首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 三年運動特記
三年運動特記
卷期：第630號 本次： 日期：1937/9 刊名：台灣教會公報 頁數：25-27
篇名：三年運動特記 [ Saⁿ nî ūn-tōng te̍k-kì ]
作者：明有德 Bêng Iú-tek
  顯示 : 漢羅 全羅 並列  

三年運動特記

明有德

1937年9月630期    25-27

 

  I. 聖經的要領。

  1. 平信徒傳道者的武器。逐項著有四配，有平均才有媠，有力。咱的信仰亦是按呢。咱到taⁿ經驗信仰的無力，無毋是因為咱的信仰無平均。咱敧佇道德，也有的敧佇神跡，閣有的干焦咧向望死後的榮光，也其餘的是真要緊--的，也無咧出力，毋知通出力。為著愛幫贊咱對聖經來得著有平均的智識，通做咱基督徒生活的基礎來備辦--的。(三運叢書第二卷 「聖經之要領」頒價。20 テ. 03振替台灣六八O四  蕭樂善)。

  2. 閣備辦冊也是時代的要求。屬佇這款性質的冊，通講是傳教者所咧用--的。到佇今仔日，咱有感覺信徒著有份佇傳福音的工，也實在有咧做的人濟濟。所以有必要這款的冊，通對聖經得著拄好的材料。毋通干焦倚靠家己的喙水，抑是淺淺的經驗。倚靠聖經的材料感化人的力是較大。聖經有真濟好的教示，好的材料咱毋知通得著。這本「要領」會補彼个欠缺。今仔日著養成平信徒傳道者，逐个去傳報福音是真好；總是咱也著知彼个危險。因為若對聖經無得著拄好的培養所傳就錯誤。教會的徛在毋是濟人，是聖經。教會發展毋是人額的濟少。是聖經的發展。有聖經的力充足佇遐，遐有發展。

  3. 讀聖經怎樣袂熱心，袂感覺真必要。彼个原因佇佗位？無毋是佇聖經佮咱實生活相離開。教會獎勵著讀聖經；咱照命令加減讀；總是袂生出熱心，無讀親像袂活。咱平素所讀的聖經是讀來囥頭殼，實在做日常生活的少少。咱逐日所拄著的問題袂通對聖經來解決；因為合咱及時的欠缺的教示佗位毋知通反。致到日日所拄著的事是倚靠家己，抑是別人的氣力來解決。按呢咱自然無感覺聖經的要緊，對按呢是孤不將讀，毋是對逐日的生活的深深的要求。若是聖經逐擺會赴通解決咱日日所咧拄著的事，予咱所向望成做上帝純全的百姓，咱就看聖經真要緊，真寶貝。無人叫家己也會生出愛讀，愛研究的心。「聖經的要領」也是愛予上帝的話佮咱日常生活較近倚，欠缺的時隨時通得著。

  II. 聖經研究。

  1. 欲予教會興盛無毋是對聖經。對10年前已經掠著彼个要緊，台北附近的傳教者，逐月日有聚集4擺，有時兩擺。到今仔日大家得-著知聖經的力的大，也得著研究的方法。為著三年運動，有創做台北區的聖經研究，每月一擺，輪流台北區的教會，也予這个聖經研究閣較有意義，每擺的聚集有(1)世界基督教的消息。(2)聖詩練習。(3)聖經研究佮守聖餐。(4)神學講演。(5)座談會。(6)暗時救人講演。已經經過6擺，成績不止好。閣也有得著日本基督教會Siōng牧師，基隆Chio̍h-te̍k，佮太平町梅崎先生參加佮咱協作。向望這款的聚會會佇咱全教會。

  2. 蘭陽青年修養會。別區卻猶袂著手，蘭陽的青少年運動已經有開收養會。對8月9─12日有聚集佇宜蘭，赴會者有40名。對這擺的計畫，看見蘭陽區的大進步(1)有家己咧行，咧計劃設法逐項真次序。(2)大家真致意出席。雖罔袂通赴頭到尾的人，也是強撥一日來相佮修養。通講比舊年進步不止濟。心內咧想，逐區若親像按呢積極tek進行，三運的力毋是小可。

協議會有分做3班來協議幾若个題目。(1)基督對咱要求甚物。彼个結果是伊要求咱關心聽趁上帝的話，為著上帝的榮光來生活。有犧牲的愛的生活佮十字架的精神的傳道。佇社會中著顯明做基督徒旗色著鮮明。著佇真理來勇敢，有正義的行做。對社會的人著四正來紹介上帝。

  2. 對福音的使命。結果，佇生活，著有對福音真實的態度，著對信仰得著勇敢。無予環境佮人支配，來干證福音。著鼓吹協力的精神。對協力的精神。對協力來廣闊福音。為著這著設濟濟機關，抑是機會來訓練。用種種的方法來傳道，也實行有基督的精神的生活。佇社會中咱的信徒生活著有有徹底。毋通有佮世間妥協，抑是為著舒適來做。著明主的召命，徹底tek理解福音的內容，做福音四正的使者。

以上是對3班所協議的結果，是學生班，指導者班佮一般班。彼兩个題目以外，也有協議對神喻的理解，大家不止得著大的幫贊。講師有本區幾若个。對台北有Kūn-sim主事，陳溪圳先生佮我，12下晡佇宜蘭溫泉，得著熱熱的水來洗身軀，大家佇毋甘來閉會。

                                                   (蕭樂善報)

  III. 本運動這久咧備辦聖經的學課予全教會研究。

  「通訊聖經學校」，現在準備中。閣咧計畫聖經學校(不定期--的)。向望各區也咧計畫救靈，抑是青少年，抑是奮興的工。向望佇所賰的時間來做大有力的工程，通相佮榮光主。

  IV. 拜託各區的會計。

本運動今年已經過半年去啦。有計畫濟濟要緊的工欲進行，請各區所負擔本部的經費趕緊收倚，照一覽表振替番號寄予我。蘭陽區已經交三份一。其他的區攏猶袂交，檢采是咧聽候收倚做一下寄。總是毋免做一下，那收那寄，通應及時的欠用，有的若是袂記得本區著負擔偌濟，請看今年中會會錄第49面。咱若無趕緊佇經費來協力，自然本運動袂通進行。無久中會就到，咱若拖到中會前才交，按呢咱今年的機會失落去。拜託大家盡力就是。

                                              (卓恒利拜託)。
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461