Mô͘-se Toān

Chiap 8 goe̍h 14 bīn

[Ē-té chit tè Si sī chiap tī 14 bīn ê Cha̍p-lio̍k]

1937年9月630期       20-21

  23. Chim-chiok kā khoàⁿ khiā tiāⁿ-tiāⁿ,

     Chhì-tiong hoat-chhut chin toā siaⁿ;

     Liân-liân nn̄g kù kiò Mô͘-se.

     Lí taⁿ só͘ khiā sī Sèng-tē.

  24. ài chai siaⁿ-im tó-uī lâi?

     Chiū-sī Thiⁿ-téng toā Chú-cháiⁿ;

     Kóng goá Í-sek-lia̍t peh-sìⁿ,

     Siū toā kan-khó͘ Ai-ki̍p--nih.

  25. Kim-ji̍t lí khì hit só͘-chāi,

     Kiù in kàu hó só͘-chāi lâi;

     Mô͘-se sió-táⁿ pún m̄-khéng,

     Chin Sîn chí-sī toā koân-lêng.

  26. Suî-sî lī-pia̍t in ga̍k-hū,

     Chun-thàn chin Sîn só͘ hoan-hù;

     Soà toà ke-koàn Ai-ki̍p khì,

     Hiaⁿ-ko A-lûn lâi ngiâ-chih.

  27. Nn̄g-lâng saⁿ-chhoā kìⁿ Hoat-ló,

     Chin Sîn ê oē lóng kéng-kò;

     Bô gō͘ kun-ông chin káu-khiat,

     Koh-khah thiau-lân Í-sek-lia̍t.

  28. Chin Sîn boē oē koh jím-nāi,

     Chioh ēng Mô͘-se kàng cha̍p-chai;

     Tē-it hô-chuí pìⁿ-chò hoeh,

     Tē-jī chuí-ke moá kiong-lāi.

  29. Tē-saⁿ tîn-ai koà báng-luī,

     Tē-sì hô͘-sîn moá ta̍k-uī;

     Tē-gō͘ un-e̍k tī cheng-seⁿ,

     Tē-la̍k lâng seⁿ to̍k-chhng pēⁿ.

  30. Tē-chhit peng, phauh[sic], phah chhân-tē,

     Tē-peh chháu-meh sì-koè poe;

     Tē-káu saⁿ-ji̍t saⁿ-mê àm,

     Tē-cha̍p ke-ke sí tióng-lâm.

  31. Tuì-chia Ai-ki̍p Hoat-ló ông,

     Chin-chiàⁿ bô hoat chiah khai-hòng,

     Mô͘-se hit sî chiū ín-chhoā,

     Cháu-chhut Ai-ki̍p bô koh toà.

  32. Ti̍t-ti̍t ǹg tuì khòng-iá khì,

     án-ni khó͘-lān chiū thoat-lī;

     Hoat-ló chit-sî koh hō͘-hoé,

     Chiū chhoā tāi-peng khì tui chhoē.

  33. Peh-sìⁿ kiaⁿ-hiâⁿ khui-siaⁿ ai,

     āu ū kun-bé, chêng ū hái;

     Chin Sîn ū hoan-hù Mô͘-se,

     ēng koáiⁿ kí chuí ná ta-tē.

  34. Tiong-kan hián-hiān chit tiâu lō͘,

     Lâm, lú, teh koè ēng kha-pō͘;

     Ai-ki̍p tāi-peng iā tuì chuí,

     Chīn-la̍t ti̍t-cháu chīn-la̍t tui.

  35. Í-sek-lia̍t lâng lóng koè bīn,

     Ai-ki̍p kun-bé chhiông-kông phîn;

     Mô͘-se koh-chài ēng koáiⁿ kí,

     Hái-chuí ha̍p-oá lóng im-sí.

  36. Chhú-āu chhoā in sì-cha̍p tang,

     Lâi-óng choan tī Sîn kap lâng;

     Sèng-chêng seⁿ-chò ke̍k un-jiû,

     Thiⁿ ē chèng-lâng bô chi̍t iú.

  37. Só͘ kiâⁿ iàu-sū ū to-sò͘,

     Só͘ choè kî-sū kham him-bō͘;

     Nā-sī suî hāng kóng siông-sè,

     Chêng tn̂g, choá té, hīn bē-ē.

  38. Choē[sic]-iàu ê sū tī Se-nái,

     Chiong Sîn ê Sū kà lâng chai,

     Sîn-jiah koan[sic]-tiōng chō tâng-choâ,

     Hō͘ sí ê lâng ē koh-oa̍h.

  39. Gū-tio̍h peh-sìⁿ chò m̄-hó,

     Tiong-sim jia̍t-chhiat thè kî-tó,

     Sî-sî chīn-tiong tī Siōng-chú,

     Koh chò sian-ti kóng chhàm-gú.

  40. āu sí tī Nî-phò[sic]-soaⁿ--nih,

     Liân-kí í-keng chi̍t-pah-jī;

     Ba̍k-chiu bô hoe, hī bô tāng,

     Giám-jiân m̄-sī choè lāu-lâng.

  41. Chit toāⁿ kò͘-sū choè chhù-bī,

     Chu-kun chhiáⁿ kàu pài-tn̂g--nih;

     Nā khéng siông sè koh khàm-khêng,

     Loē-tiong sū-chek koh-khah bêng.