I-sū-thiap，照這个順序做預言書的一部分排佇尾仔。

六十六卷的聖冊中，只有兩卷的冊用女子的名來號伊，就是「路得記」佮「Í-sū-thiap」路得是異邦摩押的婦人人，嫁予猶太人波阿斯做某。對伊的後裔生大衛王；所以佇主耶穌的族譜裡也有伊的名。雖然路得本身是異邦人，是異教徒；猶過伊有真實揣求上帝，所以也得著上帝的看顧佮施恩。親像聖彼得講，「Taⁿ我真正知上帝無用外貌取人，獨獨佇逐邦國見有敬畏伊來行義的人，予伊歡喜接納」(行傳10：34，35)。

  Í-sū-thiap是猶太人嫁予異邦人亞哈隨魯王做王后。路得記本是佮士師記合做一本，後來聖神共著者講，著分開做兩本。路得記是表現以色列族佇烏暗困苦的中間，猶有一个快樂的中間，猶有一个快樂的家庭，疼主的家庭佇咧。這本冊是聖潔的譬喻，毋是戀愛的故事。

  I. 本書的著者=撒母耳。

  II. 本書著作年代=有兩說：─

    (1)是B. C.1322─1312

    (2)是B. C.1093─1075

本書所記載的事件，就是屬佇士師政治時代。多數的學者推定這件事是發生佇「士師基甸的時代」，所記10年間的歷史。總是著作的年代是佇大衛出世後。

參看本書1：1─5，4：7─22。

  III. 本書著作場所。

  大約佇蘇弗城(I 撒9：5，6)。

  IV. 本書的鍵語。

    (1)安歇(安息，安身處)。

    「願耶和華賞賜恁安穩徛起」(1：9)。「我著替你求一位安身的所在，予你得著福氣」(3：1)。

    (2)贖回。

    「所著贖--的，獨獨你一人，你以外，只有我」(4：4)。

    「我欲共伊贖，驚了我的家業反轉有害；你通共伊贖」(4：6)。

  V. 本書文學上的價值(本書文學上之價值)。

本事件的主人翁，就是摩押婦人路得。實在是文學上佮心靈上的寶玉。第18世紀，英國文學的大權威者サムエル，ジヨンソン博士(D. D. Samel Johnson)佇倫敦(London) 俱樂部，對伊的朋友發表伊最近所著作田園詩，讀予in聽了，大家不止稱讚彼个感傷tek的媠(感傷的美)。博士應講，「這个是對平時所看輕的路得記來得著--的；佇文學中無一个會比路得對伊的大家拿俄米所講的話較媠--的。」「路得講，莫得教我離開你，無佮你相佮佇咧；因為你所去--的，我也欲去；你所徛--的，我也欲徛；你的百姓，也是我的百姓；你的上帝，也是我的上帝；你死的所在，我亦死佇遐，葬佇遐；是我到死才通離開，我若無按呢，願耶和華來刑罰我」(1：16，17)。

  VI. 本書的目的。

    (1)是欲揣求Tāi-pit，佮Tāi-pit的主耶穌基督的系統。路得的血有流入佇主耶穌的血管裡。

    (2)是欲表明用熱愛的能力會較贏萬般的困難。毋是男，女間的小說tek戀愛的故事，就是寡婦對大家熱情tek誠實的疼的實事。

    (3)是欲表明婚姻最高的理想(4：11─17)，佮結婚生活是神聖崇高的交情。

  VII. 本書的分段。

  第1段：轉居摩押(1：1─5)。

  1. 遠離聖靈(1：1，2)。

就是拿俄米全家拄著大飢荒，搬去異邦摩押徛起。信徒拄著苦難，有兩條路通走：─

  (1)向望主，綴主到路尾。

  (2)靠家己，走家己的路。

  「猶太」解說是「呵咾主。」「伯利恆」解說是「麵包。」呵咾主的人若無麵包通食的時，就欲走去異邦得麵包來食，這就是靠家己，走家己的路，無信心，離開聖靈。

  2. 拄著災殃(1：2)。

就是丈夫以利米勒過身。「以利米勒」解說是「我的上帝做王」。一旦拄著飢荒，患難窘迫，就無掠上帝做王，是自己做王，離開上帝。「拿俄米」解說是「甜」。拄著逆境，靠家己，走外邦，離上帝，「甜」紲變做「苦」。兩个囝：「瑪倫」解說是「老爸」；「基連」解說是「軟弱」。In兄弟到外邦無偌久，染著病，身體軟弱，紲死--去。以利米勒因為家內有破病，有軟弱，閣拄著飢荒，才搬家去外邦，希望得恢復，發財。

  3. 上帝管教

信徒離開上帝，走死路，然後才會閣回心。拿俄米佇遐共伊兩个囝娶新婦。「O-pa」解說是「諂媚」。「路得」解說是「靈恩」。按呢in佮世俗同化，光陰親像箭，一目nih久過十年。俗語講，「福氣無雙項到，災禍無孤單行」(福無雙至，禍不單行)，實在有影；爸死，囝也死；才欲愛道理。

  第2段：歸故鄉(1：6─22)。

  1. 大家新婦離別(1：6─13)。

拿俄米經過千難萬苦，到這霎才確實拍死世界，拍死肉體，甘心決意欲綴主，歸故鄉，才佮伊兩个新婦訣別。兩个新婦真有情，啼哭毋甘佮老大家分開。親像彼得講，「主啊！我到死，也無放拺你。」後來雞未啼的代先，3擺毋認主--的，敢毋是彼得mah？按呢感情的作用袂通靠--得。大新婦O-pa也是按呢。

