首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督閣活
基督閣活
卷期：第630號 本次： 日期：1937/9 刊名：台灣教會公報 頁數：9-12
篇名：基督閣活 [ Ki-tok koh-oa̍h ]
作者：
  顯示 : 漢羅 全羅 並列  

基督閣活

1937年9月630期    9-12

 

(1937年7月中傳教師修養會，偕睿廉先生所講演--的)

基督閣活佇歷史中是一个重大的事，是大的神蹟，也是在早使徒的氣力。In受著窘逐，關監，也是好膽干證，「用耶穌基督對死人中閣活，捌重再生咱，來得著活的向望」。

保羅講，(1哥林多15：3─8)，「因為我所來傳予恁的，第一，就是基督為著咱的罪死，照聖經所記載；閣有埋葬；第三日閣活，也照聖經所記載；有出現予磯法看見；閣出現予十二使徒看見；閣一擺出現予五百外的兄弟同時看見；其中大半猶佇咧，若是有的已經睏去。閣一擺出現予雅各看見；又閣一擺出現予攏總的使徒看見；上路尾也出現予我看見。」伊按呢證明基督的閣活。

總是檢采有人欲講，這是學生有咧向望耶穌會閣活。毋過in無按呢向望。In是絕望。

有人欲講，是學生心內咧想耶穌有閣活。毋過學生無按呢想。馬利亞佮抹大拉的馬利亞共使徒講，主閣活。使徒看遐的會做無影也毋信。

有人講是學生看見異象。毋過若是看見異象，是一人看一款，欲thái會500人siāng時看siāng款。

有人講，耶穌無影死。毋過血佮水對伊的身軀流出，出憑據伊已經死。若是無死，嘛袂會出墓，的確無力通行。

若是耶穌無死，無閣活，學生袂會傳彼款閣活的道理。

基督閣活的事，佇新約聖經有記百外擺，來做確實的見證。

主受掠佮釘十字架的時，伊的學生不止驚。主閣活了後，in到極好膽四界傳十字架的道理。因為親目看見主閣活，所以雖然窘逐in，in也無驚。彼得講，「耶穌基督對死人中閣活。」伊毋是聽人講，伊是親目看見；所以好膽做干證。

基督閣活了後，伊的聲，伊的手，伊的面貌有予濟濟人認得。

第一代先是馬利亞，去墓裡，聽見耶穌叫講，馬利亞，伊認得耶穌的聲就講，拉波尼。

有一日學生中有兩人去一个鄉社，名以馬忤。耶穌近倚佮in相佮行。In兩人袂認得伊。到厝，「相佮坐桌的時，耶穌提餅祝謝，擘予in。In的目睭開，就認得伊。」In認得耶穌擘餅佮祝謝。

多馬認著耶穌的傷佮鐵釘跡。彼得佮約翰咧討魚的時，耶穌講，「拋網佇船的正爿，就會得著。」對按呢耶穌所疼的學生，共彼得講，「是主啦」。約翰認得是主，因為伊有行神蹟。耶穌上天的時有500人看見。In攏認得主耶穌。認得面貌佮全體。

主耶穌上天了後，信徒將安息日共伊改換。換做七日的頭一日，就是主閣活的日，也是咱的禮拜日。佇這日in聚集禮拜，來記念主對死閣再活。

佇內地有一个和尚名叫Michihata放離佛到來信耶穌基督。現時伊咧做牧師，四界報揚主的福音。伊講，「基督是歷史tek的基督。雖然受著人批評的打擊，基督猶過徛在佇咧。伊閣活上天了後，佇50，抑是60年的中間，伊的信徒已經將濟濟項來寫佇冊裡。這是歷史。伊有完全，有道德，也有能力。伊無罪，所以會救人。釋迦修行愛完全，總是做袂到。基督出世就完全，因為伊是屬佇靈界，所以伊的好膽予咱想袂到。伊有行神蹟來顯出上帝的仁愛佮憐憫。伊死佇十字架。伊閣活。伊上天。釋迦死，也無人捌看伊閣活。但是基督有濟濟人看伊閣活。伊閣活了後，就有人服侍伊。咱知猶太人無濫糝服侍。In是服侍一个上帝nā-tiāⁿ。啥事服侍耶穌基督。伊閣活了後，信徒隨時服侍伊，因為認伊做上帝的囝。基督是永活，也基督徒有活命佇咧。」

對按呢Michihata來信基督；現時做牧師咧報揚主的名。

佇現時咱也著熱心報揚主的福音。檢采對一句話予人來信主。親像在早佇英國有一个人叫做Spurgeon伊聽道理來信主，然後成做一个大的傳教者。有人講佇這500年的中間無人比伊較gâu傳道理。

  Taⁿ將伊怎樣來重頭生，翻譯寫佇下底。伊講：

  「我少年的時毋捌恩典的福音。有人傳上帝的大權能，這是好，總是伊無報我得救的路。有一位牧師傳律法的道理。這是親像犁田也無掖種子。有一位牧師攏是出命令，親像武官咧指揮無跤的親兵。」

我知著信耶穌才會得著救，總是著怎樣才會信，我袂曉得。

我的心常常艱難。佳哉佇1850年，我chhàu-tú-khám去一間細間拜堂禮拜。彼日只有15人來禮拜。伊無學問，閣看了戇戇。伊也無甚物言詞。伊的題目就是以賽亞45：22。「地極的人，攏著仰望我來得著救」。這个砧皮鞋師傅講話歹勢，歹勢，總是我真注意聽。