  2. 疼主到死(1：14─18)。

  O-pa就離開大家，倒去伊的故鄉。只有充滿靈恩的路得，到死都毋離開大家。O-pa是對感情作用來行世界的路。路得是綴主到死來走天國的路。人若袂會綴主到死，實在親像O-pa緊離開緊好。若果然會忍受十字架，綴主到死，正是主所疼--的。對下面彼5項通看出靈恩路得的心地：─

  (1)你不論tá-lo̍h去，我也去。

  (2)你踮佇遐，我也佇遐。

  (3)你的國，就是我的國。

  (4)你的上帝，就是我的上帝。

  (5)你是佇遐，我也死佇遐。

若毋是按呢，願耶和華重重刑罰我。路得的心確實對世界有死，這是對拿俄米疼的感動。濟濟信徒甘願為主死，這是對主的感動。

  3. 同心來行，若袂同心就袂會同行。拿俄米到故鄉伯利恆，通城的人大gông-ngia̍h，因為「甜」變做「苦」(瑪拉)。因為我離開上帝，所以滿滿出去，空空倒來；只有帶一个外邦的查某囡仔倒來，就是我的主救伊的。離開咱的主，離開上帝的寶座，滿滿來世界，空空倒去，只有救咱遮的失迷的羊(II哥8：9)。

  第3段：求安歇(2，3章)。

  1. 抾麥穗(2：1─7)。

  以利米勒的親戚中有一个人，名叫波阿斯，是大財主。「波阿斯」解說是「安慰的人」。「大財主」解說是「大有能力--的」。路得去波阿斯的田裡抾麥穗，特別得著伊的恩典。

  2. .恩上加恩.(2：8─16)

路得日日抾麥穗，得著安慰的人波阿斯，送物，送茶，送食物。咱日日讀聖經，抾嗎哪，得著保惠師照顧咱，送咱活命水，活命餅，坐佇主的身邊來食(約翰6：35)。

  3. 有孝大家(2：17─22)。

  (1)路得將恩賜食一半，一半提倒去予伊的大家食。咱傳福音也是家己得一半，一半予聽眾食。

  (2)將彼日的經過報伊知。

大家將彼日的經過相報知真好，按呢家族才會完滿，物質上雖然散，精神上得好額。所羅門王講，「相疼做伙食菜蔬，贏過怨恨做伙食肥牛」(箴言15：17)。

  4. 完全奉獻(3：1─6)。

拿俄米毋甘路得蹛曠野受風霜，替伊揣安歇的所在。路得完全順服。聖靈毋甘咱日夜佇曠野漂流無定，愛咱進入安歇的地，咱著完全順服。

  5. 聖潔待命 (3：7─18)

路得聽大家的話，洗身軀，抹油聽候。咱也著日日成聖聽候主召。

  第4段：得安歇(4章)

  1. 釘死肉體(4：1─6)。

  (1)近親者體貼肉體，毋肯高舉十字架，顧家己的腹肚。

  (2)波阿斯釘死肉體，讓聖靈做主，來贖回拿俄米的業。

  2. 歸主做聖(4：7─12)。

路得佮波阿斯結婚，「褪鞋」，表明交予聖靈做證據，十字架做證據，顯明咱有死，完全聖潔，受聖靈充滿，歸主做聖。

  3. 到處結果(4：13─21)

路得佮波阿斯同房，就懷孕生囝，名叫O-pek。「O-pek」解說是「崇拜」，就是大衛的祖先。「Tāi-pi̍t」解說是「上帝的疼」。對按呢看起來，屬靈的人所生--的是「敬拜上帝」。敬拜上帝的人所生的囝孫是「上帝的疼」。路得受聖靈的充滿，就變成活水江河，一代傳過一代，到世界的末日。

  VIII. 本書靈tek教訓的雛型。

  1. 贖業者波阿斯=代表救贖者耶穌基督。

    (1)是收割的主。

    (2)Lū-la̍t的富翁(2：1─5)

    (3)有救贖路得(4：1─12)

親像保羅講，「伊為著咱獻家己，欲贖咱脫離一切的不法；閣為著本身洗清咱做伊家己的百姓」，就是熱心佇遮的好所行--的(提多2：14)。

  2. 路得=代表異邦的罪人。

    (1)伊是受咒詛的摩押人，咱是受咒詛的罪人(以弗所 2：3)。

    (2)伊有離開異邦的鄉里，咱也著離開罪惡的世界(II 哥 6：17)。

    (3)伊佇波阿斯的田抾麥穗得恩典，咱佇上帝的施恩的得救，就近上帝(羅馬4：4，5)。

    (4)伊得著波阿斯救贖，紲嫁予伊；咱得著主耶穌基督的救贖，紲入佇伊的生活(II 哥 11：2)。

    (5)伊得著安身的所在；咱也得著安身的所在，佮基督相佮踮，得享受上帝所賜的平安佮滿足(翰 14：27)。

  3. 拿俄米就是介紹者，伊是引chhoā路得佮波阿斯結合；聖靈chhoā咱佮基督結合，親像行洗禮約翰介紹學生就近耶穌(約翰3：19，30)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461