伊開聲講，「好朋友啊！」這个題目真明。伊講「著仰望」。Taⁿ欲仰望，毋是僫的事。你的跤，你的指頭仔毋免振動。干焦仰望。咱欲仰望毋免入大學。雖然你是戇戇的人，你若會曉仰望。逐人會曉看，會曉仰望。囡仔嘛會仰望。

總是咱的聖冊是按呢講，「仰望」。恁中間濟濟人是咧仰望家己，咧看家己。

看家己無路用。干焦仰望耶穌。聖冊講，「著仰望我。」

後來這个砧皮鞋師傅大聲講，「著仰望我。」

後來這个砧皮鞋師傅大聲講，「仰望我，我流汗親像血。仰望我，我受釘佇十字架。看我死，受埋葬。看我閣活。看我上天，我坐佇天爸的大爿。列位，恁著仰望我。干焦仰望我」。

到遮伊用指頭仔指我，講，「少年人你的心真艱難」。有影，我的心真艱難，總是我猶毋捌予人對台頂用指頭仔指我。

伊就閣講，「你會不時艱苦，活也艱苦，死了也艱苦。總是這時你若順趁我的題目，佇這時會得著救。」

後來伊非常大聲喝講，「少年人，你著仰望耶穌基督」。

佇彼時我心內的烏雲連鞭四散。佇彼時我愛出聲呵咾主佮伊的寶血。佇彼時我的心向主，我信我的救主。

可惜較早無人按呢教示我，無人按呢傳予我。Taⁿ恁若仰望耶穌，倚靠基督，恁會得著救。

  「這是耶和華吩咐所羅巴伯的話講，「毋是用權勢，毋是用能力，就是用我的神；這是萬軍的耶和華講--的」(撒迦利亞4：4─6)。

上帝的話極奧妙。彼个砧皮鞋師傅傳主的閣活的道理，來得著這个少年人。也這个少年人，Spurgeon本身有引chhoā幾若萬人來仰望耶穌，來信咱的主。

閣再有一个少年人在早佇美國大學咧讀冊。伊是全大學第一有才情，第一gâu的學生。這个人現時猶佇咧，就是Bo̍k-tek博士(J. R. Mott)。伊佇世界中是一个出名人。

做學生的時代伊愛囥僥疑，所以聖經內面所講--的，伊無欲攏信。後來伊講伊欲斟酌研究看有事實抑無。伊對家己講，聖經有濟濟奧妙的事，其中第一大奧妙--的，就是基督有閣活。設使基督若無閣活，其餘--的伊無愛信。若是基督確實有閣活，聖冊內攏通信。耶穌行各樣的神蹟，對在室女馬利亞來出世。伊死佇十字架來替世間人贖罪，這自然攏通信。所以伊專工佇幾若月日的中間，致意研究這个問題；主有閣活抑無？伊對逐方面來研究。反對聖經，贊成聖經的冊伊攏有看。後來關佇房間裡，伊規年家己辯論這个閣活的問題。代先家己準辯護士欲辦耶穌，講你無閣活。然後做基督的辯護講，你確實有閣活。伊就向12塊空椅，講，恁列位的判官，已經聽了。Taⁿ主耶穌果然有閣活抑無？請判斷這个事。伊就替12个判官講，主耶穌照阮所聽的證據，你實在有對死閣活。主啊！我信你，我信你閣活。Taⁿ我欲做你的學生。我欲傳報你的福音，我信聖經所記載--的。

隔日共大學總長講伊無欲閣讀冊。伊欲傳道理來救人。總長苦勸伊著閣讀，因為伊是優等生。卒業了會坐懸位。總是伊看傳福音的事較要緊。現時伊做通世界基督教青年會長，也通世界基督教的代表聚集佇耶路撒冷的時，萬國尊敬伊，紲揀伊做議長。現時佇美國為著主咧活動。

聖經講，1哥林多15：14─17，「基督若未捌閣活，就我所傳的是空空，恁的信也是空空。」閣講，「總是上帝敨放遐的死的苦痛予伊閣活......這个耶穌，上帝已經予伊閣活，阮遮的攏做干證。」

主閣活了後怎樣？有一日伊欲審判世間人，約翰5：22有講，「因為爸無審判人，獨獨用審判的事攏交代囝；欲予眾人攏尊敬囝，親像尊敬爸」。所以對主閣活予咱通知有審判的日。

世間人有罪，耶穌基督替人贖罪是十字架，佮伊的閣活，這咱袂免得著常常報揚；予見若聽見的，會認主耶穌做in的救主。

主確實閣活，聖經的證據有夠額明。在早有兩个無神主義的少年人，講in毋信耶穌有影閣再活。也毋信保羅有反悔來認基督。所以in講，in欲出憑據聖經所記載的是無影。In就立一个約一个約講，in中間一个欲出證據耶穌無閣活，也一个欲出證據保羅奇異的反悔是無事實。

  In決意欲將in所研究的來著佇冊裡。

但是聖冊是上帝的話，親像利劍。In那研究，那信聖冊所記載的是真。到尾感服，承認基督有對反悔是確實。In兩人同心認基督做in的救主；紲將所研究的記佇冊裡，來證明聖經所記載的是真。

  「感謝上帝，為著伊講袂盡的恩賜」。感謝上帝，因為咱的主是永遠的主。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461